ဗန်းမော်မြို့ တိုက်ပွဲပြင်းထန်နေပြီး မြို့အကြီးအကျယ် ပျက်စီး – သျှမ်းသံတော်ဆင့်

ကချင်ပြည်နယ်၊ ဗန်းမော်မြို့ ကချင်လွတ်လပ်ရေး တပ်မတော်(KIA) ပူးပေါင်းတပ်များ ထိုးစစ်အရှိန် မြှင့်တင် တိုက်ခိုက်နေ၍ ယနေ့ တိုက်ပွဲ ပြင်းထန်နေပြီး နေရာတချို့ မီးလောင်နေကာ မြို့အကြီးအကျယ် ပျက်စီးနေပြီဟု သတင်းရင်းမြစ်က ယနေ့ (ဇန်နဝါရီလ ၆ ရက်) ညနေပိုင်းတွင် ပြောသည်။

ယနေ့ နနံနက်အစောပိုင်းကစ၍ ဗန်းမော်မြို့တွင်း တိုက်ပွဲများ ပြင်းထန်နေလာရာ စစ်ကောင်စီဘက်က လက်နက်ကြီး၊ ဒရုန်းနှင့် လေကြောင်းမှ အကြိမ်ကြိမ် တိုက်ခိုက်နေသည့် နည်းတူ KIA ပူးပေါင်းတပ်များကလည်း လက်နက်ကြီးနှင့် ဒရုန်း အများအပြား အသုံးပြု ထိုးစစ်ဆင် တိုက်ခိုက်နေသဖြင့် ယခု ညနေပိုင်း အထိ တိုက်ပွဲများ ပြင်းထန်နေပြီး မြို့နေရာအချို့ မီးလောင်နေသည်ဟု ၎င်းကဆိုသည်။

“နှစ်ဖက်စလုံးက လက်နက်ကြီးနဲ့ ဒရုန်းတွေ တအားသုံးတယ်။ စစ်တပ်က လေယာဥ◌် တောက်လျှောက်လာပစ်တယ်။ KIA က မြို့ကို ထိမ်းချုပ်ထားတယ်လို့ ပြောလို့ရတယ်။ တမြို့လုံး သူတို့ကြီးပဲ။ မိုးလေဝသလမ်း မီးလောင်သွားတယ်။ အိမ်များတယ်” ဟု ၎င်းကရှင်းပြသည်။

လက်ရှိ KIA ပူးပေါင်းတပ်က ဗန်းမော် နည်းပညာတက္ကသိုလ်၊ ဆေးရုံ၊ ထွေအုပ်၊ ရဲစခန်း စသည့် အရေးကြီးနေရာများကို သိမ်းပိုက်ထားပြီး လက်ရှိ မြို့တောင်ဘက်ရှိ စစ်ကောင်စီ ခလရ (၄၇) နှင့် စကခ (၂၁) ကို အနီးကပ် ပိတ်ဆို့ တိုက်ခိုက်နေရာ နှစ်ဖက် ထိခိုက်ကျဆုံးမှုများရှိကြောင်း တခြား စစ်ရေးသတင်းရင်းမြစ်က ဆိုသည်။

“မြို့ကတော့ အရင်နေ့တွေကတည်းက တော်တော်ပျက်စီးနေတာ။ ဒီနေ့ လေယာဥ◌် ဗုံးကြဲတာက မြို့ထဲဖက်များတော့ ပိုဆိုးတာပေါ့။ အခု စစ်တပ်တွေကို ပိတ်ပြီးတိုက်နေတယ်။ အလောင်းလက်နက် ရတာလည်းရှိတယ်။ ကိုယ့်ဖက်က ကျတာလည်းရှိတယ်။ အတိအကျတော့ ပြောလို့မရဘူး။ မကြာခင်ရမည်လို့ မျှော်လင့်ထားတယ်” ဟု ၎င်းကရှင်းပြသည်။

လက်ရှိ KIA ပူးပေါင်းတပ်က ဗန်းမော်မြို့ဝန်းကျင် ကုန်းလမ်းနှင့် ရေလမ်း ဖြတ်တောက် တိုက်ခိုက်နေပြီး ကြေးမတတ်နိုင်မှုနှင့် အခြားအကြောင်းများကြောင့် မြို့တွင်း ထောင်နှင့်ချီသည့် ပြည်သူများ ပိတ်မိနေဆဲဖြစ်ရာ ရသည့်နည်းလမ်းဖြင့် မြို့မှထွက်ခွာစေလိုပြီး တိုက်ပွဲကင်းလွတ်သည့် မြို့ပြင်နေရာ တချို့တွင် စောင့်ဆိုင်းနေသည့် လူမှုကူညီရေးအသင်းများနှင့် ဆက်သွယ်စေလိုကြောင်း ကူညီနေသူ တစ်ဉီးက ပြောသည်။

ယမန်နေ့ လူမှုကွန်ရက်တွင် ပြန့်နှံ့နေသည့် ရုပ်သံ တခုတွင် ဗန်းမော်မြို့ ကန်တော်စေ◌ျးဘက် စေ◌ျးဆိုင်များ ဖွင့်လှစ်ထားပြီး KIA ပူးပေါင်းတပ်ဖွဲ့ဝင်များ ခေါက်ဆွဲ ဝယ်ယူစားသောက်နေသည်ကို တွေ့ရသော်လည်း ယနေ့တွင်မူ မြို့ပျက်စီး မီးလောင်နေသည့် ရုပ်သံတချို့ကိုသာ တွေ့ရသည်။

ဗန်းမော်မြို့နည်းတူ မံစီမြို့တွင်လည်း ယနေ့ နံနက်ပိုင်းမှစ၍ တိုက်ပွဲများ ပြန်လည် ပြင်းထန်နေသော်လည်း အခြေအနေ မသိရှိရသေးဟု စစ်ရေး သတင်းရင်းမြစ်က ဆိုသည်။

ပြီးခဲ့သည့် ၂၀၂၄ ခုနှစ်၊ ဒီဇင်ဘာ ၄ရက်က စတင်ခဲ့သည့် ထိုးစစ် အတွင်း KIA ဦးဆောင်သည့် တော်လှန်ရေးတပ်များက ဗန်းမော်မြို့ စကခ(၂၁) နှင့် ခလရ (၄၇)၊ မံစီမြို့ရှိ ခမရ (၃၁၉)၊ ခမရ (၆၀၁) နှင့် အမှတ် (၅၂၃) အမြောက်တပ် တပ်ရင်းဌာနချုပ် တို့ကို တပြိုင်နက် ပိတ်ဆို့ တိုက်ခိုက်နေခြင်း ဖြစ်သည်။