Written by 
ကချင်ပြည်၊ ဗန်းမော်မြို့သိမ်း တိုက်ပွဲ ပြင်းထန်နေပြီး ယမန်နေ့နှင့် ယနေ့ (ဇန်နဝါရီ ၂၄ ရက်) နံနက်ပိုင်းတွင် စစ်ကောင်စီ လေတပ်မှ အပြင်းအထန် ဗုံးကြဲနေသည်ဟု စစ်ရေးသတင်းရင်းမြစ်က ပြောသည်။
ဗန်းမော်မြို့တွင် ယမန်နေ့ (ဇန်နဝါရီလ ၂၃ ရက်) နံနက်ပိုင်းမှစ၍ တိုက်ပွဲများ ပြင်းထန်နေရာ ည ၈ နာရီခန့်တွင် စတင်၍ စစ်ကောင်စီ လေကြောင်းမှ ဗုံးကြဲတိုက်ခိုက်ခဲ့ပြီး ယနေ့ နံနက် ၆ နာရီကျော်မှစ၍ ဆက်တိုက် ဗုံးကြဲ တိုက်ခိုက်နေကြောင်း သတင်းရင်းမြစ်က ဆိုသည်။
“အရင်ရက်က ငြိမ်တယ်။ မနေ့မနက်က တိုက်ပွဲ ပြန်စတယ်။ စစ်တပ်က ဗုံးဆက်တိုက်ကြဲနေတယ်၊ မြို့ထဲ မီးလောင်တာတွေလည်းရှိနေတယ်။ ပူးပေါင်းတပ်ဘက်က အခြေအနေကောင်းတယ်။ စစ်ရေးအရှိန်မြှင့်တာလို့ ပြောလို့ရတယ်” ဟု စစ်ရေးသတင်းရင်းမြစ်က ရှင်းပြသည်။
လက်ရှိ ဗန်းမော်မြို့ပေါ်ကို KIA ပူးပေါင်းတပ် ထိမ်းချုပ်ထားပြီး တိုက်ပွဲသည် စစ်ကောင်စီတပ် စကခ (၂၁) တွင် ဖြစ်ပွားနေသော်လည်း စစ်ကောင်စီဘက်က မြို့ကို ဗုံးကြဲနေခြင်း ဖြစ်သည်။
“ပြီးခဲ့တဲ့ သုံးရက်လောက်က ဒဏ်ရာရ အရာရှိ ၁၅ ယောက်နဲ့ အရာရှိ ၁၀ လောင်း ရဟတ်ယာဥ်နဲ ထုတ်သွားတယ်။ အကြီးပိုင်း တယောက်ပါတယ် ဆိုတာ အတည်ပြုနိုင်ပါတယ်။ သူတို့ (စစ်ကောင်စီ) အခြေအနေ မကောင်းလို့ အကြီးပိုင်းတွင် ရသလောက် ထုတ်နေတာ။ မကြာခင်တော့ဘူး ထင်ပါတယ်” ဟု နောက်ထပ် စစ်ရေးသတင်းရင်းမြစ်က ရှင်းပြသည်။
လက်ရှိ စစ်ရေးအရ ပိတ်မိနေသည့် စစ်ကောင်စီတပ်များ ခွာစစ်ဆင်ရန် အတွက် အကြိုပြင်ဆင်မှု အနေဖြင့် လမ်းကြောင်းရှင်း ဗုံးကြဲနေခြင်း ဖြစ်နိုင်ကြောင်း ၎င်းကသုံးသပ်သည်။
အပျက်အစီး များပြားနေသည့် ဗန်းမော်မြို့ ယခု ဗုံးကြဲမှုကြောင့် မည်သည့်နေရာများ ထိခိုက်ပျက်စီးသည်ကိုမူ မသိရသေးပေ။
ပြီးခဲ့သည့် ဇန်နဝါရီ ၂၀ ရက်နေ့က ဗန်းမော်မြို့ကို စစ်ကောင်စီ ဗုံးအလုံး ၄၀ ခန့် ဗုံးကြဲ တိုက်ခိုက်ခဲ့ပြီး ဇန်ဝါရီ ၂၁ ရက်နေ့က ဗုံး ၄ လုံးကြဲချ တိုက်ခိုက်ခဲ့သေးသည်။
ဗန်းမော်နှင့် မံစီမြို့ကို KIA ပူးပေါင်းတပ် ပြီးခဲ့သည့် ဒီဇင်ဘာလ ၄ ရက်နေ့ကစ၍ တပြိုင်ထဲ တိုက်ခိုက်ခဲ့ရာ ဇန်နဝါရီလ ၈ ရက် နေ့တွင် မံစီမြို့ကို အပြီးသတ် သိမ်းပိုက်နိုင်ခဲ့ပြီး လက်ရှိ ဗန်းမော်မြို့ သိမ်းပိုက်နိုင်ရေး ထိုးစစ်ဆင်နေခြင်း ဖြစ်သည်။