Written by 
ဒီနေ့တော့ နွေရာသီရဲ့ အပူရှိန်ကို အံတုရင်း ငါ့၀မ်းပူဆာ မနေသာဆိုတဲ့အတိုင်း ၀မ်းတထွာလေးကိုဖြည့်ဖို့ အတွက် ချက်ရပြုပ်ရပါအုံးမယ်။
ဒါကြောင့်မို့လို့ အလုပ်ရှုတ်တယ် ထင်ရပေမဲ့ အရမ်းကြိုက်တဲ့ ဗယာကြော်လေး ကြော်စားဖြစ်ပါတယ် ပြင်ရဆင်ရတာ မဆိုသလောက်လေး အလုပ်ပိုပေမဲ့ ကြော်ပြီးတဲ့အခါ စားလို့ကောင်းတော့ အမောလေးတော့ ပြေတာပေါ့နော်။
ကုလားပဲခြမ်း 2 cups လောက်ဆို မိသားစု ၈ယောက်လောက် စားနိူင်ပါတယ် ၄ယောက်စာဆိုရင်တော့ တစ်၀က်နူန်းနဲ့တွက်ပြီး ကြော်နိူင်ပါတယ်။
ခြံထဲဆင်းပြီး ပျဥ်းတော်သိမ်းရွက်လေးခူးကာ ဗယာကြော်ကြော်ဖို့ ပြင်ရင်း မာမာပြင်ဆင်ပြီး ကြော်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ကုလားပဲခြမ်း – 2 cups
- ပျဉ်းတော်သိမ်းရွက် – အခက်ကြီးကြီး ၃ခက်
- ပဲအစိမ်းမှုန့် – ထမင်းစားဇွန်း ၄ဇွန်း အတိ
- ဆန်အစိမ်းမှုန့် – ထမင်းစားဇွန်း ၄ဇွန်း အတိ
- အချိုမှုန့် – လက်ဖက်ရည်ဇွန်း တစ်ဇွန်းမောက်မောက်
- Baking Soda – လက်ဖက်ရည်ဇွန်း တစ်တက်သာသာ
- နနွင်းမှုန့် – လက်ဖက်ရည်ဇွန်း တစ်ဝက်
- ဆား – လက်ဖက်ရည်ဇွန်း တစ်ဇွန်း
- ကြက်သွန်နီ – ထမင်းစားဇွန်း ၁၀ဇွန်းခန့် (လှီးပြီးသား)
- ငရုတ်သီး အခြောက်တောင့် – မိမိနှစ်သက်သလောက်
- ဆီ – လိုသလောက် သုံးပေးပါ
ပြင်ဆင်ပုံ
- ကုလားပဲခြမ်းကို ဇလုံထဲထည့်ပြီး ပဲအထက် ရေလက်ခြောက်လုံးလောက် မြုပ်အောင်ထည့်ပြီး တစ်ညသိပ် ရေစိမ်ထားပါ
- ရေစိမ်ပြီး ပွလာသော ပဲများကို ရေ ၃ထပ်လောက် စင်အောင်ဆေးပြီး ဇကာထဲထည့်ကာ ရေစစ်ထားပါ
- ကြက်သွန်နီကို အခွံခွာပြီး အလုံးလိုက် ရေဆေးကာ အတုံးလေးတွေ ရအောင်လှီးပေးပါ
- ပျဉ်းတော်သိမ်းရွက်ကို ရေဆေးပြီး ခပ်ကြမ်းကြမ်း လှီးထားပါ
- ငရုတ်သီးတောင့်ကို ရေဆေးပြီး ခပ်ပါးပါးလေးတွေ လှီးထားပါ
- ဆား အရသာမှုန့် ပဲအစိမ်းမှုန့်နှင့် ဆန်မှုန့်နှင့် ဆီတို့ကို အဆင်သင့် ပြင်ထားပါ
- ပဲများ ရေစစ်သွားပါက ပဲခြမ်းအနည်းငယ်ကို ဖယ်ထားပါ
- ပြီးတာနဲ့ ကျန်နေသော ပဲခြမ်းများကို အသားငါး ကြိတ်သော ဘလင်ဒါထဲထည့်ကာ မိနစ်၀က် တစ်ခါကြိတ်ပြီး စက်ကိုခနရပ်ကာ ဘေးမှာကပ်နေသော ပဲများ အထဲကို တွန်းချပေးပြီး အထက်ပါ နည်းအတိုင်း ၄ခါလောက် ကြိတ်ပေးပါ
- ကြိတ်ထားသော ပဲခြမ်းများ ခပ်ကြမ်းကြမ်း အနေရပြီဆိုရင် ဇလုံတစ်ခုထဲ ပြောင်းထည့်ပြီး Baking Soda ဖယ်ထားသော ပဲခြမ်းများ ဆား အချိုမှုန့် ဆန်အစိမ်းမှုန့် ပဲအစိမ်းမှုန့် ကြက်သွန်နီ နနွင်းမှုန့် ငရုတ်သီးနှင့် ပျဉ်းတော်သိမ်းရွက်တို့ ထည့်ကာ အားလုံးကို သမအောင် နယ်ပေးပါ
- ပြီးတာနဲ့ အရသာ နယ်ထားသော ပဲများကို ထမင်းစားဇွန်း နှစ်ဇွန်းလောက်ကို အလုံးလေးတွေ ဆုတ်ပေးထားပါ
- အားလုံး အဆင်သင့် ဖြစ်ပြီဆိုရင် ဆီခပ်များများကို ဒယ်အိုးထဲထည့်ပြီး အပူပေးပါ
- ဆီပူ မပူကို ပဲဆုတ် ခပ်သေးသေးလေးဆုတ်ကာ ထည့်ကြည့်ပါ
- ချက်ခြင်းဘဲ ပဲဆုပ်လေး ဆီပေါ်တက်လာပြီဆိုရင် ဆီပူလာပြီမို့လို့ မီးကိုနည်းနည်း ထပ်လျော့ကာ ဗယာကြော် တစ်ခုစာယူပြီး ခပ်ဖွဖွ ဆုပ်ပေးကာ ဆီအိုးထဲကို တစ်ခုခြင်း အိုးဆန့်သလောက် ထည့်ပေးပါ
- ဗယာကြော် ကြော်တဲ့အခါမှာ ဆီပူအိုးထဲကို ပဲဆုတ်လေးများ ကွဲထွက်သွားတတ်တဲ့အတွက် အသာအယာလေး ထည့်ပေးပါ
- တစ်ခုနဲ့တစ်ခု မကပ်အောင် ထည့်ပေးပြီး တစ်ဖက်ကျက်လျှင် တစ်ဖက်ကို လှန်ပေးပါ
- နှစ်ဖက်လုံး ရွှေဝါရောင် သန်းလာတာနဲ့ဆယ်ပြီး ဆီစစ်ပေးကာ ဗယာကြော် မွှေးမွှေးလေးကို စားသုံးရန် ပြင်ပေးနိူင်ပါပြီ။
- ငရုတ်သီးတောင့် အခြောက်ကြော်နှင့် ဗယာကြော်မွှေးမွှေးလေးကို တွဲဖက်ပြီး စားသုံးရန ပြင်ဆင်ပေးနိူင်ပါပြီ။