လွိုင်ကော်မြို့ အဝင်၊အထွက် စစ်ကောင်စီထံ ထောက်ခံစာယူရ – သျှမ်းသံတော်ဆင့်

ကရင်နီပြည် (ကယားပြည်) လွိုင်ကော်မြို့ အဝင်၊အထွက် သွားလာမည့်သူတိုင်း စစ်ကောင်စီထံ ထောက်ခံစာယူနေရကြောင်း သတင်းရင်းမြစ်များထံ စုံစမ်းသိရသည်။

ထိုကဲ့သို့ ထောက်ခံစာယူဆောင်ရန် စစ်ကောင်စီက စစ်အာဏာသိမ်းပြီးတစ်နှစ်အကြာတွင် လုပ်ဆောင်ခဲ့သော်လည်း ယခုရက်ပိုင်းအတွင်း ထောက်ခံစာပါမှသာ ဝင်၊ထွက်ခွင့်ပြုတော့ကြောင်း ၊ အချို့စစ်ဘေးရှောင်များသည် လွိုင်ကော်မြို့အတွင်း တိုက်ပွဲငြိမ်သက်နေသဖြင့် နေရပ်ပြန်သူများရှိကာ စစ်ကောင်စီက စစ်ဆေးမှုပိုတင်းကြပ်လာကြောင်း မြို့ခံအမျိုးသမီး တစ်ဉီးက သျှမ်းသံတော်ဆင့်ကိုပြောသည်။

ထို့ကြောင့် မြို့ဝင်၊ထွက်သွားလာမည့်သူများ ထောက်ခံစာမပါရှိလျှင် စစ်ကောင်စီဘက်မှ ဖမ်းဆီးမည် ပြောဆိုထားကြောင်း သိရသည်။

“ ထောက်ခံစာနဲ့သွားလာဖို့ က အရင်ကတည်းကပြောပေမယ့် အခုရက်ပိုင်းက ပိုစစ်ဆေးလာတာ။ အချို့စစ်ရှောင်တွေကလည်း ပြန်လာတော့ အဝင်၊အထွက် အရမ်းစစ်တယ်။ ထောက်ခံစာမပါရင် ဖမ်းမယ်လို့ ပြောတယ်။ နောက် မိသားစုဝင်ဘယ်နှယောက်ရှိတယ်က အစ အကုန်စစ်တာ။” ဟု ၎င်းမြို့ခံအမျိုးသမီးက ဆိုသည်။

ထို့အပြင် ဆီဆိုင်ဘက်မှ လွိုင်ကော်သို့ သွားသည့်လမ်းတွင် စစ်တပ်ဂိတ်ပေါင်း( ၂၀) ဝန်းကျင်ရှိပြီး တစ်ဂိတ်လျှင် အနည်းဆုံးကျပ်( ၂ ထောင်) ပေးနေရကြောင်း အသက် ၃၀ အရွယ်ရှိ နေရပ်ပြန် စစ်ဘေးရှောင် အမျိုးသမီး တစ်ဉီးက ပြောသည်။

ဆက်လက်ပြီး ယခုရက်ပိုင်း လွိုင်ကော်မြို့တွင် တိုက်ပွဲများငြိမ်သက်နေကာ အခြားဒေသသို့ စစ်ဘေးရှောင်သွားသည့် ပြည်သူများလည်း နေရပ်ပြန်လာကြသော်လည်း မြေမြုပ်မိုင်းအန္တရာယ်ကို စိုးရိမ်နေကြောင်း ၎င်းက ပြောသည်။

“ဟိုတလောတုန်းကဆို အဖိုးတစ်ယောက် မြေမြုပ်မိုင်းနင်းမိလို့ ဆုံးသွားတယ်။ နေရပ်သာပြန်လာတာ မိုင်းအန္တရာယ်ကို ကြောက်နေရသေးတာ။ မိုင်းနင်းမိလည်း ပြည်သူတွေပဲ ဖြေရှင်းနေရတာ။ ဘယ်အဖွဲ့မှ တာဝန်ယူမဖြေရှင်းပေးဘူး။ စစ်တပ်ဘက်က မိုင်းရှင်းလင်းပေးမယ်ဆိုပြီး ခုထိဘာမှ မလုပ်ပေးဘူး။” ဟု အဆိုပါ စစ်ရှောင်အမျိုးသမီးက ပြောသည်။

ထိုသို့ နေရပ်ပြန်လာသည့် စစ်ရှောင်အများစုသည် အခြားဒေသတွင်ရေရှည်စစ်ရှောင်နေထိုင်ရသောကြောင့် စားဝတ်နေရေးအခက်ခဲရှိကာ မိမိနေရပ်သို့ ပြန်လည် နေထိုင်လာကြခြင်း ဖြစ်ကြောင်း ၎င်းအမျိုးသမီးက ပြောသည်။

လွိုင်ကော်မြို့မဈေးကို စစ်ကောင်စီမှ ပြန်လည်ပြုပြင်နေပြီး ယခင်ကဲ့သို့ စည်ကားလာအောင် ပြန်လည်လုပ်ဆောင်မည်ဖြစ်သောကြောင်း မြို့ခံများကို ပူးပေါင်းပါဝင်စေလိုကြောင်း စစ်တပ်ဘက်မှ ပြောဆိုထားသည်ဟု မြို့ခံများထံမှ သိရသည်။

အာဏာမသိမ်းမီက အလွန်စည်ကားသော လွိုင်ကော်မြို့သည် အာဏာသိမ်းပြီး “ ၁၁၁၁”စစ်ဆင်ရေး ဆင်နွှဲပြီးနောက်နေအိမ်အများပြားပျက်စီးကာ လူသူကင်းမဲ့သည့် မြို့ပျက်ကြီးသဖွယ် ပြောင်းလဲ သွား ခဲ့သည်။

ယခုလက်ရှိတွင် စစ်ကောင်စီတပ်က လွိုင်ကော်မြို့ကို ထိန်းချုပ်ထားပြီး မြို့အတွင်း စစ်ရှောင်ဦးရေ သုံးပုံ တစ်ပုံမျှသာ ပြန်လည်နေထိုင်နေကြသည်ဟု သိရှိရသည်။

အလုပ်သင် သတင်းထောက် နန်းလရောင် ရေးသားသည်။