Written by 
သျှမ်းပြည်မြောက်ပိုင်း၊ နောင်ချိုမြို့ပေါ် ထွေအုပ်ရုံး၊ ရဲစခန်းအနီးနှင့် ကုန်းကြီးရွာမရွာ တွင် စစ်ကောင်စီက ဗုံး(၃)လုံးကြဲချခဲ့ကြောင်း စုံစမ်းသိရှိရသည်။
ယနေ့ (ဇန်နဝါရီလ ၂၁ )ရက်နေ့လည် ၂ နာရီနှင့် မိနစ် ၄၀ ဝန်းကျင်တွင် စစ်ကောင်စီက လေယာဉ်နှင့် ဗုံးသုံးလုံး ကြဲချ၍ နောင်ချိုမြို့ပေါ် တောင်ရပ်ကွက်ရှိ ရဲစခန်း၊ ထွေအုပ်ရုံးအနီးဖက်တွင် ကျရောက်ပေါက်ကွဲခဲ့ပြီး အသက်(၁၇)နှစ်အရွယ် မိန်းကလေး တစ်ဦးသေဆုံးခဲ့ကြောင်း ဒေသခံများထံမှသိရသည်။
“ဟုတ်တယ်။ဒီနေ့နေ့လည်ပဲ လေယာဉ်နဲ့ လာကြဲသွားတယ်။ကုန်းကြီးရွာမ ဘက်လည်း ဗုံးကျတယ်။ မြို့ပေါ်က ထွေအုပ်ရုံးနားလဲ ကျတယ်။မိန်းကလေးတစ်ယောက်ထိပြီး ဆုံးတယ်။” ဟု ဒေသခံ အမျိုးသားတစ်ဦးက သျှမ်းသံတော်ဆင့် ကို ပြောသည်။
ထို့အပြင် ကုန်းကြီးရွာမဘက်တွင် လူသူမနေသောကြောင့် ထိခိုက်မှုများကို သွားရောက်မကြည့်ရဲကြကြောင်း အဆိုပါ အမျိုးသားတစ်ဦးက ထပ်လောင်း ပြောသည်။
ယခုလက်ရှိနောင်ချို မြို့တွင် စစ်ရေးအရငြိမ်းနေပြီး လက်နက်ကြီးရန်နှင့် လေယာဉ်ကြဲမည့်ရန်ကို ဒေသခံ စစ်ရှောင်များ ကြောက်လန့်နေကြသည်ဟု စစ်ရှောင်များထံမှ သိရသည်။
အလုပ်သင် သတင်းထောက် နန်းလရောင် ရေးသားသည်။
The post နောင်ချိုမြို့စစ်ကောင်စီ ဗုံး(၃)လုံးကြဲချ၊အမျိုးသမီးတစ်ဦးသေဆုံး appeared first on သျှမ်းသံတော်ဆင့်.