ခေါင်းစဉ်အမျိုးမျိုးဖြင့် သျှမ်းတောင်မှ ပြည်သူများ အခွန်အခများထည့်နေရ – သျှမ်းသံတော်ဆင့်

သျှမ်းပြည်တောင်ပိုင်းအတွင်းရှိ တောင်ကြီးနှင့် အနီးတဝိုက်မြို့နယ်များအတွင်း မီးမလာသော်လည်း မီတာခများမြင့်တက်လာသည့်အပြင် ပြည်သူများမှာ ခေါင်းစဉ်အမျိုးမျိုးဖြင့် အခွန်ဆောင်နေရကြောင်း ဒေသခံများထံမှ စုံစမ်းသိရှိရသည်။

ပြီးခဲ့သည့် စက်တင်ဘာလ (၁) ရက်နေ့မှ စတင်ပြီး စစ်ကောင်စီ လက်အောက်ခံ လျှပ်စစ်စွမ်းအင်ဝန်ကြီးဌာနမှ မီတာခများအား တစ်ယူနစ် ကျပ်(၃၀)မှ ကျပ်(၅၀) ထိ တိုးမြှင့်ကောက်ခံခဲ့ပြီသော်လည်း လက်ရှိတွင် သတ်မှတ်ထားသည့် နှုန်းထားများထက်ကျော်လွန်၍ ကောက်ခံလာမှုများရှိနေကြောင်းစုံစမ်းသိရှိရသည်။

ထိုသို့ မီတာခများတိုးမြင့်လာခြင်းကြောင့် တနိုင်တပိုင်စီးပွားရေးလုပ်ငန်းများအား ရှေ့ဆက်လုပ်ကိုင်နိုင်ရန် ခက်ခဲသွားကြောင်း ဒေသခံများထံမှသိရသည်။

“ မီတာခက ရှေ့လတွေတုန်းက တစ်လကို ၁ သိန်းကျော်ကနေ ခုနိုဝင်ဘာလအတွက်က ၂ သိန်းခွဲကျော်သွားပြီ၊ ၂ ဆကျော်တောင်ခုန်တက်သွားတယ်၊ မီးကလည်းပုံမှန်မလာတော့ အလုပ်ကမဖြစ်တော့ဘူး။ ဝင်ငွေကလည်း ပုံမှန်မရှိတော့ဘူး အမြတ်မပြောနဲ့ အရင်းတောင်ခက်လာပြီ။ ဒါမယ့် ပေးနေရတဲ့ အခွန်တွေကတော့ မလျော့တဲ့အပြင်တိုးလာသေးတယ်” ဟု ညောင်ရွှေမြို့နယ် စားသောက်ကုန်လုပ်ငန်းလုပ်ကိုင်သည့် အမျိုးသမီးတစ်ဦးက သျှမ်းသံတော်ဆင့်သို့ပြောသည်။

ပြည်သူများမှာ မီတာခအပြင် အခြားကောက်ခံသည့် အခွန်အခများစွာပေးသွင်းနေရသော်လည်း မီးမမှန်ခြင်း ကုန်ဈေးနှုန်းကြီးမြင့်ခြင်းတို့ကြောင့် လုပ်ငန်းများဆက်လက်ရပ်တည်နိုင်ရန် မလွယ်ကူတော့ကြောင်းလည်း သိရသည်။
ထိုသို့ အခွန်အခများစွာပေးသွင်းနေရသည့်အပြင် စစ်မှုထမ်းကြေး ခေါင်းစဉ်တမျိုးထပ်တိုးလာကာ မဖြစ်မနေပေးဆောင်နေရကြရသည်။

“ကျမတို့အိမ်မှာက အကျုံးဝင်တဲ့သူတစ်ယောက်မှ မရှိပေမယ့် ကလေးတွေကို ကူညီပေးဖို့ ထည့်ပေးဆိုပြီး ငါးသောင်းခွဲကောက်သွားတယ်၊ ကောက်တာတွေများလွန်းတော့ မမှတ်မိတော့ဘူး၊ မီတာခကတော့ ပြောမနေနဲ့တော့ မီတာကို လုံးဝလာမဖတ်ပဲကောက်တာ” ဟု တောင်ကြီးမြို့မှ အသက် (၄၀)နှစ်အရွယ် အမျိုးသမီးတစ်ဦးက ပြောသည်။

ပြီးခဲ့သည့်နိုဝင်ဘာလမှ စတင်ပြီး၍လည်း တောင်ကြီးမြို့နယ် မြို့ပေါ်ရပ်ကွက်များရှိ အသက် ၁၈ မှ ၃၅ နှစ်ကြား လူငယ်ရှိသည့် နေအိမ်များကို စစ်ကောင်စီမှ ငွေကျပ် တစ်သိန်းကောက်ခံခဲ့ကာ အချို့ရပ်ကွက်များတွင် ရပ်ကွက်အုပ်ချုပ်ရေးမှူးနှင့် စာရေးတို့ပေါင်းကာ ငွေကျပ် နှစ်သိန်းထိကောက်ခံမှုများရှိခဲ့ပြီး မြို့ခံများမှ မြို့နယ်ထွေအုပ်ထံတိုင်ကြားသော်လည်း အရေးယူဆောင်ရွက်ခြင်းမရှိခဲ့ကြောင်းလည်းသိရသည်။

အလုပ်သင် သတင်းထောက် ယူဂျင်း​ရေးသားသည်။