အင်းလေးတောင်သူများ မျိုးစေ့ မဖြစ်ထွန်းမှုကြောင့် အရှုံးပေါ် – သျှမ်းသံတော်ဆင့်

သျှမ်းပြည်တောင်ပိုင်း၊ ညောင်ရွှေမြို့နယ် အင်းလေးဒေသတွင် စိုက်ပျိုးရေးလုပ်ကိုင်သူများ မျိုးစေ့ မဖြစ်ထွန်းမှုကြောင့် အရှုံးပေါ်နေကြောင်း တောင်သူများက ပြောဆိုသည်။

အင်းလေးတောင်သူများသည် ယခင်(၂၀၂၃)ခုနှစ် မှ ငရုပ်ပွစိုက်ပျိုးရာ အမြတ် ကျပ်(သိန်း၅၀) မျှရရှိသော်လည်း ယခုနှစ်များတွင် မျိုးစေ့ မဖြစ်ထွန်းမှုနှင့်အတူ မြေဆီလွှာပျက်စီးမှုကြောင့် အမြတ်မရသည့်အပြင် အရှုံးဖြင့် ရင်ဆိုင်နေရသည်ဟု တောင်သူအမျိုးသမီး တစ်ဉီးက သျှမ်းသံတော်ဆင့်ကို ပြောသည်။

စိုက်ပျိုးမြေများသည် ဓာတ်မြေဩဇာအလွန်ကျွံ သုံးစွဲမှုကြောင့် မြေဆီလွှာပျက်စီးပြီး မျိုးစေ့များ အတုထုတ်လုပ်ရောင်းချလာမှုကြောင့် အပင်မဖြစ်ထွန်းလာတော့ကြောင်း တောင်သူအမျိုးသမီးက ပြောသည်။

“အရင်က ဆို ငရုပ်ပွစိုက်တာ ကျပ်(သိန်း ၅၀) လောက်မြတ်တယ်။ အခုက အပင်မပေါက်တော့ အကုန်ရှုံးသွားတယ်။ အရင်က မြေဩဇာတွေ အများကြီး သုံးထားတော့ မြေကြီးက ပျက်ပြီထင်တယ်။ဒီနှစ်တော့ သဘာဝမြေဩဇာပဲ သုံးထားတာ။ မျိုးစေ့တွေကလည်း အတုထုတ်ထားတဲ့ဟာ ဝယ်မိတော့ အကုန်လုံး ဘာမှ ရစရာမကျန်ခဲ့ဘူး။” ဟု၎င်း အမျိုးသမီးက ပြောသည်။

ထို့အပြင် ငရုပ်ပွမျိုးစေ့ တစ်ထုတ်လျှင် ကျပ် (၂၀၀၀၀ )ပေးဝယ်ရပြီး မြေဩဇာဖိုးအပါအဝင် ယခင်တွင် ကျပ်(သိန်း ၅၀)မျှ ရင်းနှီးထားရပြီး အကုန်ဆုံးရှုံးသွားရကြောင်း ၎င်းအမျိုးသမီးက ထပ်လောင်းပြောသည်။

ငရုပ်ပွ သာမက ခရမ်းချဉ်၊ ဖရုံ နှင့် မုန်ညင်းရွက်များကိုလည်း အင်းလေးဒေတွင် စိုက်ပျိုးကြပြီး ဒေသခံအများစုသည် ကုန်ဈေးနူန်းအခြေအနေကြောင့် မျိုးစေ့များကို ကြုံရာ ဈေးဆိုင်များတွင် ဝယ်ယူစိုက်ပျိုးကြသည်ဟု အသက်(၃၀) ဝန်းကျင် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“မျိုးစေ့တွေကို ကုမ္ပဏီကနေ မဝယ်ကြဘူး။ ဒီတိုင်း တွေ့ရာဆိုင်က မျိုးစေ့ထုတ်တွေ ဝယ်ပြီးစိုက်ကြတာ။ အရင်ကလည်း အဲ့လို ဆိုင်တွေက ဝယ်စိုက်တာ တချို့က ပေါက်တယ်။ အခုတော့ ဘယ်ဆိုင်ဝယ် ဝယ်အပင်မပေါက်ကြတော့ဘူး။ အရင်းတွေလည်းရှုံးထားတော့ နေ့စားပဲ လုပ်ပြီး စားဝတ်နေရေး ဖြေရှင်းနေရတယ်။” ဟု အဆိုပါအမျိုးသားက ပြောသည်။

စိုက်ပျိုးသီးနှံများ အပင်မဖြစ်ထွန်းမှုကြောင့် ကျွန်းမျှော နှင့် မြေဧက (၅၀) ကျော် ပျက်စီးဆုံးရှုံးခဲ့ရသည်ဟု ၎င်းအမျိုးသားက ထပ်လောင်းပြောသည်။

လက်ရှိအင်းလေးဒေသတွင် စိုက်ပျိုးရေး မဖြစ်ထွန်းမှုနှင့်အတူ ငါးဖမ်းလုပ်ငန်းဖြင့် အသက်မွေး ဝမ်းကြောင်း ပြုနေရသူများသည် ပြီးခဲ့သည့် ဇွန်လိုင်လ တွင် ရေကြီးမှုကြောင့် ငါးများရှားပါးသွားပြီး အသက်မွေးဝမ်းကြောင်းအတွက် အဆင်မပြေမှုများဖြင့် ကြုံနေကြရကြောင်း သိရသည်။

အလုပ်သင် သတင်းထောက် နန်းလရောင် ရေးသားသည်။