Written by 
သျှမ်းပြည် အရှေ့ပိုင်း တာချီလိတ်မြို့တွင် ငွေလဲလှယ်လုပ်ငန်း လုပ်ကိုင်သည့် အမျိုးသားတစ်ဦးကို အမည်မသိ လက်နက်ကိုင် လူတစ်စုမှ ပြန်ပေးဆွဲသွားကြောင်း သတင်းရရှိသည်။
ယနေ့ ( ဒီဇင်ဘာလ ၁၃ ရက် ) မနက် ၆ နာရီဝန်းကျင် တာချီလိတ်မြို့ မယ်ခေါင်ရပ်ကွက်၊ အမှတ် ၂ ကမ္ဘောဇဘဏ်အရှေ့တွင် ငွေလဲလှယ်လုပ်ငန်းလုပ်ကိုင်သူ အမျိုးသားတစ်ဦးကို အမည်မသိ လက်နက်ကိုင်အမျိုးသား ၃ ဦးက ပြန်ပေးဆွဲသွားကြောင်း တာချီလိတ်မြို့ဒေသခံ အမျိုးသမီးတစ်ဦး က သျှမ်းသံတော်ဆင့်ကိုပြောသည်။
“အဲ့ ကမ္ဘာဇဘဏ်ရှေ့က ဆိုင်တွေများတယ်။ဒါမဲ့ မနက် ၆ နာရီလောက်ဆိုတော့ ဘယ်သူမှ ဆိုင်သိပ်မ ဖွင့်သေးဘူး။ အဲ့အဖွဲ့က ပြန်ပေးဆွဲခံရတဲ့အမျိုးသားကို ငွေလဲမယ်ပြောပြီး အိမ်ရှေ့မှာစောင့်ခိုင်းတာ ရောက်လာတာနဲ့ ဖမ်းခေါ်သွားတာ။”ဟု တာချီလိတ်မြို့ ဒေသခံအမျိုးသမီးတစ်ဦးက ပြောသည်။
ထိုပြန်ပေးဆွဲသူများသည် Crown ကား စီး၍ မျက်နှာဖုံးစွပ်ထားသည့် လူငယ်များဖြစ်ပြီး သေနက်အရှည်ကို ကိုင်ဆောင်းထားသည်။
စစ်တပ်မှ နိုင်ငံတော် အာဏာသိမ်းယူပြီး နောက်ပိုင်း တာချီလိတ်မြို့အတွင်း ပေါက်ကွဲမှုများ၊ ပစ်ခတ်မှုများ၊ ခိုးယူ လုယက်မှုများ မကြာခဏဖြစ်ပွားလေ့ရှိကြောင်း သိရသည်။
ထို့ပြင် ထိုင်း-မြန်မာနယ်စပ်ဖြစ်သည့် တာချီလိတ်မြို့တွင် မူးယစ်ဆေးဝါးနှင့် ကျားဖြန့်လုပ်ငန်းလုပ် ပိုမိုလုပ်ကိုင်သည့် ဒေသတစ်ခုလည်းဖြစ်ပြီး လူမျိုးပေါင်းစုံမှ အလုပ်လာလုပ်နေကြရပြီး တရားမဝင်ပစ္စည်းများ အလွယ်တကူ ရရှိသည့် ဒေသတစ်ခုဖြစ်သည်။