မြန်မာနိုင်ငံ၏ စွမ်းအင်ကိစ္စများကို စွမ်းအင်ဝန် ကြီးနှင့် ဒူးမားလွှတ်တော် ဒု-ဥက္ကဋ္ဌတို့ဆွေးနွေး

မြန်မာနိုင်ငံရှိ သက်တမ်းရင့်ရေနံမြေများတွင် ခေတ်မီနည်းပညာများအသုံးပြု၍ ရေနံအထွက်တိုးရန် ရုရှားကုမ္ပဏီများနှင့်ပူးပေါင်းဆောင် ရွက်ရန် စွမ်းအင်ဝန်ကြီးဌာန ပြည်ထောင်စုဝန် ကြီးဦးကိုကိုလွင်နှင့် ရုရှားနိုင်ငံ၊ ဒူးမားလွှတ် တော်ဒု-ဥက္ကဋ္ဌ H.E. Mr. Sholban Kara-Ool တို့ဆွေးနွေးခဲ့ကြသည်။

၎င်းတို့နှစ်ဦးသည် ဒီဇင်ဘာ ၄ ရက်နံနက်ပိုင်းက နေပြည်တော်ရှိ စွမ်းအင်ဝန်ကြီးဌာန အစည်းအ ဝေးခန်းမ၌ တွေ့ဆုံခဲ့ကြခြင်းဖြစ်သည်။

တွေ့ဆုံစဥ် မြန်မာနိုင်ငံရှိ သက်တမ်းရင့်ရေနံမြေ များတွင် ခေတ်မီနည်းပညာများအသုံးပြု၍ ရေနံအထွက်တိုးရေးလုပ်ငန်းများကို ရုရှားကုမ္ပဏီများနှင့်ပူးပေါင်းဆောင်ရွက်ရေး၊ မြန်မာနိုင်ငံ၏ ကုန်းတွင်းနှင့် ကမ်းလွန်လုပ်ကွက်များတွင် ရေနံနှင့်သဘာဝဓာတ်ငွေ့ ရှာဖွေတူးဖော်ထုတ်လုပ်ခြင်းလုပ်ငန်းများကို လာရောက်ရင်းနှီးမြှုပ်နှံရေးတို့အား ဆွေးနွေးခဲ့ကြသည်။

ထို့ပြင် ပထဝီနိုင်ငံရေးအရ မြန်မာနိုင်ငံ၏ အ ချက်အချာကျမှုကိုအသုံးချ၍ LNG တင်သွင်းဖြန့်ဖြူးနိုင်မည့်အလားအလာနှင့် လက်ရှိတည် ဆောက်ပြီး ပိုက်လိုင်းကွန်ရက်အားအသုံးပြု၍ LNG ကုန်သွယ်ရေးဆောင်ရွက်နိုင်ရေး၊ ရေနံစိမ်းနှင့်ရေနံထွက်ပစ္စည်းများ တင်သွင်းဖြန့်ဖြူးရေး၊ မြန်မာနိုင်ငံတွင် ရေနံချက်စက်ရုံများနှင့်ဓာတ်မြေဩဇာစက်ရုံများ အသစ်တည်ဆောက်ရေးတို့ကိုလည်း ဆွေးနွေးခဲ့ကြသည်။

ထို့အတူ လက်ရှိစက်ရုံများအဆင့်မြှင့်တင်မွမ်းမံခြင်းလုပ်ငန်းများတွင် ရုရှားကုမ္ပဏီများလာရောက်ရင်းနှီးမြှုပ်နှံနိုင်ရေး၊ နှစ်နိုင်ငံစွမ်းအင်ဆိုင်ရာပူးပေါင်းဆောင်ရွက်မှုများအား ထိရောက်စွာဆောင်ရွက်ရေးနှင့် လူ့စွမ်းအားအရင်း အမြစ်ဖွံ့ဖြိုးတိုးတက်ရေးတို့ကိုလည်း ဆွေးနွေးခဲ့ကြသည်။