ဗန်းမော်မြို့ တိုက်ပွဲ ဆက်ဖြစ်၊ မီးဆက်လောင်ပြီး မြို့အကြီးအကျယ် ပျက်စီး

ကချင်ပြည်၊ ဗန်းမော်မြို့ စစ်ကောင်စီနှင့် ကချင်လွတ်လပ်ရေး တပ်မတော်( KIA) ပူးပေါင်းတပ်များ တိုက်ပွဲ ဆက်လက် ဖြစ်ပွားနေပြီး နေအိမ်များ မီးဆက်လက် လောင်ကျွမ်းကာ မြို့အကြီးအကျယ် ပျက်စီးသွားပြီဟု ဒေသတွင်း သတင်းရင်းမြစ်များက ယနေ့ (ဇန်နဝါရီလ ၂၀ ရက်) တွင် ပြောသည်။

ယနေ့ (ဇန်နဝါရီ ၂၀ ရက်) နံနက်ခင်းပိုင်းတွင် ကရင်ကုန်း၊ ပင်စင်ကုန်းနှင့် ရွှေကျီးနားရပ်ကွက် ၀န်းကျင်တွင် တိုက်ပွဲများ ဆက်လက် ဖြစ်ပွားနေပြီး လက်နက်ကြီး၊ လက်နက်ငယ် ပစ်ခတ်မှုများကြောင့် နေအိမ်များ မီးလောင်ပျက်စီးမှုရှိကြောင်း Banmaw Scout Team က ယနေ့ ထုတ်ပြန်သည်။

ယမန်နေ့ (ဇန်နဝါရီလ ၁၉ ရက်) ညပိုင်း စစ်ကောင်စီ လေကြောင်းမှ ၄ ကြိမ် ဗုံးကြဲရာ ဗန်းမော်မြို့ ရွှေကျီးနား ရပ်ကွက် ၀န်းကျင် ကျရောက် ပေါက်ကွဲခဲ့သည်ဟု ထုတ်ပြန်ချက်တွင် ဖော်ပြသည်။

ယနေ့ Banmaw Scout Team က ဖော်ပြသည့် ၂ မိုင် မီးပွိုင့် ရုပ်သံနှင့် ပတ်သက်၍“နန်းသီတာ မိတ်ဆက်လမ်းဆုံ၊ အထည်ဆိုင်တွေ စက်ချုပ်ဆိုင်တွေ ရှိတဲ့နေရာ” ဟု မြို့ခံ တဦးက ပြောသည်။

အဆိုပါ နေရာတွင် လူနေအိမ်နှင့် ဆိုင်ခန်းများစွာရှိခဲ့သည်ဟု ၄င်းက ဆိုပြီး ရုပ်သံတွင်မူ အပျက်အစီးပုံကြီး အဖြစ်သာ မြင်တွေ့နေရသည်။

ပြီးခဲ့သည့် ရက်ပိုင်းက စစ်ကောင်စီ ဝါဒဖြန့် ချယ်နယ်များတွင် ဖော်ပြသည့် KIA တပ်သားများအား ဒရုန်းနှင့် ဗုံးကြဲသည် ဆိုသည့် ရုပ်သံနှင့် ပတ်သက်၍ “ကရင်ကုန်းဘက်၊ ဝင်းမျက်မှန်ဆိုင်နားက ပညာကျော် အဆောင်နား” ဟု မြို့ခံ တဦးက ဆိုသည်။

အဆိုပါ ဒရုန်းနှင့် ဗုံးကြဲမှုကြောင့် ထိခိုက်သေဆုံးမှုကို မသိရသော်လည်း လူနေအိမ်များ ပျက်စီးခဲ့သည်ကိုမူ တွေ့ရသည်။

ထို့အပြင် ပြီးခဲ့သည့် သီတင်းပတ်က ဗန်းမော်မြို့ ကမ်းနားလမ်း ရပ်ကွက်ရှိ နေအိမ်များ မီးအကြီးအကျယ် လောင်ကျွမ်း ပျက်စီးခဲ့သည် ဆိုသည့် သတင်းများနှင့် ပတ်သက်၍ ယင်းသတင်းများ မှန်ကန်ကြောင်း Banmaw Scout Team က အတည်ပြုသည်။

လက်ရှိ KIA ပူးပေါင်းတပ်က ဗန်းမော်မြို့ နေရာအများစုကို ထိန်းချုပ်ထားသော်လည်း စစ်ကောင်စီ အကြွင်းအကျန်များနှင့် မြို့တွင်း တိုက်ပွဲတချို့ ဆက်လက် ဖြစ်ပေါ်နေပြီး စကခ (၂၁) ကို အနီးကပ် ပိတ်ဆို့ တိုက်ခိုက်နေကြောင်း စစ်ရေးသတင်းရင်းမြစ်က ပြောဆိုထားသည်။

တလခွဲကျော် ကြာမြင့်လာသည့် ဗန်းမော် တိုက်ပွဲ အတွင်း ဗုံးကြဲမှု၊ လက်နက်ကြီး ပစ်ခတ်မှုနှင့် မီးရှို့မှုများကြောင့် ယခင်ရက်များ အတွင်းကပင် မြို့ အကြီးအကျယ် ပျက်စီးနေရာ ယခု ထပ်မံ ပျက်စီးနေခြင်း ဖြစ်သည်။

ပြီးခဲ့သည့် ၂၀၂၄ ခုနှစ်၊ ဒီဇင်ဘာ ၄ရက်က စတင်ခဲ့သည့် ထိုးစစ် အတွင်း KIA ဦးဆောင်သည့် တော်လှန်ရေးတပ်များက ဗန်းမော်မြို့နှင့် မံစီမြို့ တို့ကို တပြိုင်နက် ပိတ်ဆို့ တိုက်ခိုက်ခဲ့ရာ မံစီမြို့ကို သိမ်းပိုက်နိုင်ခဲ့ပြီး ဗန်းမော်မြို့ကိုမူ ဆက်လက် တိုက်ခိုက်နေဆဲ ဖြစ်သည်။