ကရင်နီသို့ စစ်ကြောင်းထိုးဖောက်နိုင်ရေး စစ်ကောင်စီ ကြိုးပမ်းနေ – သျှမ်းသံတော်ဆင့်

သျှမ်းတောင်မှ ကရင်နီ (ကယား) ပြည်အတွင်းသို့ စစ်ကြောင်းထိုး ဝင်ရောက်နိုင်ရန်အတွက် ပအိုဝ်းပြည်သူ့စစ် (PNO) စစ်အင်အားသုံးပြီး ကြိုးပမ်းနေသည့် စစ်ကောင်စီတပ်သည် နယ်စပ်ဒေသရှိ ကရင်နီတော်လှန်ရေး အင်အားစုတပ်ဖွဲ့များနှင့် ထိတွေ့တိုက်ပွဲဖြစ်ပွားနေလျက်ရှိကြောင်း သိရသည်။

PNO စိုးမိုးထားသည့် ပင်လောင်းမြို့ကို အခြေပြုပြီး စစ်ကောင်စီတပ်သည် ထောက်ပို့လမ်းကြောင်းအရ အရေးပါသော ပင်လောင်း-ဖယ်ခုံ-မိုးဗြဲ-လွိုင်ကော် လမ်းမကြီးကို ပြန်လည်ထိန်း ချုပ်နိုင်ရန် စစ်အင်အား အလုံးအရင်းဖြင့် စစ်ကြောင်းထိုးနေကြောင်း သျှမ်းတော်တပ်ရင်း SSRY ထံမှ သိရသည်။

လက်ရှိတွင် ဖယ်ခုံမြို့မှ မိုးဗြဲမြို့အခြေစိုက် စစ်ကောင်စီ၏ ခြေမြန်တပ်ရင်း (ခမရ-၄၂၂) သို့ အင်အား ၄၀၀ ဝန်းကျင်ဖြင့် စစ်ကောင်စီ အင်အားဖြည့်တင်းထားကြောင်း သျှမ်းတော်တပ်ရင်း SSRY ထံမှ တာဝန်ရှိသူတစ်ဦးက ပြောသည်။

“မိုးဗြဲ ၄၂၂ ကို အင်အား ၄၀၀ ဖြည့်ထားတယ်။ ထီရီးဘက်ကိုလည်း ညောင်ရွှေကနေ စစ်ကား ၄ စီးထပ်ဝင်လာတယ်။ နေရာစုံကနေ စစ်ကြောင်းထိုးနေတာပေါ့” ဟု ၎င်းကပြောသည်။

ဖယ်ခုံမြို့နယ်တွင် ဖယ်ခုံမြို့ အခြေစိုက် စစ်ကောင်စီ၏ ခြေမြန်တပ်ရင်း (ခမရ-၃၃၆) နှင့် (ခမရ-၄၂၁) အပြင် စစ်ကောင်စီ၏ စစ်ဆင်ရေးကွပ်ကွဲမှု ဌာနချုပ်တစ်ခုဖြစ်သော အမှတ် (၇) စစ်ဆင်ရေး ကွပ်ကွဲမှုဌာနချုပ် (စကခ) ရှိထားသည်။

ဖယ်ခုံမြို့သည် စစ်ကောင်စီ၏ ရုံးစိုက်နေပြည်တော်နှင့် ၁၁၄ မိုင်သာ ကွာဝေးသဖြင့် စစ်ရေးအရ အရေးပါသော ဒေသတစ်ခုဖြစ်သည်။

ထို့ပြင် ဖယ်ခုံမြို့နှင့် မိုးဗြဲမြို့တို့သည် ကရင်နီပြည်၏ တံခါးပေါက်အဖြစ် အရေးပါသည်။

တော်လှန်ရေးတပ်များ ထိန်းချုပ်ထားသည့် ကရင်နီ (ကယား) ပြည်မှ ဒေသများကို အထိုင်ပြန်ချနိုင်ရန်အတွက် စစ်ကောင်စီဘက်မှ ၂၀၂၄ နိုဝင်ဘာလဆန်းမှစ၍ ပြန်လည်ထိုးစစ်ဆင်နေရာ တော်လှန်ရေးတပ်များက ခုခံတော်လှန်တိုက်ခိုက်နေသဖြင့် ရှေတိုးမရဖြစ်နေကြောင်း ဆိုသည်။

“အခုဖယ်ခုံက တိုက်ပွဲအခြေအနေအရ တက်လိုက်ဆုတ်လိုက်ပဲ။ စစ်ရေးအခြေအနေအရ အလုံးစုံက ထိန်းချုပ်ဖို့ မဖြစ်နိုင်ဘူး” ဟု သျှမ်းတော်တပ်ရင်း SSRY ထံမှ တာဝန်ရှိသူတစ်ဦးကပြောသည်။

ထို့ပြင် ဆီဆိုင်မြို့တွင်လည်း စစ်ကောင်စီတပ်နှင့် PNO တိုသည့် ပအိုဝ်းလွတ်မြောက်ရေး တပ်မတော် PNLA ၊ ကရင်နီအမျိုးသားကာကွယ်ရေးတပ်ဖွဲ့ KNDF နှင့် ထိတွေ့တိုက်ပွဲ ဖြစ်ပွားနေလျက်ရှိကြောင်း သိရသည်။

အဆိုပါ တိုက်ပွဲများသည် ပွင်းလင့်ရာသီမှာ ဆက်တိုက်ဆိုသလို ဖြစ်လာနိုင်မည့် အခြေအနေရှိသောကြောင့် ပြည်သူများအနေဖြင့် သတိထား သွားလာရန်လိုအပ်ကြောင်း ဆိုသည်။

စစ်ကြောင်းထိုးကာလအတွင်း စစ်ကောင်စီတပ်မှ လက်နက်ကြီး ရမ်းသမ်းပစ်ခတ်မှုကြောင့် ဖယ်ခုံမြို့နယ် အရှေ့ဖယ်ခြမ်းရှိ ကျေးရွားများသို့ ကျရောက်ပေါက်ကွဲရာ သီတင်းပတ် ၂ ပတ်အတွင်း ပြည်သူ ၉ ဦး ထိခိုက်ဒဏ်ရာရရှိခဲ့ကြောင်း ကရင်နီ လူ့အခွင့်အရေးအဖွဲ့ (KnHRG)၏ ထုတ်ပြန်ချက် စာရင်းအရ သိရသည်။