Written by 
သျှမ်းတောင်၊ ရပ်စောက်မြို့နယ်၊ ကျောက်ဂူတိုက်နယ်တွင် တိုက်ပွဲများ ပြင်းထန်နေရာ ယနေ့ (ဇန်နဝါရီလ ၁၆ ရက်) မွန်းလွဲ ၁၂ နာရီခွဲ ဝန်းကျင်က စစ်ကောင်စီ လေယာဉ်ဖြင့် ဗုံးကြဲ တိုက်ခိုက်နေကြောင်း ဒေသခံများက ပြောသည်။
ပြီးခဲ့သည့် လမှစတင်၍ ကျောက်ဂူဒေသတွင် စစ်ကောင်စီနှင့် ဓနုပြည်သူ့လွတ်မြောက်ရေးတပ်မတော် (DPLA) တိုက်ပွဲများ ဆက်တိုက် ဖြစ်ပွားနေရာ ကျောက်ဂူတိုက်နယ် အတွင်း နေထိုင်သည့် ဒေသခံများ ထွက်ပြေးနေရစဥ် ယခုကဲ့သို့ ဗုံးကြဲ တိုက်ခိုက်ခြင်း ဖြစ်သည်။
“၅ ခါ ၆ ခါရှိပြီ ဆက်တိုက်ချနေတာ။ အခုလည်း လေယာဉ် ဝဲနေသေးတယ်။ ဘယ်နေရာကျလဲ သေချာ မသိဘူးလေ၊ ကျောက်ဂူတဝိုက်ပဲ ချတာက၊ ဟိုးအရင်ရက်ကတည်းက အကုန်ပြေးနေရတာလေ” ဟု ဒေသခံတစ်ဉီးက ယနေ့ မွန်းလွဲ တနာရီ ဝန်းကျင်တွင် ပြောသည်။
လက်ရှိ စစ်လေယာဉ်ပေါ်မှ ဗုံးကြဲချမှုကြောင်း ပေါက်ကွဲသံများ ကြားနေရသကဲ့သို့ လက်နက်ငယ် ပစ်ခတ်သံများလည်း ကြားနေရကြောင်း ၎င်းကဆက်ပြောသည်။
လေကြောင်း ဗုံးကြဲမှုကြောင့်ထိခိုက် ပျက်စီးမှု အခြေအနေများကိုမူ မေးမြန်းစုံစမ်းနေဆဲ ဖြစ်သည်။
ကျောက်ဂူဒေသတွင် တိုက်ပွဲများ ပြင်းထန်နေသော်လည်း ဆက်စပ်ဒေသဖြစ်သည့် ရေအားလျှပ်စစ် စက်ရုံ တည်ရှိရာ ကျိုင်းခမ်းဒေသတွင်မူ တိုက်ပွဲ ဖြစ်ပွားမှု မရှိသေးဘဲ တည်ငြိမ်နေကြောင်း တခြား ဒေသခံတစ်ဉီးက ဆိုသည်။
ကျောက်ဂူဒေသတွင် စစ်ကောင်စီ အင်အားဖြည့်တင်းမှုများကြောင့် တိုက်ပွဲများ ဆက်လက် ဖြစ်ပွားနေပြီး စစ်ကောင်စီ လက်နက်ကြီး ပစ်ခတ်မှုကြောင့် အရပ်သား ထိခိုက်မှု ရှိခဲ့ကြောင်း ဓနုတပ် (DPLA) က ယနေ့ (ဇန်နဝါရီလ ၁၆ ရက်) တွင် ထုတ်ပြန်သည်။
ပြီးခဲ့သည့် ဇန်နဝါရီ ၁၄ ရက် နံနက်ပိုင်း ၂ နာရီကြာ တိုက်ပွဲ ဖြစ်ပွားရာ စစ်ကောင်စီတပ် လက်နက်ကြီး ပစ်ခတ်မှုကြောင့် နေအိမ် ၂ လုံး မီးလောင်ပျက်စီးခဲ့ရကြောင်း ဇန်နဝါရီ ၁၅ ရက်တွင် စစ်ကောင်စီ လက်နက်ကြီး ပစ်ခတ်၍ ရွာသားတဦး ဒဏ်ရာရရှိခဲ့ကြောင်း ဖော်ပြသည်။
စစ်ရေးပစ်မှတ် မဟုတ်သည့် ကျေးရွာများကို စစ်ကောင်စီ လက်နက်ကြီး ပစ်ခတ်၍ ခဲကြားရွာနှင့် ဖက်ရင်းကုန်းရွာတွင်း ကျရောက် ပေါက်ကွဲပြီး နေအိမ် အဆောက်အအုံ ပျက်စီးဆုံးရှုံးမှုများ ရှိခဲ့ကြောင်း DPLA က ဆိုသည်။
နာမည်ကျော် တောင်ခမ်း တိုက်ပွဲ ဖြစ်ပွားနေသည့် နောင်ချိုမြို့နယ်၊ တောင်ခမ်းကျေးရွာနှင့် မိုင် ၃၀ ခန့်သာ ကွာဝေးသည့် ကျောက်ဂူဒေသတွင် စစ်ကောင်စီ စစ်ကြောင်းများကို DPLA က ကြားဖြတ် တိုက်ခိုက်နေရာ တိုက်ပွဲ ပြင်းထန်နေခြင်း ဖြစ်သည်။
The post ရပ်စောက်မြို့နယ် ကျောက်ဂူဒေသ ယနေ့ တိုက်ပွဲပြင်းထန်နေပြီး စစ်လေယာဉ်ဗုံးကြဲနေ appeared first on သျှမ်းသံတော်ဆင့်.