မြန်မာ-တရုတ်နယ်စပ် နမ့်ခမ်းမြို့အနီး စစ်ကောင်စီ ဂျက်ဖိုက်တာ ဗုံးကြဲ၊ တရုတ်ဘက် လေကြောင်းသတိပေးဟုဆို

သျှမ်းပြည် နမ့်ခမ်းမြို့အနီး စစ်ကောင်စီတပ်မှ ဂျက်ဖိုက်တာဖြင့် လေကြောင်းဗုံးကြဲခဲ့ပြီး တရုတ်ဘက်မှ လေကြောင်းသတိပေး ပျံသန်းနေကြောင်း စုံစမ်းသိရသည်။

ယနေ့ (အောက်တိုဘာလ ၂၇ ရက်) နံနက် ၇ နာရီခွဲကျော်မှ စတင်ပြီး တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ့်ခမ်းမြို့ပေါ်သို့ စစ်ကောင်စီတပ်မှ ဂျက်ဖိုက်တာဖြင့် ပျံဝဲနေခဲ့ပြီး နံနက် ၈နာရီကျော်တွင် မြို့၏တောင်ဘက်သို့ လေကြောင်းမှ ဗုံး(၂) လုံး ကြဲချတိုက်ခိုက်ခဲ့ကြောင်း ဒေသခံများက ပြောသည်။

“ဒီမနက် ၇ ခွဲလောက် ဂျက်ဖိုက်တာ စလာတယ်။ မြို့ပေါ် (၇) ခါလောက် ပတ်နေပြီးတော့ မန့်ဝိန်းကြီးဘက်ထိ ပျံသွားတယ်။ TNLA တွေကလည်း အောက်ကနေ လက်နက်နဲ့ ပြန်ပစ်တာရှိတယ်။ ၈ နာရီကျော်မှာ မြို့တောင်ဘက်ကို ဗုံးနှစ်လုံး စကြဲတယ်၊ ဘယ်နားကျလဲ သေချာမသိရသေးဘူး”ဟု နမ့်ခမ်းမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် နမ့်ခမ်းမြို့ပေါ်တွင် လေယာဉ်ဆက်လက် ပျံဝဲနေပြီး TNLA သိမ်းပိုက်ထားသည့် စခန်းသစ်ကုန်းအနီးနှင့် မြို့တောင်ဘက် (၁၂) မိုင်ကုန်း၊ ဖာလျန်ကျေးရွာများဘက်တွင် မီးခိုးများ ထွက်ပေါ်လျက်ရှိကြောင်း၊ ထိခိုက်ပျက်စီးမှုကို မသိနိုင်သေးကြောင်း ဒေသခံများက ပြောသည်။

အလားတူ မြန်မာ-တရုတ်နယ်စပ်ရှိ မူဆယ်မြို့တွင်လည်း တရုတ်နိုင်ငံဘက်မှ လေကြောင်းအချက်ပေး ပျံသန်းနေသည်ကို ကြားနေရကြောင်း မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောဆိုသည်။

“တရုတ်ဘက်ခြမ်းက လေယာဉ်သံ ကြားရတယ်။ အသံပဲကြားပြီး လေယာဉ်မမြင်ရဘူး၊ ဘယ်လိုအမျိုးအစားလဲဆိုတာ မပြောတတ်ဘူး။ ဟွေဟုန်းဘက်ကနေ ကြားရတယ်၊ လေယာဉ်အနိမ့်ပျံနေသလို အသံကြားရတယ်၊ လေကြောင်းသတိပေးသံလိုမျိုး”ဟု အသက် (၄၀)ကျော်အရွယ် ၎င်းဒေသခံအမျိုးသားက ပြောသည်။

စစ်ကောင်စီတပ်သည် “၁၀၂၇ စစ်ဆင်ရေး” တစ်နှစ်ပြည့်သည့် ယနေ့တွင် TNLA တပ်ဖွဲ့ ထိန်းချုပ်ထားသည့် နမ့်ခမ်းမြို့အပြင် MNDAA ထိန်းချုပ်ထားသည့် လောက်ကိုင်မြို့ကိုလည်း ဗုံးကြဲတိုက်ခိုက်နေကြောင်း ကနဦး သိရှိရပြီး သျှမ်းသံတော်ဆင့်မှ ဆက်လက်စုံစမ်းနေသည်။

ပြီးခဲ့သည့် စက်တင်ဘာလ ပထမပတ်တွင် နမ့်ခမ်းမြို့ပေါ် လူနေရပ်ကွက်အတွင်း လူအိပ်မောကျချိန်တွင် စစ်ကောင်စီတပ်မှ ဂျက်ဖိုက်တာဖြင့် ဗုံးကြဲတိုက်ခိုက်ခဲ့ခြင်းကြောင့် ကိုယ်ဝန်ဆောင်မိခင်နှင့် ကလေးအပါအဝင် စုစုပေါင်း (၁၁) ဦးထက်မနည်း သေဆုံးပြီး အများအပြား ဒဏ်ရာရရှိခဲ့သည်။