Written by 
သျှမ်းပြည်တောင်ပိုင်း၊ ရွာငံမြို့ အဝင်အထွက် ဂိတ်များတွင် စစ်ကောင်စီက ခရီးသွားများထံမှ ခြိမ်းခြောက်ငွေတောင်း နေကြောင်း ခရီးသွားပြည်သူများက သျှမ်းသံတော်ဆင့်ကို သတင်းပေးပို့လာသည်။
စစ်ကောင်စီအာဏာသိမ်းပြီးနောက် ရွာငံသို့ ခရီးသွားဝင်ရောက်မှု နည်းပါးခဲ့သော်လည်း ယခုနှစ် ဆောင်းရာသီတွင် ရွာငံသို့ ခရီးသွားဧည့်သည်များ ပိုမိုဝင် ရောက်မှု များပြားလာကြောင်း ဒေသခံများကပြောသည်။
ထိုကဲ့သို့ ခရီးသွားလာသူများကို ရွာငံ အဝင်အထွက် ဂိတ်တွင် စစ်ကောင်စီက စစ်ဆေးမှုများ ပြုလုပ်ပြီး ငွေကြေးအဆမတန် ကောက်ခံနေသည်ဟု ခရီးသွားအမျိုးသားတစ်ဦးက သျှမ်းသံတော်ဆင့်ကို ပြောသည်။
“ယောက်ျားလေးတွေချည်း သွားရင် ပိုရစ်တာ။ နင်က PDFကလား ဘာလားနဲ့ အရမ်းစိတ်ရှုပ်ဖို့ကောင်းတယ်။ သူတို့ကို ပိုက်ဆံပေးမှ လမ်းပေးဖြတ်မယ်ဆိုလို့ ကျနော်တို့ ကျပ်(ငါးသောင်း) ပေးခဲ့ရတယ်။ ဒါတောင် မိန်းကလေးတွေပါလို့ ကျနော်သူငယ်ချင်းဆို တစ်သိန်းပေးခဲ့ရတယ်။” ဟု အဆိုပါ ခရီးသွားအမျိုးသားတစ်ဦးက ပြောသည်။
ထို့အပြင် အိမ်စီးကားနှင့် ဆိုင်ကယ်များဖြင့် ခရီးသွားလာသူများကို ပိုမိုစစ်ဆေးနေပြီး စစ်ကောင်စီတပ်သားများ က ခရီးသွားလာသူများကို စစ်မှုထမ်းရန်အတွက် ပြောဆိုခြင်းများလည်း ရှိသည်ဟု ၎င်းကထပ်လောင်း ပြောသည်။
ခရီးသွားလာမှုများလာသောကြောင့် ဒေသခံများအနေဖြင့် ဒေသထွက် သီးနှံများ ရောင်းချ၍ စားဝတ်နေရေးအတွက် အဆင်ပြေမှုများ ရှိလာကြောင်း ဈေးသည်အမျိုးသမီးတစ်ဦးက ပြောသည်။
“အရင်နှစ်တွေတုန်းကတော့ ဘာမှမရောင်းရဘူး။ ခြံထွက် အသီးလေးတွေ ပိုရောင်းလာရတယ်။ ခရီးသွားများတော့ စားဝတ်နေရေးပြေလည်တာပေါ့။ ဒီရာသီလောက်ပဲ ရောင်းရတာလေ။” ဟု အဆိုပါ ဈေးသည် အမျိုးသမီးက သျှမ်းသံတော်ဆင့်ကို ပြောသည်။
ရွာငံတွင် ဒေသထွက် လိမ္မော်သီး၊ လက်ဖက်နှင့် အခြားသော ကုန်စိမ်း သီးနှံများ အမြောက်အမြားထွက်သည့် ဒေသဖြစ်ပြီး ဒေသခံအများစုသည် စိုက်ပျိုးရေးဖြင့် အသက်မွေးဝမ်းကြောင်း ပြုကြသည်။
ယခုလက်ရှိရွာငံမြို့နယ်တွင် ယခင်နှစ်ထက် ခရီးသွား တစ်ထောင်နီးပါး လာရောက်လည်ပတ်ခဲ့ပြီး အများစုသည် ရန်ကုန်၊မန္တလေးဘက်မှ ပြည်သူများဖြစ်ကြောင်း သိရသည်။
အလုပ်သင်သတင်းထောက် နန်းလရောင် ရေးသားသည်။