ရပ်စောက်မြို့နယ် ကျောက်ဂူဒေသ စစ်ကောင်စီ ဗုံး(၅၆)လုံး ကြဲချတိုက်ခိုက်မှု ဒေသခံ ထိခိုက်သေဆုံး

သျှမ်းတောင်၊ ရပ်စောက်မြို့နယ်၊ ကျောက်ဂူဒေသကိုယမန်နေ့ (ဇန်နဝါရီလ ၁၆ ရက်) က စစ်ကောင်စီ လေကြောင်းမှ ဗုံး ၅၆ လုံး ကြဲချ တိုက်ခိုက်ခဲ့ရာ ဒေသခံပြည်သူ ၃ ဦး သေဆုံးပြီး ၁၃ ဦး ဒဏ်ရာရရှိခဲ့ကြောင်း ဓနုပြည်သူ့လွတ်မြောက်ရေးတပ်တော် (DPLA) က ယနေ့ (ဇန်နဝါရီလ ၁၇ ရက်) တွင် ထုတ်ပြန်သည်။

ယမန်နေ့ (ဇန်နဝါရီလ ၁၆ ရက်) မွန်းလွဲ ၁၂ နာရီခွဲကျော်မှ ၁ နာရီခွဲ ဝန်းကျင်အထိ စစ်ကောင်စီ Y-12 လေယာဉ်ဖြင့် ဗုံး( ၃၁) လုံး၊ ညနေ ၄ နာရီတွင် ဗုံး (၂၅) လုံး ကြဲချတိုက်ခိုက်ခဲ့ရာ ဒေသခံ အမျိုးသမီး ၂ ဦး၊အမျိုးသား ၁ ဦး သေဆုံးပြီး ကလေး ၁ ဦး အပါအဝင် ၁၃ ဦး ဒဏ်ရာရရှိခဲ့ကြောင်း ဆိုသည်။

ထိခိုက်ဒဏ်ရာရရှိသူများကို ဓနုပြည်သူ့လွတ်မြောက်ရေးတပ်တော် (DPLA) က ဆေးကုသပေးနေကြောင်း ထုတ်ပြန်ချက်တွင် ဖော်ပြသည်။

သို့သော် ဗုံးထိမှန်ခဲ့သည့် ကျေးရွာများနှင့် စစ်မြေပြင် တိုက်ပွဲ အခြေအနေများကိုမူ ဖော်ပြခြင်း မရှိပေ။

လေကြောင်းတိုက်ခိုက်မှုကြောင့် ကျောက်ဂူတွင် နေအိမ် တချို့ ပျက်စီးပြီး ကျောက်မီးခတ်၊ ခဲကြားနှင့် ထမင်းပေါင်း စသည့်ကျေးရွာများ အနီးဗုံးကျရောက် ပေါက်ကွဲသည်ဟု ကြားသိရကြောင်း ဒေသခံ တစ်ဦးက ဆိုသည်။

“ဒီနေ့ သေနတ်သံ နည်းနည်းကြားရတာပဲရှိတယ်။ တိုက်ပွဲ ငြိမ်တယ်” ဟု ယနေ့ အခြေအနေကို ၎င်းကပြောပြသည်။

ပြီးခဲ့သည့် လမှစတင်၍ ကျောက်ဂူဒေသတွင် စစ်ကောင်စီနှင့် ဓနုပြည်သူ့လွတ်မြောက်ရေးတပ်တော် (DPLA) တိုက်ပွဲများ ဆက်တိုက် ဖြစ်ပွားနေရာ ကျောက်ဂူတိုက်နယ် အတွင်း နေထိုင်သည့် ဒေသခံများ ထွက်ပြေးနေရစဥ် ယခုကဲ့သို့ ဗုံးကြဲ တိုက်ခိုက်ခြင်း ဖြစ်သည်။

ကျောက်ဂူဒေသတွင် တိုက်ပွဲများ ပြင်းထန်နေသော်လည်း ဆက်စပ်ဒေသဖြစ်သည့် ရေအားလျှပ်စစ် စက်ရုံ တည်ရှိရာ ကျိုင်းခမ်းဒေသတွင်မူ တိုက်ပွဲ ဖြစ်ပွားမှု မရှိသေးဘဲ တည်ငြိမ်နေကြောင်း တခြား ဒေသခံ တစ်ဦးက ဆိုသည်။

ကျောက်ဂူဒေသတွင် စစ်ကောင်စီ အင်အားဖြည့်တင်းမှုများကြောင့် တိုက်ပွဲများ ဆက်လက် ဖြစ်ပွားနေပြီး စစ်ကောင်စီ လက်နက်ကြီး ပစ်ခတ်မှုကြောင့် အရပ်သား ထိခိုက်မှု ရှိခဲ့ကြောင်း ဓနုတပ် (DPLA) က ယမန်နေ့ (ဇန်နဝါရီလ ၁၆ ရက်) တွင် ထုတ်ပြန်ထားသည်။

ပြီးခဲ့သည့် ဇန်နဝါရီ ၁၄ ရက် နံနက်ပိုင်း ၂ နာရီကြာ တိုက်ပွဲ ဖြစ်ပွားရာ စစ်ကောင်စီတပ် လက်နက်ကြီး ပစ်ခတ်မှုကြောင့် နေအိမ် ၂ လုံး မီးလောင်ပျက်စီးခဲ့ကြောင်း ဇန်နဝါရီ ၁၅ ရက်တွင် စစ်ကောင်စီ လက်နက်ကြီး ပစ်ခတ်၍ ရွာသားတဦး ဒဏ်ရာရရှိခဲ့ကြောင်း ဖော်ပြသည်။

နာမည်ကျော် တိုက်ပွဲ ဖြစ်ပွားနေသည့် နောင်ချိုမြို့နယ်၊ တောင်းခမ်းကျေးရွာနှင့် မိုင် ၃၀ ခန့်သာ ကွာဝေးသည့် ကျောက်ဂူဒေသတွင် စစ်ကောင်စီ စစ်ကြောင်းများကို DPLA က ကြားဖြတ် တိုက်ခိုက်နေရာ တိုက်ပွဲ ြပင်းထန်နေပြီး ဒေသခံများ စစ်ဘေးလွတ်ရာ ထွက်ပြေးနေရခြင်း ဖြစ်သည်။