Written by 
သျှမ်းပြည် တောင်ပိုင်းတွင် ရောက်ရှိနေသော စစ်ဘေးရှောင်များအတွက် ရေရှားပါးမှု ပြဿနာများ စတင် ကြုံတွေ့လာရကြောင်း သတင်းရရှိသည်။
လက်ရှိတွင် တောင်ပေါ်ဒေသရှိ တွင်းရေကန်ရေများ စတင်ခမ်းခြောက်လာသည့်အတွက် သျှမ်းပြည် တောင်ပိုင်း တောင်ကြီး၊ ညောင်ရွှေ ၊နောင်တရား ၊ ဆီဆိုင် နှင့် ပင်လောင်း စသည့် မြို့နယ်တို့တွင် ရောက်ရှိနေသည့် စစ်ဘေးရှောင်များ ရေရှားပါးမှု ပြဿနာများ စတင်ကြုံတွေ့လာရကြောင်း တောင်ကြီးမြို့ စစ်ဘေးရှောင် ကူညီသူ အမျိုးသမီးတစ်ဦးက သျှမ်းသံတော်ဆင့်ကိုပြောသည်။
“တချို့ နေရာထိုင်ခင်းကျဉ်တဲ့ နေရာတွေ နဲ့ လျှပ်စစ်မီးတွေ သိပ်မရတဲ့နေရာတွေ ဘုန်းကြီးကျောင်းမှာနေတော့ လူများတဲ့ဟာတွေဆိုရင် ရေပြဿနာက စရှိလာတယ်။ အခုကဆောင်လည်း ကုန်ခါနီးပြီဆိုတော့ တချို့နေရာတွေ ကလည်း ရေတွေကခမ်းကုန်ပြီ။”ဟုတောင်ကြီးမြို့ စစ်ဘေးရှောင် ကူညီသူအမျိုးသမီးတစ်ဦးက ပြောသည်။
အလားတူ နောင်တရားမြို့တွင်ကျန်ရှိနေသည့် စစ်ဘေးရှောင် ၃၀၀၀ ကျော်သည် လက်ရှိတွင် ရေမသန့်ရှင်းမှု နှင့် သောက်သုံး ရေပြဿနာများကြုံတွေ့နေရပြီး ချောင်ရေများကို သုံးနေရကြောင်း နောင်တရားမြို့စစ်ဘေးရှောင် ကူညီသူအမျိုးသားတစ်ဦးက ဆက်ဆိုသည်။
“ရေတွေနေနဲ့ ပတ်သတ်ပြီးတော့ အခက်အခဲတွေကဖြစ်နေပြီ။ ချောင်းရေတွေကို သုံးခိုင်းထားရတယ်။ တွင်းရေတွေကလည်း မသန့်တော့ဘူး။ သောက်ရေတွေ အတွက်ကတော့ စစ်ဘေးရှောင်တွေက ကိုယ်နည်း ကိုယ်ဟန်နဲ့ ဝယ်သုံးနေကြရတာ။ ပြီးတော့ ကျနော်တို့ရဲ့ ဒေသကလည်း ရေရှားတဲ့ နေရာဖြစ်တာပေါ့။ အဖွဲ့အစည်းတွေကို ကူညီတွေတော့ တောင်းထားတယ် ဘာမှတော့ပြန်မပြောသေးဘူး။”ဟု ၎င်းက ပြောသည်။
လက်ရှိရေရှားပါမှုကြောင့် စစ်ရှောင်များသည့် ရေမသန့်ရှင်းမှု ပြဿနာများကြုံတွေ့နေရသည့်အတွက် ကလေးငယ်များ အရေပြားရောဂါများ ဖြစ်လာမည်ကိုလည်း စိုးရိမ်းနေကြရကြောင်း ဒေသခံများကပြောသည်။
သောက်ရေသုံးရေများ မသန့်ရှင်းသောရေကို သောက်သုံးခြင်းကြောင့် ဝမ်းပျက်၊ ဝမ်းလျှောရောဂါ၊ အသည်းရောင်အသားဝါ၊ အူရောင်ငန်းဖျား၊ ပိုလီယို၊ အရေးပြားရောဂါများ ဖြစ်တတ်ပြီး အသက်ဆုံးရှုံးသည် အထိ ပြင်းထန်နိုင်ကြောင်း သူနာပြုတစ်ဦးကဆက်ပြောသည်။
သျှမ်းပြည် တောင်ပိုင်း တစ်နှစ်ကျော်ကြာတိုက်ပွဲ ဖြစ်ပွားခြင်းကြောင့် ပင်လောင်း၊ ဆီဆိုင်၊ ညောင်ရွှေ မြို့နယ် တို့တွင် နေရပ်စွန့်ခွာ၍ စစ်ဘေးတိမ်းရှောင်နေသည့် ပြည်သူ (၆၅၀၀၀) နှင့် အထက်ရှိနေဆဲ ဖြစ်ကြောင်း ပအိုဝ်းလူငယ်အစည်းအရုံး(PYO)မှ ယခုနှစ် ဇန်နဝါရီ(၁၅)ရက်တွင် ထုတ်ပြန်ခဲ့သည်။