Written by 
Credit to Popular Journal –
MNDAA၊ TNLA နှင့် AA အဖွဲ့တို့က ငြိမ်းချမ်းရေးလိုလားကြောင်း ရှင်းလင်းပြတ်သားသည့် လုပ်ဆောင်ချက်ပြသမှသာ ဆွေးနွေးမှုကိုဆောင်ရွက်နိုင်မည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်မှ ပြောသည်။
၎င်းမှ ယနေ့ နိုဝင်ဘာ ၆ ရက် မွန်းလွဲပိုင်းက တရုတ်နိုင်ငံဝန်ကြီးချုပ် H.E. Mr. Li Qiang အား ကူမင်းမြို့ရှိ Haigeng Garden Hotel ၌တွေ့ဆုံစဉ် ပြောကြားခဲ့ခြင်းဖြစ်သည်။
မြန်မာ့တပ်မတော်အနေဖြင့် ၂၀၁၈ ခုနှစ်မှ စတင်ကာ အပစ်အခတ်ရပ်စဲရေးကို တစ်ဖက်သတ်ကြေညာခဲ့ပြီး ငြိမ်းချမ်းရေးကိုအကောင်အထည်ဖော်သည့် ထိုကာလအတွင်း လက်နက်ကိုင်အဖွဲ့များကတိုက်ခိုက်မှသာ တပ်မတော်က တုံ့ပြန်တိုက်ခိုက်ခဲ့သည်ဟု ပြောသည်။
ထိုအဖွဲ့များသည် မြန်မာအစိုးရ၏ ၂၀၂၂ ခုနှစ်၊ ဧပြီလက ငြိမ်းချမ်းရေးကမ်းလှမ်းချက်ကို ငြင်းပယ်ပြီး MNDAA က ၎င်းတို့၏ အထူးဒေသ(၁)ပြန်လည်အသက်သွင်းနိုင်ရန် ရှမ်းပြည်နယ်မြောက်ပိုင်း၊ နယ်စပ်ဒေသရှိ တပ်မတော်လုံခြုံရေးတပ်စခန်းများနှင့် ချင်းရွှေဟော်မြို့တို့ကို ၂၀၂၃ ခုနှစ်၊ အောက်တိုဘာ ၂၇ ရက်၌ အင်အားသုံး၍စတင်တိုက်ခိုက်ခဲ့သည်ဟု ပြောသည်။
” တရုတ်အစိုးရရဲ့ကြားဝင်စေ့စပ်မှုနဲ့ ငြိမ်းချမ်းရေးသဘောတူညီချက်ရရှိခဲ့ပေမယ့် သူတို့အနေနဲ့ အဲဒီ သဘောတူညီချက်ကိုချိုးဖောက်ပြီး မြို့ရွာတွေကို ဆက်လက်တိုက်ပွဲဖော်ဆောင်ခဲ့ပါတယ်။ သူတို့အနေနဲ့ ငြိမ်းချမ်းရေးကို အမှန်တကယ်လိုလားရင် မိမိတို့အနေနဲ့ ငြိမ်းချမ်းရေးတံခါးကို အမြဲဖွင့်ထားပြီး ဆွေးနွေးဖို့အသင့်ရှိပါတယ်” ဟု ဗိုလ်ချုပ်မှူးကြီးမင်းအောင်လှိုင်က ပြောသည်။
ထို့ကြောင့်ပင် လက်နက်ကိုင်အကြမ်းဖက်သမားများအနေဖြင့် ဖြစ်လိုသည်ကိုရှေ့တန်းတင်မည့်အစား ဖြစ်သင့်သည်ကိုလုပ်ဆောင်ရန်လိုကာ MNDAA၊ TNLA နှင့် AA အဖွဲ့တို့အနေဖြင့် ငြိမ်းချမ်းရေးကိုလိုလားကြောင်း ရှင်းလင်းပြတ်သားသည့် လုပ်ဆောင်ချက်ပြသမှသာ မိမိတို့အနေဖြင့်ဆွေးနွေးမှုကိုဆောင်ရွက်နိုင်မည်ဟု ပြောသည်။
ထို့ပြင် နယ်စပ်ဒေသ တည်ငြိမ်အေးချမ်းမှုရှိမှသာ စီးပွားရေး၊ ကုန်သွယ်ရေးဆိုင်ရာ ပူးပေါင်းဆောင်ရွက်မှုများကို မြှင့်တင်နိုင်မည်ဖြစ်၍ နယ်စပ်ဒေသရှိ လက်နက်ကိုင်များ၏ အထောက်အပံ့များဖြစ်သော တရားမဝင်လုပ်ငန်းများ၊ တရားမဝင်ကုန်သွယ်မှုများကို တိုက်ဖျက်ရှင်းလင်းဆောင်ရွက်ရန်လိုအပ်သည်ကိုလည်း ထည့်သွင်းဆွေးနွေးပြောကြားခဲ့ကြောင်း သိရသည်။
The post MNDAA၊ TNLA နှင့် AA အဖွဲ့တို့က ငြိမ်းချမ်းရေးလိုလားကြောင်း ရှင်းလင်းပြတ်သားသည့် လုပ်ဆောင်ချက်ပြသမှသာ ဆွေးနွေးနိုင်မည်ဟု နစက ဥက္ကဋ္ဌပြော appeared first on Popular.