မိုင်းရယ် – လားရှိုးလမ်း စစ်ကောင်စီက ရက်အကန့်အသတ်မရှိပိတ်

သျှမ်းပြည် မိုင်းရယ် – လားရှိုးသွားသည့်လမ်းကို စစ်ကောင်စီက ရက်အကန့်အသတ်မရှိ ပိတ်လိုက်ကြောင်း စုံစမ်းသိရသည်။

ယမန်နေ့ (နိုဝင်ဘာလ ၁၃ ရက် ) နေ့လည် ၂ နာရီမှစ၍ မိုင်ရယ် – လားရှိုးမြို့ သွားသည့် လမ်းပိုင်းရှိ ဟိုယ စစ်ကောင်စီစစ် ဆေးရေး ဂိတ်တွင် ရက်အကန့်အသက်မရှိ ပိတ်ထားကြောင်း အသက် ၄၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို‌ ပြောသည်။

“မနေ့က စပြီးသူတို့ပိတ်လိုက်တာ။ လိုင်းကားတွေကော ကားကြီးတွေကော အကုန်ပေးမသွားတော့ဘူး။ ဟိုယက စစ်ဆေးရေးဂိတ်မှာ ပိတ်လိုက်တာ။ လားရှိုးကနေလာလည်းမရဘူး သွားလို့လည်းမရဘူး။ တိုင်းဗျူဟာမှူးကိုယ်တိုင် လုပ်ခိုင်းတာတာလို့ ပြောတယ်”ဟု ၎င်းကပြောသည်။

ယခုကဲ့သို့ ပိတ်လိုက်သည့်အတွက် ကိုးကန့်တပ်ဖွဲ့ (MNDAA) ထိန်းချုပ်သည့် လားရှိုးဒေသထဲတွင်နေထိုင်သည့် ပြည်သူများအတွက် စားနပ်ရိက္ခာ အခက်အခဲဖြစ်နိုင်ကြောင်း၊ ထို့ပြင် စစ်ကောင်စီက လားရှိုးကို မြေပြင်ထိုးစစ်ဆင်မှု စတင်လာနိုင်ကြောင်း သျှမ်းမြောက် နိုင်ငံရေး တက်ကြွလှုပ်ရှားသည့် လူငယ်တစ်ဉီးက သျှမ်းသံတော်ဆင့်ကိုပြောသည်။

“အခုက စစ်ကောင်စီ လားရှိုးကို ရိက္ခာဖြတ်လိုက်တာ။ လမ်းကြော တခုမဟုတ်တခုတော့ ရှာရမှာပေါ့လေ။ ပြည်သူတွေလည်း ပြေးစရာနေရာမှမရှိတော့တာ။ ပြေးလည်း လုပ်စားလို့မရတော့ စားဝတ်နေရေးက ပိုကြပ်တည်းတာပေါ့” ဟု ၎င်းကပြောသည်။

ထိုပြင် ယမန်နေ့ (နိုဝင်ဘာလ ၁၃ ရက်) ည မိုင်းရယ်မြို့နယ် ဟိုယရွာ အနီးတစ်ဝိုက်တွင် လက်နက်ကြီး ပစ်ခတ်မှုများ ရှိနေကြောင်း ဒေသခံများက ပြောသည်။

လက်ရှိ မိုင်းရယ်မြို့နယ်တွင် ကိုးကန့်တပ်ဖွဲ့ MNDAA၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA ၊တအာင်း(ပလောင်) အမျိုးသား လွတ်မြောက်ရေးတပ်မတော် TNLA နှင့် စစ်ကောင်စီတို့ သွားလာလှုပ်ရှားနေကြောင်း သိရသည်။

နိုဝင်ဘာ ၁၂ရက်တွင်လည်း သျှမ်းတောင်မှ မြောက်ပိုင်းသွားသည့် ရပ်စောက်-ကျောက်ဂူ လမ်းပိုင်း၊ ရပ်စောက်မြို့ အထွက်ရှိ စစ်ကောင်စီ စစ်ဆေးရေးဂိတ်က ပိတ်လိုက်ကြောင်း သိရသည်။