လူသားဒိုင်း ဖမ်းဆီးထိန်းသိမ်းခံရသော ဖယ်ခုံမြို့နယ်ရှိ ကျေးရွာတွင်း ကား၊ဆိုင်ကယ်များ ပျောက်ဆုံးနေ

သျှမ်းပြည် ဖယ်ခုံမြို့နယ် ကျေးရွာဒေသခံများကို စစ်ကောင်စီမှ လူသားဒိုင်းကာအဖြစ် ဖမ်းဆီး ထိန်းသိမ်းခဲ့ပြီးနောက် ရွာအတွင်း၌ ပစ္စည်းအပြင် ကား၊ဆိုင်းကယ်များပျောက်ဆုံးနေကြောင်း သတင်းရရှိသည်။

ဖယ်ခုံမြို့နယ် ပူချယ်‌ကျေးရွာနှင့် ကုန်းဆုံကျေးရွာရှိ ဒေသခံ (၂၄၀) ကျော်ကို စစ်ကောင်စီတပ်မှ ပြီးခဲ့သည့် (နိုဝင်ဘာလ ၁၁ ရက်) တွင် လူသားဒိုင်း အဖြစ် မတရားဖမ်းဆီးကာ ပင်လောင်းမြို့ မိုးလုံလေလုံ အားကစားရုံတွင် ထိန်းသိမ်းထားခဲ့သည်။

စစ်ကောင်စီတပ်မှ ဖမ်းဆီးခေါ်ဆောင်လာစဉ်တွင်လည်း အဝတ်နှင့် အိပ်ယာလိပ်များသာ သယ်ဆောင်ခွင့်ပြုပြီး ကား၊ ဆိုင်ကယ်နှင့် စားနပ်ရိက္ခာများကို သယ်ဆောင်ယူလာခွင့် မပြုကြောင်း ဒေသခံများက ပြောသည်။

ပြီးခဲ့သည့် နိုဝင်ဘာလ နောက်ဆုံးပတ်တွင် ၎င်းဖမ်းဆီးခံရသူများသည် နေရပ်ပြန်သွားခဲ့ရာ ကျေးရွာအတွင်း ချန်ထားခဲ့သည့် ပစ္စည်းများနှင့် ကား၊ ဆိုင်ကယ်များ ပျောက်ဆုံးနေပြီး ခိုးယူခံခဲ့ရကြောင်း အသက် (၄၅) နှစ်ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။

“ရွာကနေ ထွက်လာတုန်းက တစ်ရွာလုံး ကားတွေ ဆိုင်ကယ်တွေကို ရွာရဲ့ ဘုန်းကြီးကျောင်းမှာ အကုန်ထားခဲ့ရတာ။ အဲ့တာ ပြန်သွားတော့ ရွာမှာ ကားတွေ ဆိုင်ကယ်တွေက ပျောက်နေတယ်။ ကျန်နေတဲ့ ကားတချို့နဲ့ ထော်လာဂျီတွေက ဆီတွေ အကုန်ထုတ်ခံထားရတာ။ ရွာက လူတွေက ဘယ်သူ့ကို ပြောပြီး ဘာဆက်လုပ်ရမလဲ မသိဘူး”ဟု ၎င်းဒေသခံ အမျိုးသားက ပြောသည်။

ပူချယ်‌ကျေးရွာနှင့် ကုန်းဆုံကျေးရွာအပြင် အနီးအနားရှိ ဟိုဝိုး၊ လင်ခံ၊ နမ့်ဖာမူ၊ ဆောင်လှန် ကျေးရွာတို့တွင်လည်း အိမ်တွင်းပစ္စည်းများ ဖျက်ဆီးခံရခြင်း၊ မီတာဘောက်များ၊ မီးကြိုးများနှင့် တန်ဖိုးရှိသော ပစ္စည်းများ ခိုးယူခံခဲ့ရကြောင်း အသက် (၄၅) ဝန်းကျင် ၎င်းအမျိုးသားက ဆက်ဆိုသည်။

“သူတို့ကားပေါ် တင်လို့ရတဲ့ဟာတွေ အကုန်ယူတယ်ထင်တယ် ကြည့်ရတာ။ မီတာဘောက်၊ မီးကြိုး၊ စောင်၊ အဝတ်၊ စားနပ်ရိက္ခာတွေက အစ အကုန်ပျောက်တယ်။ လင်ခံရွာမှာဆို ဘုန်းကြီးကျောင်းထဲက ပစ္စည်းတွေပါမကျန် ဖျက်ဆီးတယ် တချို့ပစ္စည်းတွေလည်း ယူတယ်။ ပင်လောင်းကနေ ဖယ်ခုံသွားတဲ့ ရွာတွေ တကြောပဲ ပစ္စည်းတွေ ပျောက်တာ”ဟု ၎င်းအမျိုးသားက သျှမ်းသံတော်ဆင့်ကို ပြောသည်။

ထို့အပြင် စစ်ကောင်စီတပ်မှ လူသားဒိုင်းကာအဖြစ် ဖမ်းဆီးထိန်းသိမ်းခဲ့သည့် အမျိုးသားဒေသခံ အချို့ကို စစ်သင်တန်း ပေးကာ ရှေ့တန်းတိုက်ပွဲသို့ စေလွှတ်ခံရကြောင်း ဆွေမျိုးနီးစပ်သူများက ပြောဆိုပြီး သျှမ်းသံတော်ဆင့်မှ အသေးစိတ် ဆက်လက်စုံစမ်းနေသည်။

ပင်လောင်းမြို့နယ်အတွင်းရှိ ကျေးရွာများတွင် စစ်ကောင်စီတပ်၊ စစ်ကောင်စီလက်အောက်ခံ ပအိုဝ်းပြည်သူ့စစ် PNO နှင့် ကရင်နီတော်လှန်ရေး တပ်ပေါင်းစုတို့ တိုက်ပွဲများကြောင့် ဒေသခံများ ထောင်နှင့်ချီတို့သည် ညောင်ရွှေ၊စံကား နှင့် ပင်လောင်းမြို့နယ်အတွင်းရှိ နီးစပ်ရာဆွေမျိုးများသို့ ထွက်ပြေးတိမ်းရှောင်နေရကြောင်း ဒေသခံများထံမှ သိရသည်။