Written by 
Credit to Popular Journal –
စစ်ကိုင်းတိုင်းဒေသကြီး၊ မုံရွာမြို့၊ အောင်ချမ်းသာရပ်ကွက်ရှိ အောင်ချမ်းသာဈေးမှ ကာလကြာမြင့်နေပြီဖြစ်သည့် သံဖရိမ်ဈေးရုံ၊ သစ်သားဈေးရုံ၊ သားငါးတန်းနှင့် သစ်သီးတန်းဈေးရုံများအား အမြန်ဆုံးပြီးစီးအောင် ပြန်လည်ပြုပြင်တည်ဆောက်လျက်ရှိကြောင်း မုံရွာမြို့နယ်၊ စည်ပင်သာယာရေးအဖွဲ့မှ သိရသည်။
အဆိုပါ ဈေးရှိ ကာလကြာမြင့်ပြီဖြစ်သည့် သံဖရိမ်ဈေးရုံ အလျား (၁၀၂) ပေ၊ အနံ (၅၁) ပေရှိ ဈေးရုံ၊ သစ်သားဈေးရုံ (၆) ရုံ၊ သားငါးတန်း၊ သစ်သီးတန်းဈေးရုံများ ပြန်လည်ပြုပြင်တည်ဆောက်နေခြင်းဖြစ်ကြောင်း သိရသည်။
အဆိုပါ ဈေးရုံပြန်လည်တည်ဆောင်နေမှုအား စစ်ကိုင်းတိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီးအစိုးရအဖွဲ့ဝင်များ၊ တိုင်းဒေသကြီးအဆင့် ဌာနဆိုင်ရာများ၊ မုံရွာခရိုင်/မြို့နယ် စီမံအုပ်ချုပ်ရေးအဖွဲ့ဥက္ကဋ္ဌများနှင့် တာဝန် ရှိသူများမှ ယမန်နေ့ နိုဝင်ဘာ (၂)ရက်က စစ်ဆေးခဲ့ကြောင်း သိရသည်။
ထိုသို့ ကြည့်ရှုစစ်ဆေးရာ မုံရွာမြို့နယ်၊ စည်ပင်သာယာရေးအဖွဲ့ အမှုဆောင်အရာရှိ ဒုတိယညွှန်ကြားရေးမှူး ဦးထွန်းထွန်းက အောင်ချမ်းသာဈေးရှိ ဈေးဆိုင်ခန်းများရောင်းချနေမှု၊ ကာလကြာမြင့်ပြီဖြစ်သည့် ဈေးရုံများ ပြန်လည်ပြုပြင် တည်ဆောက်နေမှု အခြေအနေများ၊ ဈေးအတွင်း ရေစီးရေလာကောင်းမွန်ရေး လုပ်ငန်း ဆောင်ရွက်နေမှုများအား ရှင်းလင်းတင်ပြခဲ့ကြောင်း သိရသည်။
ထိုသို့ ပြုပြင်တည်ဆောက်နေသည့် ဈေးဆိုင်ခန်းများ အမြန် တည်ဆောက်ပြီးစီးရေး၊ ဈေးအတွင်း သန့်ရှင်းသပ်ရပ်မှု ရှိစေရေး၊ ရေစီးရေလာကောင်းမွန်စေရေး၊ ဈေးရုံအဆောက်အဦများအား သတ်မှတ် အရည်အသွေးများနှင့်အညီ ရေရှည်ကြံ့ခိုင်မှုရှိအောင် တည်ဆောက်သွားရန် တိုင်းဒေသကြီးဝန်ကြီးချုပ်က မှာကြားခဲ့သည်။
ထို့ပြင် ဈေးအတွင်း မီးဘေးအန္တရာယ် ကြိုတင်ကာကွယ်ရေးလုပ်ငန်းများ ဆောင်ရွက်သွားရေးတို့အား မှာကြားကာ တည်ဆောက်ရေး လုပ်ငန်းများနှင့်ပတ်သက်၍ ရှင်းလင်းတင်ပြချက်များအပေါ် လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ်ဆောင်ရွက်ပေးခဲ့ကြောင်း သိရသည်။
The post မုံရွာမြို့ အောင်ချမ်းသာဈေးမှ ကာလကြာမြင့်နေပြီဖြစ်သည့် ဈေးရုံများအား အမြန်ဆုံးပြီးစီးအောင် ပြန်လည်ပြုပြင် တည်ဆောက်လျက်ရှိ appeared first on Popular.