Written by 
နေပြည်တော် ဒီဇင်ဘာ ၆
နယ်စပ်ရေးရာဝန်ကြီးဌာန၊ ပညာရေးနှင့်လေ့ကျင့်ရေးဦးစီးဌာန ကွပ်ကဲမှုအောက်ရှိ နယ်စပ်ဒေသတိုင်းရင်းသားလူငယ်များ စက်မှုလက်မှုပညာသင်တန်းကျောင်း(အောင်ပန်း)၌ ဟိုတယ်ဝန်ဆောင်မှုဆိုင်ရာသင်တန်း ဆင်းပွဲအခမ်းအနားအား ယနေ့နံနက်ပိုင်းတွင် ကျင်းပခဲ့ရာ ရှမ်းပြည်နယ် အစိုးရအဖွဲ့ ဝန်ကြီးချုပ် ဦးအောင်အောင် တက်ရောက်၍ သင်တန်းဆင်းလက်မှတ်များ ပေးအပ်ချီးမြှင့်ခဲ့ပါသည်။
အဆိုပါ ဟိုတယ်ဝန်ဆောင်မှုဆိုင်ရာသင်တန်း၌ ဧည့်ကြိုသင်တန်းတွင် ၁၀ ဦး၊ အိပ်ခန်းဆောင် သင်တန်းတွင် ၁၀ ဦး၊ အစားအစာနှင့်အဖျော်ယမကာဝန်ဆောင်မှုသင်တန်းတွင် ၁၀ ဦး၊ စုစုပေါင်း ၃၀ ဦး တို့အား နေထိုင်စားသောက်ရေးနှင့် သင်ထောက်ကူပစ္စည်းများ အခမဲ့ထောက်ပံ့၍ ၂၀၂၄ ခုနှစ် ဇွန်လ ၂၄ ရက်နေ့မှ ၂၀၂၄ ဒီဇင်ဘာလ ၆ ရက်နေ့အထိ ရက်သတ္တ ၂၄ ပတ်ကြာ စာတွေ့လက်တွေ့ သင်ကြားပေးခဲ့ပြီး ဘဏ္ဍာနှစ် တစ်နှစ်လျှင် သင်တန်းနှစ်ကြိမ် ဖွင့်လှစ်ပေးလျက်ရှိရာ ယနေ့ထိ သင်တန်းသူ/သား ၁၀၀ ဦး မွေးထုတ်ပေးခဲ့ကာ သင်တန်းဆင်းပြီးသူများကိုလည်း ဟိုတယ်ဇုန်များတွင် အလုပ်ဝင်ရောက် လုပ်ကိုင်နိုင်ရန် သက်ဆိုင်ရာဟိုတယ်များနှင့် ချိတ်ဆက်ပေးခြင်းဖြင့် အလုပ်အကိုင်အခွင့်အလမ်းများ ဖန်တီးပေးနိုင်ခဲ့ကြောင်း သတင်းရရှိပါသည်။