Written by 
ခေတ်သစ်စစ်ပွဲများတွင် အင်အားသာလွန်မှုထက် နည်းပညာသာလွန်မှုကို အထူးအလေးပေးဆောင်ရွက်လာ ကြပြီဖြစ်ကြောင်း စစ်ကောင်စီခေါင်းဆောင် ဗိုလ်ချုပ်မှူးကြီး မင်းအောင်လှိုင်ကပြောသည်။
ယမန်နေ့ (ဒီဇင်ဘာလ ၁၂ ရက်) တွင် ပြင်ဦးလွင်မြို့၌ ကျင်းပပြုလုပ်သော ဗိုလ်လောင်း သင်တန်းအမှတ်စဉ် (၂၆) သင်တန်းဆင်း ဂုဏ်ပြုစစ်ရေးပြအခမ်းအနားတွင် အထက်ပါအတိုင်း စစ်ကောင်စီခေါင်းဆောင် ဗိုလ်ချုပ်မှူးကြီး မင်းအောင်လှိုင်က မိန့်ခွန်းပြောကြားခဲ့သည်။
၎င်းက “ခေတ်သစ်စစ်ပွဲများကို လေ့လာကြည့်ရင် အဆင့်မြင့်နည်းပညာများကို အသုံးပြုပြီး အီးလက်ထရောနစ် စစ်ဆင်ရေးနှင့် သတင်းအချက်အလက် စစ်ဆင်ရေးများကို ထိရောက်စွာ ပုံဖော်တိုက်ခိုက်နေကြသည်ကို တွေ့ရှိရမည်ဖြစ်ကြောင်း” ပြောကြားခဲ့သည်။
ထို့ကြောင့် မျက်မှောက်ခေတ်စစ်ပွဲများတွင် စစ်ဘက်ခေါင်းဆောင်များအနေဖြင့် အင်အားသာလွန်မှုထက် နည်းပညာသာလွန်မှုကို အထူးအလေးပေးဆောင်ရွက်လာကြပြီး ကာကွယ်ရေးဆိုင်ရာ မူဝါဒချမှတ်ရာတွင်လည်း နည်းပညာ၏အခန်းကဏ္ဍသည် အလွန်အရေးပါသည့် အနေအထားကို ရောက်ရှိလာပြီဟု စစ်ကောင်စီခေါင်းဆောင် ဗိုလ်ချုပ်မှူးကြီး မင်းအောင်လှိုင်ကပြောသည်။
ထိုသို့ ပြောင်းလဲတိုးတက်နေသည့် စစ်မှုသိပ္ပံနှင့် နည်းပညာရပ်များကို သိရှိနားလည် အမီလိုက်နိုင်ရန်အတွက် စဉ်ဆက်မပြတ် လေ့လာသုတေသနပြုမှုများ၊ ကျွမ်းကျင်မှုရှိအောင် လေ့ကျင့်ဆောင်ရွက်မှုများ လုပ်ဆောင်သွားကြရမည်ဟု ဆိုသည်။
ထို့အပြင် ဉာဏ်ရည်တု နည်းပညာ (AI) ကိုပိုမိုအသုံးပြုလာကြသဖြင့် သုတေသနပြုမှုနှင့် စမ်းသပ်တီထွင်ထုတ်လုပ်မှုများကို အစဉ်တစိုက် ကြိုးပမ်းလုပ်ဆောင်သွားရန်လိုအပ်ကြောင်း စစ်ကောင်စီ ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ထပ်လောင်းပြောဆိုခဲ့သည်။
ပြီးခဲ့သည့် နိုဝင်ဘာလ ၈ ရက်နေ့တွင်လည်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် တရုတ်နိုင်ငံ၏ နည်းပညာမြို့ဖြစ်သော ချုံချင့်မြို့သို့ သွားရောက်ပြီး ဒရုန်းထုတ်လုပ်ရေး ကုမ္ပဏီကို သွားရောက်ခဲ့သည်။
ယင်းနောက် စစ်ကောင်စီ၏ ကာကွယ်ရေးဝန်ကြီး ဗိုလ်ချုပ်ကြီး တင်အောင်စန်းသည် တရုတ်နိုင်ငံ ပေကျင်းမြို့မှ စက်မှုနည်းပညာဆိုင်ရာ ကုမ္ပဏီက ထုတ်လုပ်သည့် ဒရုန်းနှင့် လေကြောင်း စစ်လက်နက် ပစ္စည်းများကို သွားရောက်လေ့လာပြီး နည်းပညာပူးပေါင်းဆောင်ရွက်နိုင်ရန် ကုမ္ပဏီတာဝန်ရှိသူများနှင့် ဆွေးနွေးခဲ့ကြောင်း စစ်ကောင်စီက စက်တင်ဘာလ ၁၇ ရက်နေ့မှာ ထုတ်ပြန်သည်။
ထိုကုမ္ပဏီတွင်ရှိသည့် မောင်းသူမဲ့လေယာဉ် (ဒရုန်း) ထုတ်လုပ်မှု၊ အီလက်ထရောနစ် စစ်ဆင်ရေးနှင့် လေကြောင်းရန် ကာကွယ်ရေး နည်းပညာဆိုင်ရာ စစ်လက်နက်ပစ္စည်းများ၊ လေကြောင်းနည်း ပညာဆိုင်ရာ ခေတ်မှီထုတ်ကုန်များကို လေ့လာခဲ့ကြောင်း သိရသည်။
“၁၀၂၇ စစ်ဆင်းရေး” ကာလအတွင်း လားရှိုးမြို့ကို လက်လွှတ်ရပြီးသည့်နောက် စစ်ကောင်စီအပေါ် တရုတ်က ပေါ်ပေါ်ထင်ထင် ထောက်ခံလာပြီး စစ်ကောင်စီ ပြုလုပ်မည့် ၂၀၂၅ ရွေးကောက်ပွဲကိုပါ ထောက်ခံကြောင်း တရုတ်ဘက်ကပြောဆိုထားသည်။
The post ခေတ်သစ်စစ်ပွဲများတွင် အင်အားသာလွန်မှုထက် နည်းပညာသာလွန်မှုကို အလေးပေးဆောင်ရွက်လာကြပြီဟု စစ်ခေါင်းဆောင်ပြော appeared first on သျှမ်းသံတော်ဆင့်.