မိုင်းဖြတ်မြို့ လျှပ်စစ်မီး ပုံမှန်မရသော်လည်း မီတာခ တိုးကောက်နေ

သျှမ်းပြည်အရှေ့ပိုင်း မိုင်းဖြတ်မြို့တွင် လျှပ်စစ်မီးပုံမှန်မရသော်လည်း မီတာခ ကို တိုးကောက်နေကြောင်း စုံစမ်းသိရသည်။

ပြီးခဲ့သည့် ဒီဇင်ဘာ ဒုတိယပတ် မှစတင်ပြီး မိုင်းဖြတ်မြို့တွင် စစ်ကောင်စီလက်အောက်ခံ လျှပ်စစ်စွမ်းအားဝန်းကြီးဌာန မှ လျှပ်စစ်မီတာကို ယခင်တွင် တစ်ယူနစ် ကျပ်(၂၀၀) မှ လက်ရှိ တစ်ယူနစ်လျှင် ကျပ် (၈၀၀)အထိ တိုးမြှင့်ကောက်ခံနေကြောင်း မိုင်းဆတ်ဒေသခံ အမျိုးသမီးတစ်ဉီးက သျှမ်းသံတော်ဆင့်ကိုပြောသည်။

ထိုကောက်မှုတွင်လည်း စစ်တပ်နှင့်နီးစပ်သူများကို ပုံမှန်သာကောက်ပြီး ဒေသခံများထံသာ တိုးကောက်နေကြောင်း သိရသည်။

“ဒီလမှ မီးပြန်ရတာ ပြီးတော့ ပုံမှန်လည်း မလာဘူး။ မီတာခလည်း တိုးကောက်တယ်။ အရင်ဆို တစ်ယူနစ်ကို ကျပ်(၂၀၀)ပေးရတယ် အခုက တစ်ယူနစ်ကို (၈၀၀)တောင်ကောက်တယ်။ သူတို့ စစ်တပ်နဲ့ နီးစပ်တဲ့ မိသားစုတွေ ဆွေမျိုးတွေဆို လျော့ပြီးယူတယ်။ အခုဆိုရင် တချို့က မီတာဘောက်လည်း မတပ်ပေးတော့ဘူး”ဟု ၎င်းက ပြောသည်။

မိုးဆတ်မြို့တွင် မီးလာချိန် မတူညီကြောင်းအချို့ရပ်ကွက်တွင် မီးရရှိမှု အပြည့်ရှိသော်လည်း အချို့ရပ်ကွဥ်တွင် ညနေ ၆နာရီမှ ည ၈နာရီထိသာ ရရှိကြောင်း ၎င်းက ထပ်ပြောသည်။

ပြီးခဲ့သည့် ၂၀၂၄ ခုနှစ်တွင် မိုးသန်းထန်စွာ ရွာသွန်းမှုကြောင့် လျှပ်စစ်မီး ပြတ်တောက်သွားသဖြင့် ယခင်နှစ်တွင် လျှပ်စစ်ဝန်ကြီးဌာနနှင့် ဒေသခံများ လျှပ်စစ်မီးပြန်လည် အသုံးချနိုင်ရန် အစည်းဝေးပြုလုပ်ရာတွင် မီးတာခကို ပြန်လည် လျော့ပေးမည်ပြောခဲ့သော်လည်း လက်တွေ့တွင် တိုးကောက်နေသဖြင့် အငြင်းပွားမှုဖြစ်ပွားခဲ့သည်ဟု ဒေသခံ အမျိုးသားတစ်ဦးက ပြောသည်။

“အရင်နှစ်က မိုးအရမ်းကြီးတော့ မီးပြတ်တောက်သွားတယ်။ ဒီနှစ်ထဲမှာ လျှပ်စစ်ဝန်ကြီးနဲ့ မြို့ကလူကြီးတွေ အစည်းဝေးလုပ်တယ် မီတာခ ညှိယူတာ မရတော့ အငြင်းပွားကြတယ်။ အခုဆို အချို့က မီတာမသုံးရတော့ဘူး။ စစ်တပ်က မျက်နှာလိုက်တယ် သူတို့ နဲ့နီးစပ်တဲ့သူကိုပဲ ဦးစားပေးနေတယ်”ဟု ၎င်းက ပြောသည်။

ယခုကဲ့သို့ လျှပ်စစ်မီးအစားထိုး ထင်းနှင့် မီးသွေးကို ပြန်လည်အသုံးပြုလာခြင်းကြောင့် သစ်တောပြုန်းတီးမှု ပိုမိုများပြားလာနိုင်ပြီး သဘာဝဘေးအန္တရာယ်ဖြစ်သည့် ရေကြီး၊ မြေပြို မိုးသည်းထန်စွာ ရွာသွန်းမှု ပိုမိုဖြစ်ပွားလာနိုင်ကြောင်း မိုင်းဆက်ဒေသခံများကပြောသည်။

အလုပ်သင် သတင်းထောက် နန်းဆိုင်ခမ်း ရေးသားသည်။