Written by 
သျှမ်းပြည် မိုင်းရယ်မြို့နယ်ရှိ စစ်ကောင်စီတပ်ရင်းများကို အခြေပြု၍ ဆုံးရှုံးလိုက်ရသည့် အရှေ့မြောက် တိုင်းစစ်ဌာနချုပ် (ရမခ) ဖွဲ့စည်းပုံ ယန္တရားအတိုင်း အင်အားတိုးချဲ့၍ ပြင်ဆင် စုဖွဲ့နေကြောင်း စုံစမ်းသိရသည်။
ပြီးခဲ့သည့် ဩဂုတ်လ ပထမပတ်အတွင်း လားရှိုးမြို့အခြေစိုက် အရှေ့မြောက် တိုင်းစစ်ဌာနချုပ်ကို ကိုးကန့်တပ်ဖွဲ့ MNDAA က သိမ်းပိုက်လိုက်ပြီးနောက် စစ်ကောင်စီတပ်သည် မိုင်းရယ်မြို့ကို အခြေပြုကာ ရမခ ဖွဲ့စည်းပုံအတိုင်း စက်တင်ဘာလမှ စတင်၍ စစ်အင်အား ပြင်ဆင်စုဖွဲ့နေပြီး လားရှိုးမြို့ကို ပြန်လည်သိမ်းပိုက်နိုင်ပါက အစားထိုးနိုင်ရန် လုပ်ဆောင်လျက်ရှိကြောင်း စစ်ရေးသတင်းရင်းမြစ်တစ်ဦးက ပြောသည်။
“စစ်တပ်ကတော့ တပ်အပြောင်းအရွှေ့လုပ်တာ ပုံမှန်လိုတောင် ဖြစ်နေပြီ။ တောင်ကြီး၊ ခိုလမ်က စုဖွဲ့လာတဲ့ တပ်တွေ မိုင်းရယ်မှာ ဌာနချုပ်ပုံစံ လာလုပ်ထားတယ်။ ကိုးကန့်တပ်နဲ့ ထိတွေ့မှုကတော့ မရှိဘူး၊ တံတားပဲခြားပြီး မျက်နှာချင်းဆိုင် နေရာယူထားတာတော့ ရှိတယ် ခိုနမ့်လောင်း တံတားနားမှာ”ဟု စစ်ရေးသတင်းရင်းမြစ်က သျှမ်းသံတော်ဆင့်ကို ပြောသည်။
ထို့အပြင် ဇန်နဝါရီလဆန်းပိုင်းက ကိုးကန့်တပ်ဖွဲ့ MNDAA သိမ်းပိုက်ခဲ့သည့် လောက်ကိုင်အခြေစိုက် ဒေသကွပ်ကွဲမှု စစ်ဌာနချုပ် (ဒကစ)ကိုလည်း စစ်အင်္ဂါစဉ်အတွင်း ပြန်လည်ထည့်သွင်းပြီး ကွမ်းလုံဗျူဟာနှင့် ကွတ်ခိုင်ဗျူဟာတို့ကို တပ်ရင်းနေရာ မရှိသေးသော်လည်း ဒကစမှူးနှင့် ဗျူဟာမှူးတို့ကို ထပ်မံခန့်အပ်ထားကြောင်း စစ်ရေးသတင်းရင်းမြစ်က ပြောဆိုသည်။
အလားတူ လားရှိုးအခြေစိုက် အရှေ့မြောက်တိုင်း စစ်ဌာနချုပ် (ရမခ) ကို ကိုးကန့်တပ် MNDAA နှင့် ပူးပေါင်းတပ်ဖွဲ့များက သိမ်းယူပြီးနောက် ဩဂုတ်လ နောက်ဆုံးပတ်တွင်လည်း စစ်ခေါင်းဆောင် မင်းအောင်လှိုင်က ရမခ တိုင်းမှူး အသစ် ခန့်ကာ မိုင်းရယ်မြို့တွင် ပြန်လည်စုဖွဲ့မှု စတင်ပြုလုပ်ခဲ့သည်။
ယခုလ နိုဝင်ဘာလဆန်းပိုင်း စစ်ခေါင်းဆောင် မင်းအောင်လှိုင်၏ တရုတ်ခရီးစဉ် အပြီးတွင် စစ်ကောင်စီတပ်မှ ‘ဝ’တပ်ဖွဲ့ UWSA နှင့် သျှမ်းတပ် SSPP/SSA တို့ တပ်စွဲထားသည့် တန့်ယန်းနှင့် မိုင်းရယ်မြို့ဘက်သို့ စစ်ကောင်စီအင်အား (၃၀၀၀) ကျော် ထပ်ဖြည့်လာကြောင်း ဒေသခံများက ပြောသည်။
လက်ရှိ ရမခ လက်အောက်တွင် တန့်ယန်း အခြေချဗျူဟာ၊ မူဆယ်၊ မိုင်းရယ်နှင့် နမ့်လန်မြို့ရှိ တပ်ရင်းတပ်ဖွဲ့များ၊ နောင်ချိုမြို့နယ် တောင်းခမ်းဒေသရှိ အမြောက်တပ်ရင်း အနည်းငယ်သာ ကျန်ရှိတော့ကြောင်း စစ်ရေးသတင်းရင်းမြစ်က ဆိုသည်။