ဆီဆိုင်မြို့နယ် ပုံးအင်းဒေသက အမျိုးသား ၁ ဦးကို စစ်ကောင်စီက ဖမ်းဆီး

သျှမ်းပြည် ဆီဆိုင်မြို့နယ် ပုံးအင်းဒေသ ဝမ့်ခွမ်ကျေးရွာမှ အမျိုးသား ၁ ဦးကို စစ်ကောင်စီက ဖမ်းဆီးသွားခဲ့ကြောင်း စုံစမ်းသိရသည်။

ပြီးခဲ့သည့် ဇန်နဝါရီလ ၇ ရက် နံနက်ပိုင်းတွင် ပုံးအင်းဒေသ ဝမ့်ခွမ်ကျေးရွာရှိ နေအိမ်သို့ စစ်ကောင်စီ၏ လက်အောက်ခံ ဘန်းယဉ်ကျေးရွာ ရဲတပ်ဖွဲ့က လာရောက်ဖမ်းဆီးသွားခြင်းဖြစ်ကြောင်း ဝမ်ခွမ်ကျေးရွာဒေသခံ တစ်ဦးက သျှမ်းသံတော်ဆင့်ကိုပြောသည်။

ထိုအမျိုးသားကို ပြည်သူ့ကာကွယ်ရေးတပ် PDF အဖွဲ့အား မိုဘိုင်းငွေပေးချေမှုစနစ်ဖြစ်သော Kpay မှတစ်ဆင့် ငွေလွှဲထားသည်ဟုဆိုကာ စစ်ကောင်စီက ဖမ်းဆီးသွားခြင်း ဖြစ်ကြောင်းဆိုသည်။

“သူ့ကို ငွေလွှဲတာနဲ့ ပတ်သက်ပြီး ဖမ်းသွားတယ်လို့ပြောတယ်။ ငွေလွှဲတဲ့နေရာမှာ PDF နဲ့ ဆက်စပ်တယ်ပေါ့။ အခုတော့ သူ့ကိုဟိုပုံး ပို့လိုက်ပြီ” ဟု ၎င်းကပြောသည်။

ဖမ်းဆီးခံရသူမှာ အသက် ၃၀ ဝန်းကျင် စိုင်းဆိုင်လိန် ဖြစ်ပြီး၊ ပြည်သူ့ကာကွယ်ရေးတပ် PDF အဖွဲ့အား ငွေလွှဲပေးသည်ဆိုသည့် စွပ်စွဲချက်နှင့် ပတ်သက်၍ သျှမ်းသံတော်ဆင့်မှ သီးခြားအတည်ပြု၍ မရသေးပေ။

အာဏာသိမ်းပြီးနောက်ပိုင်း စစ်ကောင်စီသည် ၎င်းတို့ကို ဆန့်ကျင်သည်ဟု သံသယရှိသူများကို မနားမနေ ဖမ်းဆီးအရေးယူလျက်ရှိသည်။

ထို့ပြင် PDF နှင့် အမျိုးသားညီညွတ်ရေး အစိုးရ (NUG) ကို ထောက်ပံ့သည်ဟု စွပ်စွဲခံရသူများကို ဖမ်းဆီးရာတွင် ကြီးလေးသော ပုဒ်မများဖြင့် အရေးယူခြင်းအပြင် နေအိမ်များကို ချိတ်ပိတ်ခြင်းနှင့် အသက်သေဆုံးသည်အထိ စစ်ကြောခြင်းများလည်း ရှိသည်။

၂၀၂၁ ဖေဖော်ဝါရီလ ၁ ရက်နေ့မှ ၂၀၂၅ ဇန်နဝါရီလ ၉ ရက်နေ့အထိ ဖမ်းဆီးခံခဲ့ရသူ စုစုပေါင်း (၂၈,၁၇၃) ဦးရှိပြီး ထိုအထဲမှ (၂၁,၄၆၆) ဦးမှာ ထိန်းသိမ်းခံနေရဆဲဖြစ်ကာ ထိန်းသိမ်းခံနေရသူများအနက်မှ (၉,၉၃၁) ဦးမှာ ထောင်ဒဏ်ချမှတ်ခံထားရကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP က ဇန်နဝါရီလ ၉ ရက်တွင် ထုတ်ပြန်သည်။

ထို့ပြင် စစ်အာဏာသိမ်း ၃ နှစ်ကာလအတွင်း ဒီမိုကရေစီရေး လှုပ်ရှားသူများနှင့် ပြည်သူ စုစုပေါင်း ၆,၁၂၉ ဦးသည် စစ်ကောင်စီ၏ လက်ချက်ဖြင့် သေဆုံးခဲ့ရကြောင်း ဖော်ပြသည်။