Written by 
သျှမ်းပြည် တောင်ပိုင်း၊ မိုင်းကိုင်မြို့နယ် ရှမ်းပြည်တိုးတက်ရေးပါတီ-ရှမ်းပြည်တပ်မတော် (SSPP/SSA) တပ်စခန်းငယ် နှစ်ခုကို သျှမ်းပြည်ပြန်လည်ထူထောင်ရေးကောင်စီ-RCSS တပ်ဖွဲ့ အင်အား ၁၀၀ ကျော် စစ် ကြောင်းသုံးကြောင်းခွဲ၍ ဝင်ရောက် တိုက်ခိုက်ခဲ့ကြောင်း SSPP က ယနေ့ (နိုဝင်ဘာလ ၂၅ ရက်) တွင် ထုတ်ပြန်သည်။
ယနေ့ (နိုဝင်ဘာလ ၂၅ ရက်) နံနက် ၅ နာရီခွဲတွင် RCSS စစ်ကြောင်း ၂ ကြောင်း မိုင်းကိုင်မြို့နယ်၊ တုံလောကျေးရွာအုပ်စု၊ ပန်ပွဲ ကျေးရွာအနီး SSPP/SSA တပ်စခန်းငယ် ၂ ခုကို ဝင်ရောက်တိုက်ခိုက်ပြီး တပ်သား ၄ ဦးအား ဖမ်းဆီးသွားကာ ဆိုင်ကယ် ၄ စီး၊ ကားတစ်စီး အပါအဝင် စခန်းကို မီးရှိူ့ဖျက်ဆီးခဲ့ကြောင်းဆိုသည်။
ထို့အပြင် တခြား RCSS စစ်ကြောင်းသည် ပန်ပွဲကျေးရွာ၊ ရွာကော်မတီဝင် တစ်ဉီး၏ နေအိမ်ကို ပစ်ခတ်တိုက်ခိုက်ပြီး နေအိမ်အတွင်းရှိ အဖိုးတန် ရွှေငွေ ပစ္စည်းများ မွှေနှောက် ယူဆောင်ကာ အိမ်ရှင် ဦးကန်ခမ်း အား ပစ်သတ်၍ နေအိမ်ကို မီးရှိူ့ ဖျက်ဆီးခဲ့ကြောင်း ထုတ်ပြန်ချက်တွင် ဖော်ပြသည်။
ထို့နောက် ပန်ပွဲကျေးရွာအတွင်းရှိ SSPP/SSA တပ်ဖွဲ့ဝင် ၄ ဦးနှင့် ဒေသခံတစ်ဦးကို ထပ်မံ ဖမ်းဆီး သွားကြောင်း သိရသည်။
ထို့အပြင် ပန်ပွဲကျေးရွာ အနောက်နေ ဒေါ်ရွှေယိင်း ၏ ကုန်စုံဆိုင်ကို RCSS တပ်ဖွဲ့ဝင်များ ဝင်ရောက်မွှေနှောက် ဖျက်ဆီးပြီး ဆိုင်အတွင်းရှိ စားသောက်ဖွယ်ရာ ကုန်ပစ္စည်းများနှင့် ရွှေငွေများ ယူဆောင်သွားကြောင်း ဖော်ပြသည်။
ယင်းဖြစ်စဥ် အတွင်း RCSS က ပြည်သူ တစ်ဦး အပါအဝင် SSPP/SSA တပ်ဖွဲ့ဝင် ၈ ဦးကို ဖမ်းဆီး သွားကာ ကျေးရွာ ကော်မတီဝင် တစ်ဦးအား ပစ်သတ်၍ နေအိမ် အတွင်းရှိ ပစ္စည်းများ မွှေနှောက် ယူဆောင်ကာ နေအိမ်ကို မီးရှိူ့ဖျက်ဆီးခဲ့ကြောင်းလည်း ရေးသားထားသည်။
တော်လှန်ရေးတွင် ပါဝင်ခြင်း မရှိသော်လည်း မကြာခဏ အချင်းချင်း တိုက်ပွဲဖြစ်ပွားလေ့ရှိသည့် သျှမ်းတော်လှန်ရေးတပ် ၂ ခု၏ ယခုဖြစ်စဥ်နှင့် ပတ်သက်၍ SSPP INFO လူမှုကွန်ရက် စာမျက်နှာမှ ထုတ်ပြန်ရာ လှောင်ပြောင်သည့် မှတ်ချက် ရာနှင့်ချီ၍ တွေ့ရသည်။
ယခုကာလသည် သျှမ်းတပ် ၂ ဖွဲ့ အပစ်ရပ် ပေါင်းစည်းနိုင်ရန် တွေ့ဆုံ ညှိနှိုင်းနေသည့် ကာလ ဖြစ်၍ သျှမ်းတပ် ပေါင်းစည်းရေး ရှေးရှူပြီး SSPP/SSA တပ်ဖွဲ့မှ တိုက်ပွဲ မဖြစ်ပွား စေရန် ထိန်းသိမ်းခဲ့ခြင်းကို RCSS က အခွင့်ကောင်းယူတိုက်ခိုက်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။
အဆိုပါက ကိစ္စနှင့်ပတ်သက်ပြီး SSPP နှင့် RCSS ပြောရေးဆိုခွင့်ကို ဆက်သွယ်မေးမြန်းသော်လည်း ပြန်လည်မဖြေကြားခြင်းမရှိပေ။