Written by 
ရန်ကုန်မြို့ပတ်ရထားလမ်းပိုင်းတွင် ခေတ်မီ Diesel Electric Multiple Unit (DEMU)ရထားတွဲဆိုင်းအသစ်များဖြင့် ယနေ့ နိုဝင်ဘာ ၂၉ ရက်နံနက်ပိုင်းက စတင်ပြေးဆွဲရာ စတင်ပြေးဆွဲခြင်းဖွင့်ပွဲအား မင်္ဂလာတောင်ညွန့်မြို့နယ်ရှိ ရန်ကုန်ဘူတာကြီး၌ကျင်းပခဲ့ပြီး နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်ဖွင့်လှစ်ပေးခဲ့သည်။
ဖွင့်ပွဲအခမ်းအနားတွင် နစက ဥက္ကဋ္ဌက မြန်မာ့မီးရထား သမိုင်းကြောင်းနှင့် ရထားပို့ဆောင်ရေးလုပ်ငန်းသည် မြန်မာ့သယ်ယူပို့ဆောင်ရေး၏ အဓိကအခန်းကဏ္ဍမှပါဝင်ခဲ့သည်များကို ရှင်းလင်းပြောကြားခဲ့သည်။
ထို့ပြင် အစိုးရအနေဖြင့် အခြားနိုင်ငံများနည်းတူ ရထားသယ်ယူပို့ဆောင်ရေး လုပ်ငန်းများ ခေတ်မီတိုးတက်လာစေရေး ကြိုးပမ်းဆောင်ရွက်နေသည်ကိုလည်း ထည့်သွင်းပြောကြားခဲ့သည်။
” လက်ရှိကာလမှာ နိုင်ငံအတွင်း ရထားလမ်းခရီးမိုင် စုစုပေါင်း(၃၈၀၀)ကျော်နဲ့ ဘူတာရုံပေါင်း (၉၆၂)ခုအထိ တည်ဆောက်နိုင်ခဲ့တာကြောင့် အခြေခံလူတန်းစားပြည်သူအများစု နေ့စဉ်နဲ့အမျှ အဓိက အားကိုးအားထားပြုနေရတဲ့ ရထားသယ်ယူပို့ဆောင်ရေးလုပ်ငန်း ဖွံ့ဖြိုးတိုးတက်မှုအတွက် အခြေခံအကျဆုံးနဲ့ အရေးကြီးဆုံး လိုအပ်ချက်ဖြစ်တာကို သုံးသပ်ဖော်ထုတ်နိုင်ခဲ့ပါတယ်” ဟု နစက ဥက္ကဋ္ဌကပြောသည်။
ရထားပို့ဆောင်ရေးစနစ်သည် စရိတ်စက သက်သာစွာဖြင့် ခရီးသည်အများအပြားကို လိုရာခရီးကို ပို့ဆောင်ပေးနိုင်ပြီး ကုန်စည်အမြောက်အများကိုလည်း ရထားလမ်းကွန်ရက်ရှိရာ ဒေသအသီးသီးသို့ ကုန်ကျစရိတ်ကျဉ်းကျဉ်းနှင့် အချိန်တိုအတွင်းပို့ဆောင်ပေးနိုင်ခြင်းသည် ရထားပို့ဆောင်ရေးလုပ်ငန်း၏ ထင်ရှားသည့် အဓိကအားသာချက်များဖြစ်သည်ဟု ပြောသည်။
ထို့ကြောင့် မိဘပြည်သူများအနေဖြင့်လည်း စည်းကမ်းတကျ လိုက်နာစီးနင်းပြီး ရထားလမ်းပိုင်းများနှင့်ဘူတာများ သန့်ရှင်းသပ်ရပ်ရေး ပြည်သူလူထုကပူးပေါင်းပါဝင် ဆောင်ရွက်ကြရန် တိုက်တွန်းလိုကြောင်းနှင့် မြန်မာ့မီးရထားဝန်ထမ်းများ အနေဖြင့်လည်း ပြည်သူကို ကောင်းမွန်သည့်ဝန်ဆောင်မှုများပေးနိုင်ရေး ကိုယ်စွမ်းဉာဏ်စွမ်းရှိသမျှ အစွမ်းကုန် ကြိုးပမ်းစွမ်းဆောင်ပေးကြရန်လည်း မှာကြားခဲ့သည်။
နစက ဥက္ကဋ္ဌမှ ဖွင့်ပွဲအခမ်းအနားပြီးသည့်နောက် တွဲဆိုင်းအသစ်များဖြင့် ပြေးဆွဲသည့် ရန်ကုန်မြို့ပတ်ရထားခရီးစဉ်တို့၌လိုက်ပါမည့် ခရီးသွားပြည်သူများကို နှုတ်ဆက်ခဲ့ပြီး အမှတ်တရ လက်ဆောင်များ ပေးအပ်ခဲ့ကြောင်း သိရသည်။