လွိုင်ကော်မြို့တွင် ပစ္စည်းပြန်သယ်သည့် အမျိုးသားတစ်ဦး မိုင်းနင်းမိပြီး သေဆုံး

ကယား( ကရင်နီ)ပြည်နယ် ၊လွိုင်ကော်မြို့ ဒေါဥခူရပ်ကွက်တွင် ပစ္စည်းပြန်သယ်ယူသည့်  အမျိုးသားတစ်ဦး မိုင်းနင်းမိပြီး သေဆုံးသွားကြောင်း မြို့ခံများထံမှ သိရသည်။

ပြီးခဲ့သည့် (ဒီဇင်ဘာလ ၁၂ ရက်)နေ့တွင် စစ်ကောင်စီမှ ဒေါဥခူရပ်ကွက်သို့ ပစ္စည်းပြန်သယ်ခွင့် ပြုသောကြောင့် ဒေသခံများ ပစ္စည်းဝင်ယူကြရာ သက်ကြီး အမျိုးသား တစ်ဦး မိုင်းနင်းမိပြီး သေဆုံးသွားကြောင်း မြို့ခံ အမျိုးသမီး တစ်ဦးက ပြောသည်။

“ဟုတ်တယ်။မနေ့က မိုင်းနင်းမိလို့ အဖိုးကြီး သေသွားတယ်။ ပစ္စည်း ပြန်သယ်ကြတာ မိုင်းနင်းမိတာ။ ဘယ်အဖွဲ့က ထောင်ထားတဲ့ မိုင်းလည်းတော့ မသိဘူး။” ဟု အဆိုပါ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

အဆိုပါ သေဆုံးသွားသွားသည့် ပြည်သူတစ်ဦးသည် လွိုင်ကော်မြို့နှင့်အနီးရှိ ကျေးရွာဘုန်းကြီးကျောင်းတွင် စစ်ရှောင်နေပြီး စားနပ်ရိက္ခာအခက်ခဲ ရှိသည့်အတွက် ၎င်းနေထိုင်ရာ မြို့တွင်း သို့ ပစ္စည်းပြန်ယူစဉ် ယခုကဲ့သို့ မိုင်းနင်းမိပြီး သေဆုံးသွားခြင်းဖြစ်သည်ဟု မြို့ခံအမျိုးသမီးတစ်ဦးက ပြောသည်။

လွိုင်ကော်မြို့တွင် သက်ကြီးပိုင်းအရွယ် မြို့ခံများသာကျန်ရှိပြီး လူငယ်အများစုသည် အခြားမြို့များတွင် အလုပ်လုပ်ကိုင်ရင်း စစ်ရှောင်နေကြရသည်ဟု စစ်ရှောင်အမျိုးသမီး တစ်ဦးက ပြောသည်။

“စစ်ရှောင်ဆိုလည်း အသက်ကြီးပိုင်းပဲကျန်ခဲ့တာ။ အရွယ်ငယ်တဲ့သူက တစ်ခြားနေရာမှာ စစ်ရှောင်ပြီး အလုပ်လုပ်တယ်။ပြီးရင်ကျန်ခဲ့တဲ့ မိဘတွေကို ပြန်ထောက်ပံ့နေကြရတာ။အိမ်ရှိပေမဲ့ အိမ်မှာ နေခွင့်မရဘူး။ ကျမရဲ့ အမေဆို ဘုန်းကြီးကျောင်းမှာ နေနေရတာ။ ကုန်ဈေးနှုန်းနဲ့ စားဖို့အခက်ခဲရှိတယ်။” ဟု ၎င်း စစ်ရှောင်က ပြောသည်။

ထို့အပြင် လွိုင်ကော်မြို့ နမ့်ဘော်ဝမ်ရပ်ကွက်တွင် ယမန်နေ့ (ဒီဇင်ဘာ ၁၂)ရက် ည (၉) နာရီ အပြင်ထွက်သည့် ပြည်သူနှစ်ဦးအား စစ်ကောင်စီမှ စစ်ဆေးမေးမြန်းခြင်းမရှိဘဲ  သေနတ်ဖြင့် ပစ်ခတ်သောကြောင့် ပြည်သူနှစ်ဦး ဒဏ်ရာ ပြင်းထန် ရရှိသွားကြောင်း သတင်းရင်းမြစ်များထံမှ သိရသည်။

ယခုလက်ရှိ လွိုင်ကော်မြို့တွင် စစ်ကောင်စီမှ တပ်စွဲထားပြီး စစ်ရေးအရငြိမ်သက်နေသော်လည်း ကျန်ခဲ့သည့် ပြည်သူများ စားနပ်ရိက္ခာနှင့် အနွေးထည် ၊စောင်များ လိုအပ်နေသည်ဟု စစ်ရှောင်များထံမှ သိရသည်။

အလုပ်သင် သတင်းထောက် နန်းလရောင် ရေးသားသည်။