UWSA မှ သျှမ်းတောင်ဘက် စစ်အင်အားဖြည့်တင်းနေသည်ဆိုသည့် ရုပ်သံများ လူမှုကွန်ရက်ပေါ် ပျံ့နှံ့နေ

သျှမ်းပြည်တောင်ပိုင်းသို့ ‘ဝ’ပြည်သွေးစည်းညီညွတ်ရေးတပ်မတော် UWSA မှ စစ်အင်အား အလုံးအရင်း ဖြည့်တင်းနေသည်ဆိုသည့် ရုပ်သံများ လူမှုကွန်ယက်ပေါ်တွင် ပျံ့နှံ့နေကြောင်း စုံစမ်းသိရသည်။

ဇန်နဝါရီလ ဒုတိယပတ်မှ စတင်ပြီး လူမှုကွန်ယက်စာမျက်နှာဖြစ်သည့် TikTok နှင့် ဖေ့စ်ဘုတ် Facebook များတွင် ပျံ့နှံ့နေသည့် ရုပ်သံများထဲတွင် UWSA တပ်သားအများအပြား ကားလမ်းမကြီးပေါ် ‘ဝ’အလံ လွှင့်ထူကာ ချီတက်နေခြင်း၊ ချောင်းစပ်တနေရာတွင် ကမ်းကူးနေခြင်းများ မြင်တွေ့ရသည်။

ယခုပျံ့နှံ့နေသည့် ရုပ်သံျများနှင့် ဆက်စပ်၍ ‘ဝ’တပ်ဖွဲ့ UWSA မှ စစ်အင်အား အလုံးအရင်းဖြင့် သျှမ်းပြည်တောင်ပိုင်း ပအိုဝ်းပြည်သူ့စစ် PNO နှင့် သျှမ်းတပ် RCSS/SSA ထိန်းချုပ်နယ်စပ်များအထိ အင်အားဖြည့်တင်းလာနေသည်ဆိုသည့် ပြောဆိုချက်သည် ယမန်နှစ် ၂၀၂၄ ကတည်းက ပြည်သူများအကြား ပျံ့နှံ့နေကြောင်း စစ်ရေးသတင်းရင်းမြစ်တစ်ဦးက ပြောသည်။

“စစ်အင်အားဖြည့်တာ ကြားမိတယ်။ လဲချား၊ နမ့်စန်က (၇၅၈) ပြည်သူ့စစ်အဖွဲ့ရဲ့ နေရာဟောင်းတွေဘက် စစ်အင်အားဖြည့်လိမ့်မယ်။ သျှမ်းတပ်နဲ့ ‘ဝ’ က စစ်အင်အား လိုက်ဖြည့်တယ်ဆိုတာ ဟုတ်တယ်။ PNO နဲ့ RCSS အစပ်တွေ အင်အားဖြည့်ရင် ‘ဝ’ အမြဲတမ်းပါတယ်”ဟု သျှမ်းပြည်တောင်ပိုင်းမှ ၎င်းစစ်ရေးသတင်းရင်းမြစ်က သျှမ်းသံတော်ဆင့်ကို ပြောဆိုသည်။

လူမှုကွန်ယက်ပေါ် ပျံ့နှံနေသည့် UWSA တပ်သားများ ‘ဝ’အလံလွှင့်ထူကာ ချီတက်သွားလာနေသည့် ရုပ်သံများနှင့် ပတ်သက်၍ မည်သည့်အချိန်တွင် ရိုက်ကူးထားကြောင်း မသိရဘဲ တည်နေရာကို သျှမ်းသံတော်ဆင့်မှ သီးခြားအတည်ပြုနိုင်ခြင်း မရှိသေးပေ။

“UWSA ရဲ့ တောင်ပိုင်း ၁၇၁ စစ်ဒေသက အဲ့ဒီအလုပ်တွေ လုပ်လိမ့်မယ်လို့ ယူဆပါတယ်။ အထူးသဖြင့် UWSA နာမည်နဲ့ မဟုတ်ဘဲနဲ့ SSA နာမည်နဲ့ အသုံးချပြီးတော့ တောင်ပိုင်းကို ဝင်ရောက်တာတွေ ရှိလာနိုင်တယ်လို့ ကျနော်ကလည်း မှန်းဆကြည့်ပါတယ်”ဟု နိုင်ငံရေးလေ့လာသုံးသပ်သူ ဦးသန်းစိုးနိုင်က သျှမ်းသံတော်ဆင့်ကို ပြောသည်။

ယမန်နှစ် ၂၀၂၄ နှစ်ကုန်ပိုင်းက စတင်ပြီး သျှမ်းပြည်တောင်ပိုင်းဘက် အင်အားဖြည့်တင်းလာသည့် သျှမ်းတပ် SSPP/SSA နှင့်အတူ UWSA တပ်သားများလည်း ပါဝင်လာကြောင်း ဒေသခံများ၏ ပြောဆိုချက်နှင့် ပတ်သက်၍ သျှမ်းသံတော်ဆင့်မှ ‘ဝ’ပြင်ပဆက်ဆံရေးတာဝန်ခံ ဦးညီရမ်းထံ ဆက်သွယ်မေးမြန်းခဲ့ရာ ကောလာဟလ ဖြစ်ကြောင်း ပြန်လည်ငြင်းဆိုသည်။

UWSA တပ်သားများ ချီတက်သွားလာနေသည့် ရုပ်သံဖိုင်နှင့် ပတ်သက်၍လည်း ဗွီဒီယိုဖိုင် အဟောင်းများသာ ဖြစ်ကြောင်း ဦးညီရမ်းက သျှမ်းသံတော်ဆင့်ကို ဖြေကြားသည်။

ယမန်နှစ် ဩဂုတ်လနောက်ဆုံးပတ်တွင် သျှမ်းပြည်အရှေ့ပိုင်းရှိ ‘ဝ’တပ်ဖွဲ့ UWSA တောင်ပိုင်းစစ်ဒေသ (၁၇၁) မှ ပြည်ပရောက် ‘ဝ’အမျိုးသားများကို နေရပ်ပြန်ခေါ်ခဲ့ပြီး စစ်မှုထမ်း တပ်သားသစ် (၄၀၀၀) အထိ စုဆောင်းကာ စစ်သင်တန်းပေးနေကြောင်း ဒေသခံများထံမှ သိရသည်။

အခြားတစ်ဘက်တွင်လည်း ‘ဝ’တပ်ဖွဲ့ UWSA မှ စစ်အင်အား (၂) ထောင်ကျော်သည် သံလွင်မြစ်အနောက်ဘက်သို့ ကမ်းကူးကာ စစ်ကောင်စီ၏ သဘောတူညီမှုဖြင့် စစ်ရေးနယ်မြေ မဟုတ်သည့် တန့်ယန်းမြို့နယ်သို့ ဝင်ရောက်လာပြီး ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့တွင်လည်း ယမန်နှစ် ဇူလိုင်လအတွင်း ဝင်ရောက်တပ်စွဲခဲ့သည်။

ထို့အပြင် ထိုင်း-မြန်မာ နယ်စပ်တွင် အခြေစိုက်ထားသည့် UWSA တောင်ပိုင်းစစ်ဒေသ (၁၇၁) သည် ထိုင်းစစ်တပ်နှင့် နယ်နိမိတ်ပြဿနာ ဖြစ်ပေါ်လျက်ရှိရာ နှစ်နိုင်ငံ နယ်ခြားကော်မတီမှတဆင့် ဆွေးနွေးသွားမည်ဖြစ်ကြောင်း စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြောဆိုထားသည်။

ပုံစာ – လူမှုကွန်ယက်ပေါ် ပျံ့နှံ့နေသည့် ရုပ်သံဗွီဒီယိုများထဲမှ UWSA တပ်သားများ ချီတက်သွားလာနေစဉ်