တောင်ကြီး တက္ကသိုလ်အနီးရှိ ဆိုင်ခန်းများဖယ်ရှားခိုင်း – သျှမ်းသံတော်ဆင့်

သျှမ်းပြည်တောင်ပိုင်း၊ တောင်ကြီးမြို့တက္ကသိုလ်အနီးရှိ ဆိုင်ခန်းများကို စစ်ကောင်စီလက်အောက်ခံ လမ်းဉီးစီးဌာနက ဖယ်ရှားခိုင်းနေကြောင်း စုံစမ်းသိရသည်။

တောင်ကြီးမြို့ -ဟမ်းဆီး -နောင်ယာဆိုင်းလမ်းအား ယာဉ်/လမ်း အန္တရာယ် ကင်းရှင်းစေနိုင်ရန်အတွက် လမ်းနယ်နိမိတ်အတွင်း ရေမြောင်းနှင့် လမ်းပုခုံးပေါ်ရှိ ဈေးဆိုင်များအားလုံးကို ဖယ်ရှားပေးရန်နှင့် ဖယ်ရှားခြင်းမရှိပါက လမ်းမကြီးဥပဒေနှင့်အညီ အရေးယူမည်ဟု လမ်းဦးစီးဌနမှ ဒီဇင်ဘာလ (၄)ရက်တွင် ထုတ်ပြန်ကြေညာထားသည်။

“ အဲ့တက္ကသိုလ်အနီးရှိ စျေးဆိုင်တွေက နှစ် (၂၀)ဝန်းကျင်လောက်ရှိပြီး စျေးရောင်းနေတာ။ အဲ့လူတွေ အလုပ်လက်မဲ့ဖြစ်သွားနိုင်တယ်” ဟု တောင်ကြီးမြို့ခံ တစ်ဉီး ကသျှမ်းသံတော်ဆင့်ကိုပြောသည်။

ထိုတက္ကသိုလ်အနီးရှိ ဆိုင်ခန်းများသည် တက္ကသိုလ်တက်ရောက်နေသည့်ကျောင်းသားများ အားထားရသည့် စားသောက်ဆိုင်များဖြစ်ကြောင်း၊ ထိုဆိုင်ခန်းများဖျက်လိုက်ပါက တောင်ကြီးမြို့ထဲသို့ဝေးဝေးလံလံ သွားစားသောက်ရမည်ဖြစ်သဖြင့် ခက်ခဲသွားနိုင်ကြောင်း ၎င်း ကဆိုသည်။

ထို့အပြင် တောင်ကြီးမြို့ လမ်းဘေး ဝဲ/ယာ ရှိ နေအိမ်များကို ဆေးသုတ်ထားရန် စစ်ကောင်စီနှင့် စည်ပင်မှ ညွှန်ကြားထားပြီး ဆေးမသုတ်လျှင့် စည်ပင်သာယာရေး ဥပဒေနှင့်အညီ အရေးယူမည်ဟု ပြီးခဲ့သည့် အောက်တိုဘာ နောက်ဆုံးပတ်က အသိပေးထုတ်ပြန်ထားသည်။

“သူတို့က ခရီးသွားရာသီရောက်တော့ တောင်ကြီးက သာယာနေတယ်။အဆင်ပြေပြီး ငြိမ်းချမ်းနေတယ်ဆိုတာ ပြချင်တာဖြစ်မယ်။သူတို့ ကနေအိမ်တွေကို ဆေးသုတ်ထားရမယ်။ မသုတ်ရင် အရေးယူမယ်ပြောတယ်။ တော်တော်များတော့ ဆေးသုတ်ထားကြတာပဲ။” ဟု တောင်ကြီးမြို့ဒေသခံ အမျိုးသမီးတစ်ဦးက ပြောသည်။

ယခုလက်ရှိတောင်ကြီးမြို့ပေါ်တွင် လူဦးရေပိုမို ထူထပ်လာပြီး ခိုးဆိုလုယက်မှုတွေ မကြာခဏ ကြုံတွေ့ရသည်ဟု မြို့ခံများထံမှ သိရသည်။

ပြီးခဲ့သည့် တန်ဆောင်တိုင်ကာလတွင် လူဦးရေ (၁၄၀)ကျော်ကို စစ်တပ်မှ ပေါ်တာဆွဲ ဖမ်းဆီးကာ ရှေ့တန်းစစ်မြေပြင် ပို့ဆောင်ခဲ့ပြီး ယခုချိန်ထိ ညဘက်အချိန်တွင် လမ်းသွားလမ်းလာများကို ပေါ်တာဆွဲ ခေါ်ယူနေသည်ဟု သိရှိရသည်။

အလုပ်သင် သတင်းထောက် နန်းလရောင် ရေးသားသည်။