ဗဟိုဘဏ်မှ ဒေါ်လာသန်း (၂၀)နှင့် ထိုင်းဘတ်သန်း (၁၀၀) ထပ်မံထုတ်ရောင်း

ဗဟိုဘဏ်မှ နိုဝင်ဘာလ (၁၉)ရက်တွင် ဒေါ်လာသန်း (၂၀) နှင့် ထိုင်းဘတ်သန်း (၁၀၀) ထပ်မံထုတ်ရောင်းပေးထားကြောင်း မြန်မာနိုင်ငံတော်ဗဟိုဘဏ်မှ ထုတ်ပြန်ထားသည့် စာရင်းများအရ သိရသည်။

ဗဟိုဘဏ် အနေဖြင့် ယခု ရောင်းချမှုအပါအဝင် နိုဝင်ဘာလအတွင်း ဒေါ်လာသန်း (၇၀) ကျော်နှင့် ထိုင်းဘတ် (၂၇၁) သန်းကျော်အထိ ထုတ်ရောင်းပေးထားပြီးဖြစ်သည်။

ဗဟိုဘဏ်အနေဖြင့် သီတင်းကျွတ်ကာလပြီးနောက်ပိုင်း စက်သုံးဆီနှင့် အခြားသွင်းကုန်လုပ်ငန်းရှင်များအတွက် နိုင်ငံခြားငွေများကို ဆက်တိုက်ထုတ်ရောင်းပေးလျက်ရှိသည့်အ ပြင် ဩဂုတ်လ (၁) ရက်မှ နိုဝင်ဘာလ (၁၉) ရက်အထိ (၃) လခွဲကျော်တွင် ဒေါ်လာ (၃၁၁) သန်းကျော်၊ ထိုင်းဘတ် (၁ ဒ သမ ၂) ဘီလျံကျော်နှင့် တရုတ်ယွမ် (၅၄)သန်းကျော်အထိ ထုတ်ရောင်းပေးထားသည်။

ထို့ပြင် ယခု ၂၀၂၄ -၂၀၂၅ ဘဏ္ဍာနှစ်၊ ဧပြီလမှ အောက်တိုဘာလအထိ (၇)လအတွင်း စက်သုံးဆီ၊ စားသုံးဆီနှင့် သွင်းကုန်လုပ်ငန်းရှင်များအတွက် ဒေါ်လာတစ်ဘီလျံ ထုတ်ရောင်းပေးထားပြီးဖြစ်ကြောင်း ဗဟိုဘဏ်ထုတ်ပြန်ထားချက်အရ သိရသည်။