Written by 
သျှမ်းပြည် လဲချားမြို့နယ် စစ်ကောင်စီမှ ညမထွက်ရ အမိန့်ထုတ်ပြန်ပြီး စစ်ဆေးရေးဂိတ်များတွင် ည (၆) နာရီနောက်ပိုင်း ဖြတ်သန်းသွားလာခွင့်ကို တားမြစ်ကန့်သတ်လိုက်ကြောင်း စုံစမ်းသိရသည်။
ယမန်နေ့ (ဒီဇင်ဘာလ ၁၉ ရက်) ညနေပိုင်းတွင် လဲချားမြို့ရှိ စစ်ကောင်စီလက်အောက်ခံ အုပ်ချုပ်ရေးအဖွဲ့များမှ မြို့ပေါ် ရပ်ကွက်များတွင် ည (၆) နာရီမှ နံနက် (၆) နာရီအတွင်း ညမထွက်ရအမိန့်ကို လော်စပီကာများဖြင့် လိုက်လံဆော်ဩခဲ့ပြီး စစ်ဆေးရေးဂိတ်များတွင် ယင်းအချိန် ဖြတ်သန်းသွားလာသူများ ဖမ်းဆီးခံထားရမည်ဖြစ်ကြောင်း ဒေသခံများက ပြောသည်။
“ရပ်ကွက်လူကြီးတွေဆီ စာရောက်ပြီးမှ လိုက်အော်တာမျိုး ဖြစ်မှာ။ တောင်ယာသွားတဲ့လူတွေ ည ၆ နာရီ မကျော်ခင် ပြန်လာကြဖို့ ဆော်ဩတာ။ တချို့ရပ်ကွက်လည်း မနေ့ညနေက ပြောတယ်၊ တချို့ဘက်လည်း ဒီမနက်မှ ကြားတယ်။ စစ်ဆေးရေးဂိတ်တွေမှာ ည ၆ နာရီကျော်ရင် ပေးမဖြတ်ဘူး၊ လူကို ဖမ်းမယ် ဘယ်သူမှ ထောက်ခံပေးလို့ မရဘူးလို့ ပြောတာ”ဟု လဲချားဒေသခံ အသက်(၅၀) ကျော်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
ယမန်နှစ်များအတွင်း လဲချားမြို့တွင် မာရှယ်လောကဲ့သို့ ညမထွက်ရအမိန့် ကောလာဟလများ ထွက်ပေါ်ခဲ့သော်လည်း ယခုလို ရပ်ကွက်အတွင်း လှည့်လည်ဆော်ဩကြသည်အထိ မရှိခဲ့ကြောင်း ဒေသခံများထံမှ သိရသည်။
လဲချားမြို့နယ်တွင် စစ်ကောင်စီလက်အောက်ခံ ခြေလျင်တပ်ရင်း ခလရ-(၆၄)နှင့် ခြေမြန်တပ်ရင်း ခမရ-(၅၁၅) တို့ အခြေစိုက်ထားပြီး မြို့အဝင်အထွက် (၃) နေရာတွင် စစ်ဆေးရေးဂိတ် ချထားကာ အသွားအလာ တင်းကြပ်စစ်ဆေးနေကြောင်း ဒေသခံများက ပြောဆိုသည်။
“ပင်လုံဘက်က လာရင် မြို့အဝင်နားမှာ ရပ်ကွက်(၄) နဲ့ ဟိုနောင်လုံနား ဂိတ်တစ်ခု ရှိတယ်။ မိုင်းကိုင်ဘက်က လာရင်တော့ တပ် (၆၄) ရှေ့မှာ ဂိတ်ရှိတယ်။ စကစဂိတ် ၃ ဂိတ်လောက် ရှိတယ်။ တောင်ယာဝေးတဲ့လူဆို ဒုက္ခရောက်မှာ၊ ဘာဖြစ်မှာလဲဆိုပြီးတော့ စိတ်မလုံခြုံဘူးပေါ့။ မြို့အဝင်အထွက်ကတော့ ပိုခက်မယ်”ဟု ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
လက်ရှိတွင် ညမထွက်ရအမိန့်ကြောင့် လဲချားမြို့အနီးတဝိုက် ဝမ်မိုင်ကဲ့သို့ ကျေးရွာများမှ နံနက်စောစော တပိုင်တနိုင် ဟင်းသီးဟင်းရွက် စိုက်ပျိုးရောင်းချသူများ၊ နေ့ခင်းအချိန် တောင်ယာသွားရောက်လုပ်ကိုင်သူများ အခက်အခဲ ဖြစ်စေကြောင်း ဈေးသည်များထံမှ သိရသည်။
အလားတူ ၂၀၂၃ ခုနှစ် ဩဂုတ်လတွင် စစ်ကောင်စီတပ်နှင့် သျှမ်းတပ် SSPP/SSA တို့ လဲချားမြို့နယ်အတွင်း တိုက်ပွဲပြင်းထန်စွာ ဖြစ်ပွားခဲ့စဉ်ကလည်း စစ်ကောင်စီမှ ပြည်သူများ ည ၆ နာရီမှ မနက် ၆ နာရီအထိ အပြင်ထွက်သွားလာခြင်း မပြုရန် ထုတ်ပြန်ခဲ့ဖူးသည်။
ပြီးခဲ့သည့် နိုဝင်ဘာလ (၁၅) ရက်မှ စတင်ပြီး လဲချားနှင့် မိုင်းကိုင်မြို့အကြား တည်ရှိသည့် စစ်ကောင်စီ စစ်ဆေးရေးဂိတ်သည် သျှမ်းပြည်မြောက်ပိုင်း နမ့်လန်၊ မိုင်းရယ်ဘက်သို့ ဆန်နှင့် စက်သုံးဆီ အပါအဝင် စားနပ်ရိက္ခာ သယ်ယူမည့် ကုန်တင်ကားများကို ဖြတ်သန်းခွင့် မပေးဘဲ တားမြစ်ထားကြောင်း ဒေသခံများက ပြောသည်။