တရုတ်-မြန်မာ နယ်စပ်ရှိ တိုင်းရင်းသား လက်နက်ကိုင်များ အန္တရာယ်များဟု စစ်ခေါင်းဆောင် တရုတ်ကိုတိုင်

မြန်မာ-တရုတ်နယ်စပ် ဒေသ အများစုကို တိုက်ခိုက် သိမ်းပိုက်ထားသည့် တိုင်းရင်းသား လက်နက်ကိုင်များသည် နှစ်နိုင်ငံ နယ်စပ် တည်ငြိမ်ရေး အတွက် အန္တရာယ်များသူများ ဖြစ်ကြောင်း စစ်ခေါင်းဆောင် မင်းအောင်လှိုင် က တရုတ် အစိုးရကို တိုင်တည် ပြောဆိုလိုက်သည်။

တရုတ်နိုင်ငံသို့ ရောက်ရှိနေသည့် စစ်ခေါင်းဆောင် ဗိုလ်ချုပ်မင်းအောင်လှိုင် ယမန်နေ့ (နိုဝင်ဘာလ ၅ ရက်နေ့) က ကူမင်းမြို့၌ ပြုလုပ်သည့် တရုတ်စီးပွားရေးလုပ်ငန်းရှင်များနှင့် တွေ့ဆုံပွဲတွင် အထက်ပါ အတိုင်း တိုင်တော ပြောဆိုလိုက်ခြင်း ဖြစ်သည်။

တရုတ်-မြန်မာ နယ်စပ်ရှိ လက်နက်ကိုင်များ အနေဖြင့် ငြိမ်းချမ်းရေး ကမ်းလှမ်းချက်နှင့် နိုင်ငံရေး တွေ့ဆုံဆွေးနွေး ရန် ဖိတ်ခေါ်မှုများကို မျက်ကွယ်ပြုပြီး နယ်စပ်ဒေသ တည်ငြိမ်အေးချမ်းမှု ပျက်ပြားအောင် လုပ်ဆောင်ခဲ့ကြောင်း။ တရုတ်နိုင်ငံ က မြန်မာနိုင်ငံအပေါ် အထင်အမြင်လွှဲမှားအောင်နည်းမျိုးစုံ ဖြင့်ပြုလုပ်ပြီး နိုင်ငံရေး၊ စစ်ရေး အရ အမြတ်ထွက်အောင် ဆောင်ရွက်ခြင်း၊ နယ်စပ်ဒေသများ တရားမဝင် ကုန်သွယ်နေခြင်းသည် နှစ်နိုင်ငံ အစိုးရနှင့် ပြည်သူများ အကျိုးမရှိဘဲ ဒေသတည်ငြိမ်းရေးအတွက် အန္တရာယ်များကြောင်း၊ တရားမဝင်လုပ်ငန်းများသည် ကူးစက်တတ်သည့် သဘောရှိကြောင်း၊ အတိတ်က နယ်စပ်ဒေသများတွင် မူးယစ်ဆေးဝါးလုပ်ငန်း၊ မှောင်ခိုနှင့် တရားမဝင်လုပ်ငန်းများ လုပ်ပြီး စစ်ဘုရင်ဝါဒ အသက်သွင်းခဲ့သူများဖြစ်ပြီး လက်ရှိ ဒီမိုကရေစီနှင့် လူမျိုးစုအရေးကို အသုံးပြုပြီး စစ်ဘုရင်ဝါဒ ပြန်လည် အသက်သွင်းနေကြောင်း၊ ကျားသေကို အသက်ပြန် မသွင်းမိစေဖို့ ပြောကြားလိုကြောင်း◌၎င်းက ဆိုသည်။

ယင်းကဲ့သို့ တိုင်တည်မှု အပြီး မြန်မာ-တရုတ်နယ်စပ်ဒေသ မူဆယ်မြို့ရှိ ဂျယ်ဂေါင်ဂိတ်မှ ကုန်ပစ္စည်း သယ်ယူ တင်သွင်းမှု တရုတ်ဘက်က အတင်းအကြပ်ကန့်သတ်လိုက်သည်ဟု မူဆယ်မြို့ကုန်သည်တစ်ဦးက ပြောသည်။

“ကုန်ပစ္စည်းတွေကို အတင်းအကြပ်ကန့်သတ်လိုက်တာ။ လူသုံးကုန်ကော၊ စားသုံးကုန်ကောအကုန် ကန့်သတ်လိုက်တာ။ တရုတ်ကနေ ပြန်ထွက်လာမယ့် ကုန်တွေဆိုရင် ပေးမထုတ်ဘူး။ စားဖို့လောက်ပဲ ထုတ်လို့ရတယ်။ ပြောရမယ်ဆိုရင်တော့ တစ်ပိုင်တစ်နိုင်ပေါ့” ဟု ၎င်းကပြောသည်။

“၁၀၂၇ စစ်ဆင်ရေး” ပထမပိုင်းအတွင်း ညီနောင်မဟာမိတ်သုံးဖွဲ့ ထိန်းချုပ်ထားသည့် မြန်မာ-တရုတ်နယ်စပ် မူဆယ် ၁၀၅ မိုင် ကုန်သွယ်ရေးဂိတ် ကျင့်စန်းကျော့၊ ချင်းရွှေဟော်၊ လောက်ကိုင်၊ ကြူကုတ် (ပန်ဆိုင်း)၊ ရန်လုံကျိုင်းနှင့် နမ့်ခမ်းမြို့ရှိ ကုန်သွယ်ရေးဂိတ်တို့ကို ဇူလိုင်လမှစတင်၍ တရုတ်ဘက်မှ ပိတ်ထားသည်။

ထို့အတူ KIA ထိန်းချုပ်မှုအောက်ရှိ လိုင်ဇာ၊ လွယ်ဂျယ်၊ ပါဝန်နှင့် ဖီမော်မြို့နယ် နယ်စပ်ဂိတ်အားလုံးကို အောက်တိုဘာလအတွင်းက တရုတ်ဘက်မှ ပိတ်ထားသည်။

ထို့အပြင် မြန်မာ-တရုတ်နယ်စပ် “ဝ” တပ်ဖွဲ့ UWSA နှင့် မိုင်းလားတပ်ဖွဲ့ NDAA တို့ ထိန်းချုပ်ထားသည့် နယ်စပ်ဂိတ်များတွင် တရုတ်နိုင်ငံဘက်မှ စားနပ်ရိက္ခာနှင့် စက်သုံးဆီများကို သယ်ဆောင်ခွင့်မပြုဘဲ ပန်ဆန်းနှင့် မိုင်းလားနယ်စပ်ဂိတ်ကြီးများကိုပါ အောက်တိုဘာလ နောက်ဆုံးပတ်မှစတင်၍ တရုတ်ဘက်မှ ပိတ်ထားကြောင်း သိရသည်။

စစ်ခေါင်းဆောင် မင်းအောင်လှိုင်သည် မဟာမဲခေါင်နှင့် ဆက်စပ် အစည်းအဝေးများ တက်ရောက်ရန် ယမန်နေ့က တရုတ်နိုင်ငံသို့ ရောက်ရှိနေခြင်း ဖြစ်သည်။