ရုရှား-ဘီလာရုဇ်လုံခြုံရေးအာမခံသဘောတူစာချုပ်ပူတင်အတည်ပြု

မော်စကို၊ဒီဇင်ဘာ ၆

ရုရှားသမ္မတဗလာဒီမာပူတင်သည် ပြည်ထောင်စုနိုင်ငံတော်ဟူသောမူဘောင်အတွင်း ဘီလာရုဇ်နှင့်လုံခြုံရေးအာမခံအတွက် လက်မှတ်ရေးထိုးမည့်အဆိုပြုချက်ကို အတည်ပြုခဲ့ကြောင်း ခရမ်မလင်နန်းတော်ကထုတ်ပြန်ကြေငြာခဲ့သည်။

သမ္မတ၏အမိန့်အရ ရုရှားနိုင်ငံခြားရေးဝန်ကြီးဌာနက သက်ဆိုင်ရာ ဖက်ဒရယ်ပြည်နယ်အဖွဲ့များနှင့်ညှိနှိုင်းဆောင်ရွက်ထားသည့် ရုရှားနှင့်ဘီလာရုဇ်တို့အကြား လုံခြုံရေးအာမခံချက်ဆိုင်ရာ သဘောတူစာချုပ်အားလက်မှတ်ရေးထိုးရန်ခွင့်ပြုပေးခဲ့သည်ဟုသတင်း ထုတ်ပြန်ချက်တွင်ဖော်ပြထားသည်။

အဆိုပါအမိန့်အရ ရုရှားနိုင်ငံခြားရေးဝန်ကြီးဌာနအနေဖြင့် ရှေ့လျှောက်နှစ်ဖက်ညှိနှိုင်းမှုများအတွက် စာချုပ်မူကြမ်းရှိ မလိုအပ်သည့်အချက်များကိုပါ ပြင်ဆင်ခွင့်ပြုထားသည်ဟုလည်းသိရသည်။

ဘီလာရုဇ်သမ္မတ အလက်ဇန်းဒါးလူကာရှန်ကိုက အဆိုပါစာချုပ်မူကြမ်းကို ကြာသပတေးနေ့အစောပိုင်းတွင် အတည်ပြုခဲ့သည်ဟုလည်း BeITA သတင်းဌာနကထုတ်ပြန်ကြေငြာခဲ့သည်။

လာမည့်သောကြာနေ့၌ မင့်စ်ဒေသ၌ ပြည်ထောင်စုနိုင်ငံတော်၏ အဓိပတိကောင်စီအစည်းအဝေးကို ကျင်းပသွားမည်ဖြစ်ပြီး အဆိုပါအစည်းအဝေးအတွင်း ပူတင်နှင့်လူကာရှန်ကိုတို့သည် နှစ်နိုင်ငံပေါင်းစည်းမှု၊အချုပ်အခြာအာဏာ၊လုံခြုံရေးနှင့် စီးပွားရေးဆိုင်ရာလွတ်လပ်မှုများကိုအလေးထား ဆွေးနွေးကာ လက်မှတ်ရေးထိုးနိုင်မည်ဟု မျှော်လင့်ရကြောင်းသိရသည်။

ရုရှားနှင့်ဘီလာရုဇ်တို့ ပြည်ထောင်စုနိုင်ငံတည်ဆောက်ရေးဆိုင်ရာ သဘောတူစာချုပ်ကို ၁၉၉၉ ခုနှစ်တွင် လက်မှတ်ရေးထိုးခဲ့ပြီး လာမည့်အစည်းအဝေးသည် ၎င်းတို့အတွက် ၂၅ နှစ်မြောက်အထိမ်းအမှတ်လည်းဖြစ်ကြောင်းသိရသည်။

Source : ရှင်းဟွာ

Source link