နားကောင်းမူးတွင် လောင်းကစားဝိုင်းများ စတင်ပြုလုပ်လာ – သျှမ်းသံတော်ဆင့်

သျှမ်းပြည်အရှေ့ပိုင်း မိုင်းတုံမြို့နယ် နားကောင်းမူးဒေသတွင် လောင်းကစားဝိုင်းများ စတင် ပြုလုပ်ပြီး ခိုးဆိုး၊ လုယက်မှုများ ပိုများလာမည်ကို ဒေသခံများ စိုးရိမ်နေကြောင်း စုံစမ်းရသည်။

ဒီဇင်ဘာလ ၈ ရက် ညတွင် စတင်၍ နားကောင်းမူးဒေသ ရပ်ကွက်(၁) ဘုန်းကြီးကျောင်းအနီးတွင် လောင်းကစားပွဲကို ၁၂ ရက်ကြာအထိ ပြုလုပ်မည် သိရသည်။

ထိုလောင်းကစားဝိုင်စတင်ဖွင့်လှစ်ပြီးနောက် ဒေသခံများက ခိုးဆိုးလုယက်မှုများ ထပ်မံဖြစ်ပွားမည်ကို စိုးရိမ်နေသည်ဟု ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

“လောင်းကစားပွဲလုပ်နေကြတယ်။ ရပ်ကွက် (၁)ဘုန်းကြီးကျောင်းအနီးမှာ ၁၂ ရက်လောက်ထိ ကြာမယ်ပြောတယ်။ မူးယစ်ဆေးဝါးတွေ အရမ်းသုံးစွဲကြလို့ သူခိုးတွေ တော်တော်များလာတယ်။အခု လောင်းကစားပါဖွင့်တော့ ခိုးမှုတွေလုယက်မှုတွေက ပိုဆိုးလာမှာပဲ ကြောက်နေရတယ်” ဟု ၎င်းကဆိုသည်။

သျှမ်းပြည် တစ်ဝန်းတွင် လောင်ကစားပွဲဝိုင်းကို နှစ်စဉ်နှင့်အမျှ ထပ်မံတိုးချဲ ဖွင့်လှစ်လာခြင်းကြောင့် လူငယ်အများစုသည် ၎င်းပွဲကိုသာ အာရုံစုစိုက်လာစေပြီး နိုင်ငံရေး စိတ်ဝင်စားမှု လျော့နည်းလာစေရန် ပိုမိုဖွင့်လှစ်လာခြင်းဖြစ်ကြောင်း ဒေသခံ အမျိုးသားတစ်ဦးက ပြောသည်။

လောင်းကစားပွဲများ ဖွင့်လှစ်ပြီးနောက်ပိုင်းတွင် သူခိုး၊ ဓားပြ ၊ ဆေးကြောင်သည့် သူများ ပေါများလာသည့်အပြင် နားကောင်းမူးဒေသသည် လောင်းကစားဒေသတစ်ခု ဖြစ်လာနိုင်သည်ဟု ဒေသခံတစ်ဦးက ခုလို သုံးသပ်ပြောသည်။

“ပြောရမယ်ဆို သျှမ်းပြည်တစ်ဝန်းမှာ လောင်းကစားပွဲတွေ အရမ်းလုပ်လာကြတယ်။ လူငယ်တော်တော်များများလည်း တော်တော်ပျက်စီးလာ တွေ့ရတယ်။ ပညာရေး၊ နိုင်ငံရေးတွေလည်း စိတ်မဝင်စားကြတော့ဘူး။ လောင်းကစားတွေလုပ်မယ် မူးယစ်ဆေးတွေ သုံးမယ် ဒါပဲ တက်လာကြတယ်”ဟု ၎င်းက ပြောသည်။

အာဏာသိမ်းပြီးနောက်ပိုင်း သျှမ်းပြည်အတွင်းမှာ လောင်းကစားရုံများကို ဌာနေပြည်သူ့စစ်၊ စစ်ကောင်စီ အုပ်စုပူးပေါင်းပြီး ကျယ်ကျယ်ပြန့်ပြန့်ဖွင့်လှစ်လာသည်။ ထိုကဲ့သို့ လောင်းကစားရုံများကို နေရာတိုင်း လွတ်လပ်စွာ ဖွင့်လှစ်လာသည့်နောက်ပိုင်း ပြည်သူများ၏ လုံခြုံရေးလည်း ယိုယွင်း ပျက်စီး လာကြောင်းသိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။