Written by 
သျှမ်းပြည် ညောင်ရွှေမြို့နယ်သို့ နှစ်လကျော်ကြာရောက်ရှိနေသည့် စစ်ဘေးရှောင် (၈၀၀)ကျော်သည် အမိုးအကာ၊စောင် နှင့် အနွေးအထည်များ လိုအပ် နေကြောင်း စုံစမ်းသိရသည်။
ညောင်ရွှေမြို့နယ် စမ်းရေကြည်၊ ဟဲဆတ်၊ နားမွန် ရွာတို့တွင် နှစ်လကျော်ကြာ ရောက်ရှိနေသည့် စစ်ဘေးရှောင် ၈၀၀ ကျော်သည် လက်ရှိချိန်ထိ အမိုးအကာ၊စောင် နှင့် အနွေးအထည်များ လိုအပ်နေကြောင်း စစ်ဘေးရှောင် အမျိုးသား တစ်ဦးက သျှမ်းသံတော်ဆင့်ကို ပြောသည်။
“ အရမ်းအေးတဲ့ဒေသဆိုတော့ အခုက မိုးကာနဲ့ တဲထိုးပြီးနေနေတာဆိုတော့ မိုးကာတွေ ဆောင်တွေအရမ်းလိုတယ်။ အေးတာကို ရှိတာလေးနဲ့ အိပ်နေရတုန်းပဲ။ပြန်ရဲတဲ့လူတွေကြတော့ ပစ္စည်းတွေ ယူလာတယ်။တဲထဲမှာတော့ မီးဖိုလေးနဲ့ နေနေရတာ အိပ်တဲ့အချိန်ကြတော့ မိးငြိမ်းရတယ် မီးလောင်မှာလည်း ကြောက်တယ်”ဟု စစ်ဘေးရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုစစ်ဘေးရှောင်များသည် ပင်လောင်းမြို့နယ်တွင် စစ်ကောင်စီ၊ ပအိုဝ်းပြည်သူ့စစ် PNO နှင့် ကရင်နီ တော်လှန် ရေးတပ်ပေါင်းစုတို့ တိုက်ပွဲများကြောင့် ညောင်ရွှေမြို့သို့ ပြီးခဲ့သည့် အောက်တိုဘာလတွင် ထွက်ပြေးတိမ်းရှောင် လာကြသူများဖြစ်သည်။
ထို့ကြောင့် ပင်လောင်းမြို့နယ်မှ နှစ်လကျော်ကြာ ထွက်ပြေးတိမ်းရှောင်လာသော်လည်း မည်သည့်အဖွဲ့အစည်းမှ လာရောက်ကူညီခြင်မရှိသည့်အပြင် အလုပ်အကိုင်ရှားပါးမှုကြောင့် စားနပ်ရိက္ခာအခက်အခဲများလည်း ကြုံတွေ့နေရကြောင်း ၎င်းစစ်ဘေးရှောင်အမျိုးသားက ဆက်ပြောသည်။
“ဒီမှာက အလုပ်လည်းသိပ်မရှိဘူး။ နေရပ်ပြန်ရတော့ စပါးတွေပြန်သိမ်းလာပြီး ရှိတာလေးနဲ့ စားဝတ်နေရေး ကို ဆက်လုပ်နေရတာပေါ့။တချို့က နည်းနည်းလေးအဆင်ပြေသွားပါတယ်။စားသောက်ဖို့ရိက္ခာတွေလိုတဲ့ လူတွေလည်း လိုနေသေးတာပေါ့။”ဟု ၎င်းကပြောသည်။
ပြီးခဲ့သည့် (နိုဝင်ဘာလ တတိယပတ်)တွင်ညောင်ရွှေ မြို့နယ်အထွေထွေအုပ်ချုပ်ရေးမှူးမှ ကျေးရွာ ၊ရပ်ကွက် အုပ်ချုပ်ရေးမှူးများ ခေါ်ယူ၍ ညောင်ရွှေမြို့နယ်ရှိ ဘုန်းကြီးကျောင်းများတွင် တည်းခိုနေသည့် စစ်ရှောင်ပြည်သူများ လာမည့် ၂၀၂၅ ခုနှစ် မတ်လကုန်ပိုင်းတွင် မိမိ နေရပ်သို့ ပြန်နေခိုင်းကြောင်း သိရသည်။