မြဝတီ ကျားဖြန့်ထဲရောက်ရှိသွားသည့် တရုတ်မင်းသား ငွေလိမ်ရန် သင်တန်းပေးခံရဟု ထွက်ဆို

လိမ်လည်လှည့်ဖြားခံရပြီး ထိုင်း-မြန်မာနယ်စပ် မြဝတီအနီး ရွှေကုက္ကိုလ်မြို့သို့ ရောက်သွားသည့် တရုတ်နိုင်ငံသား သရုပ်ဆောင် Wang Xing သည် အွန်းလိုင်ပေါ် ငွေလိမ်ရန် သင်တန်းပေးခံရကြောင်း ထွက်ဆိုခဲ့သည်ဟု ထိုင်းအခြေစိုက် Khaosod English ကဖော်ပြသည်။

Wang Xing သည် ထိုင်းဖျော်ဖြေရေး ကုမ္ပဏီကြီးတစ်ခုဖြစ်သည့် GMM Grammy ၏ ဖိတ်ခေါ်ခြင်းခံရကြောင်း လိမ်လည်သူတစ်ဦးထံမှ WeChat မက်ဆေ့ချ်ရရှိရာ ဇန်နဝါရီ ၃ ရက်တွင် ဘန်ကောက်မြို့ သုဝဏ္ဏဘူမိ လေဆိပ်သို့ ရောက်ရှိခဲ့သည်ဟု Wang Xing ကထွက်ဆိုသည်။

ထို့နောက် ဘန်ကောက်မြို့မှ မဲဆောက်မြို့သို့ ပို့ဆောင်ခံရပြီး နောက်ဆုံးတွင် တရားမဝင်နယ်စပ်မှတဆင့် မြန်မာနိုင်ငံသို့ လူကုန်ကူးခံရခြင်းဖြစ်သည်ဟု Khaosod English က ဖော်ပြသည်။

ရွှေကုက္ကိုလ်မြို့သို့ ရောက်ရှိသည့် ၂ ရက်၊ ၃ ရက်အတွင်း တရုတ်လူမျိုးများကို ပစ်မှတ်ထားသည့် လိမ်လည်စာတိုများ ရေးသားလေ့ကျင့်ရန် စေခိုင်းခံရသည်ဟု Wang Xing က ထွက်ဆိုသည်။

ထိုလုပ်ငန်းအတွင်း လိမ်လည်စာတိုများ ရေးသားလေ့ကျင့်ရန် စေခိုင်းခံရသော်လည်း ကိုယ်ထိလက်ရောက် နှိပ်စက်ခြင်း မရှိခဲ့ကြောင်း၊ သူ၏ ဘယ်ခြေထောက်တွင် နီရဲနေသည့် အမှတ်အသားသည် နှိပ်စက်ခြင်းခံရခြင်း မဟုတ်ဘဲ မွေးရာပါအမှတ်အသားဖြစ်ကြောင်း Khaosod English ကဖော်ပြသည်။

သို့သော် Wang Xing သည် ရွှေကုက္ကိုလ်မြို့သို့ ရောက်ပြီးသည့်အခါ ကတုံး တုံးခံရသည်ဟု ထိုင်းသတင်းဌာန The Reporter က ဖော်ပြသည်။

လက်ရှိတွင် Wang Xing ကို ထိုင်းအာဏာပိုင်များက ကယ်တင်နိုင်ခဲ့ပြီး တရုတ်နိုင်ငံသား အယောက် ၅၀ နှင့်အတူ ဇန်နဝါရီလ ၇ ရက်က ထိုင်းအာဏာပိုင်များမှ ကယ်တင်ခဲ့ခြင်းဖြစ်ကြောင်း သိရသည်။

Wang Xing လူကုန်ကူးခံရမှုဖြစ်စဉ်ကြောင့် ထိုင်းနိုင်ငံ၏ ခရီးသွားလုပ်ငန်းထိခိုက်မှုကို ကာကွယ်ရန် ထိရောက်စွာ စီမံခန့်ခွဲရမည်ဟု ဝန်ကြီးချုပ် Shinawatra က ထုတ်ဖော်ပြောဆိုထားသည်။