မန္တလေး-PDF ၏ စစ်သုံ့ပန်းအချုပ်ဆောင်ကို စစ်ကောင်စီ လေကြောင်းဗုံးထပ်ကြဲ၊ ဗိုလ်မှူးအပါအဝင် (၄) ဦးသေဆုံး

သျှမ်း-မန္တလေးနယ်စပ် နောင်ချိုမြို့နယ်တွင် စစ်ရှုံးနေသည့် စစ်ကောင်စီတပ်က မန္တလေး-PDF တပ်ဖွဲ့ ဖမ်းဆီးထားသည့် စစ်သုံ့ပန်းများ ချုပ်နှောင်ထားရာ အချုပ်ဆောင်ကို ဒုတိယအကြိမ် လေကြောင်းထပ်မံ ဗုံးကြဲခဲ့ကြောင်း သတင်းသိရသည်။

ယမန်နေ့ (အောက်တိုဘာလ ၃၀ ရက်) နံနက်(၁) နာရီခန့်တွင် သျှမ်း-မန္တလေးနယ်စပ် နောင်ချိုမြို့နယ်အတွင်း မန္တလေး-PDF တပ်ဖွဲ့မှ စစ်သုံ့ပန်းများ ထားရှိရာ အချုပ်ဆောင်နေရာကို စစ်ကောင်စီတပ်မှ လေကြောင်းဖြင့် ထပ်မံတိုက်ခိုက်ခဲ့ခြင်းကြောင့် စစ်သုံ့ပန်း ဗိုလ်မှူးတစ်ဦး အပါအဝင် (၄) ဦး သေဆုံးပြီး ထိခိုက်ဒဏ်ရာ ရရှိသူ (၁) ဦး ရှိခဲ့ကြောင်း မန္တလေး-PDF တပ်ဖွဲ့မှ သတင်းထုတ်ပြန်ထားသည်။

ယခုကဲ့သို့ စစ်သုံ့ပန်းများ ထားရှိသည့် အချုပ်ဆောင်နေရာတွင် နှစ်ကြိမ်တိုင်တိုင် လေကြောင်းဗုံးကြဲ တိုက်ခိုက်ခံရခြင်းနှင့် ပတ်သက်၍ မန္တလေး-PDF ပြောရေးဆိုခွင့်ရှိသူ ကိုအော်စမွန်ထံ သျှမ်းသံတော်ဆင့်မှ ဆက်သွယ်မေးမြန်းထားသော်လည်း ပြန်လည်ဖြေကြားခြင်း မရှိသေးပါ။

အလားတူ အောက်တိုဘာလ (၂၈) ရက်ကလည်း မန္တလေး-PDF တပ်ဖွဲ့မှ စစ်ဆင်ရေးများအတွင်း ဖမ်းဆီးရမိခဲ့သော စစ်သုံ့ပန်းများ ချုပ်နှောင်ထားရာ အချုပ်ဆောင်ကို စစ်ကောင်စီတပ်မှ လေကြောင်းတိုက်ခိုက်မှု (၂) ကြိမ် လုပ်ဆောင်ခဲ့ခြင်းကြောင့် စစ်သုံ့ပန်း (၈) ဦး အပါအဝင် စုစုပေါင်း (၁၂) ဦး သေဆုံးပြီး (၆၀) ဝန်းကျင် ထိခိုက်ဒဏ်ရာရရှိကြောင်း သိရသည်။

ထိခိုက်ဒဏ်ရာရရှိခဲ့သည့် စစ်သုံ့ပန်းများကို မန္တလေး-PDF မှ ဆေးကုသမှုများ လုပ်ဆောင်ပေးလျက်ရှိပြီး မန္တလေး-PDF တပ်ဖွဲ့မှ စစ်ဆင်ရေးအတွင်း ဖမ်းဆီးရမိခဲ့သည့် စစ်သုံ့ပန်းများကို သုံ့ပန်းဥပဒေနှင့်အညီ ကောင်းမွန်စွာ ထိန်းသိမ်းထားရှိကြောင်း အောက်တိုဘာလ (၂၉) ရက် ထုတ်ပြန်ချက်တွင် ဖော်ပြထားသည်။