တာချီလိတ်မြို့တွင် ဖုန်းဆိုင် ဓားပြတိုက်ခံရ၊ ဆိုင်ဝန်ထမ်း ၁ ဦးသေဆုံး

ထိုင်း-မြန်မာနယ်စပ် တာချီလိတ်မြို့ရှိ ဖုန်းဆိုင်တစ်ဆိုင်သည် ယနေ့ (နိုဝင်ဘာ ၁၃)ရက် နံနက်ပိုင်းတွင် ဓားပြတိုက်ခံရပြီး ဆိုင်ဝန်ထမ်း အမျိုးသားတစ်ဦး သေဆုံးသွားသည့်အထိ ဖြစ်ပွားခဲ့သည်ဟု စုံစမ်းသိရသည်။

ယနေ့ (နိုဝင်ဘာလ ၁၃ ရက်)နေ့ နံနက်ပိုင်း ၁၀နာရီခွဲဝန်းကျင်တွင် သေနတ်ကိုင်ဆောင်ထားသည့် အမျိုးသား ၄ ဦးသည် ရန်အောင်မြေရပ်ကွက် ပါလျံ(၃)ရှိ First Rate ဖုန်းဆိုင်ကို ဓားပြဝင်တိုက်ခဲ့ပြီး ဆိုင်ဝန်ထမ်း အမျိုးသားတစ်ဦးကို ပစ်သတ်သွားခဲ့သည်ဟု တာချီလိတ်မြို့နယ်ခံ တစ်ဦးက သျှမ်းသံတော်ဆင့်ကို ပြောသည်။

“ပါလျံမီးပွိုင့်မရောက်ထင်နာလေးက First Rate ဖုန်းဆိုင် ဓားပြတိုက်ခံရတယ်။ ဝန်ထမ်းအမျိုးသားတစ်ဦးကို သေနတ်နဲ့ ပစ်သွားတယ်။ အသက် ၂၀ ဝန်းကျင်လောက်ပဲရှိသေးတဲ့ ဝန်ထမ်းက သေဆုံးသွားတယ်။ ရောင်းတဲ့ iPhone လည်း တော်တော်များများပါသွားတယ်။ ဆိုင်ကဆိုင်ကယ်တွေရော ပါသွားတယ်” ဟု ၎င်းက ပြောသည်။

တာချီလိတ်မြို့တွင် ခိုးဆိုးလုယက်မှုနှင့် ဓားပြတိုက်မှုများ နေစဉ်နှင့်အမျှ ဖြစ်ပွားလေ့ရှိသည့် မြို့ဖြစ်သည်။

မြို့နယ်ခရိုင်ရဲတပ်ဖွဲ့များက ဖမ်းဆီးအရေးယူဆောင်ရွက်နိုင်စွမ်း မရှိနေခြင်းကြောင့် ပိုမို အတင့်ရဲ လာကြရခြင်းဖြစ်သည်။

ထို့အပြင် ရေကြီးရေလျှံမှုကြောင့် ဘေးလွှတ်ရာသို့ တိမ်းရှောင်နေစဥ်အချိန်တွင်လည်း အချို့ရပ်ကွက်ရှိ နေအိမ်များ၊ ဆိုင်များ ဖောက်ထွင်းခိုးခံရပြီး၊ တန်ဖိုးကြီးသော ပစ္စည်းများကိုသာ အဓိက ခိုးယူသွားကြောင်း၊ ဆိုင်ကယ်များကိုပါ ခိုးသွားသည်ဟု နေအိမ်ဖောက်ထွင်းခံရသည့် အမျိုးသမီး တစ်ဉီးက ပြောသည်။

“တာချီလိတ်မှာက လူပေါင်းစုံနေတဲ့ မြို့လည်းဖြစ်တယ်။ သူခိုး၊ ဓါးပြအရမ်းပေါတဲ့နေရာလည်းဖြစ်တယ်။ ရဲအရာရှိတပ်ဖွဲ့တွေ အရေးယူဆောင်ရွက်ခြင်း မရှိနေသရွေ့တော့ ဆက်ဖြစ်နေအုန်းမှာပဲ။ လက်ရှိမှာ ကျမတို့ ပြည်သူတွေပဲ ရင်ဆိုင်နေရတယ်။ ရေကြီးတုန်းဆို ကျမအိမ်က အဖိုးတန်ပစ္စည်းတွေ အကုန်လုံးအခိုးခံရတယ်” ဟု ၎င်းက ပြောသည်။

ထိုင်း-မြန်မာနယ်စပ်ဖြစ်သည့် တာချီလိတ်မြို့တွင် မူးယစ်ဆေးဝါးနှင့် ကျားဖြန့်လုပ်ငန်းလုပ် ပိုမိုလုပ်ကိုင်သည့် ဒေသတစ်ခုလည်းဖြစ်သည်။

တာချီလိတ်မြို့သည် ထိုင်း-မြန်မာနယ်စပ် ကုန်သွယ်ရေးမြို့ဖြစ်ပြီး မြန်မာနိုင်ငံတဝှမ်း စစ်အာဏာသိမ်းပြီးနောက် နေရာအနှံ့ တိုက်ပွဲဖြစ်ပွားနေသော်လည်း တာချီလိတ်မြို့တွင် တိုက်ပွဲမဖြစ်ပွားသေးဘဲ ကူးသန်းရောင်းဝယ်ရေး စည်ကားသည့် နေရာဒေသဖြစ်သည်။

အလုပ်သင် သတင်းထောက် နန်းဆိုင်ခမ်း ရေးသားသည်။