သျှမ်းမြောက် တကျော့ပြန် လေကြောင်း တိုက်ခိုက်မှု သတိပြုရန်လိုအပ်

တရုတ်နိုင်ငံ၊ ကူမင်းမြို့တွင် ပြီးခဲ့သည့် ဒီဇင်ဘာလ ၁၅ နှင့် ၁၆ ရက်နေ့က ပြုလုပ်သည့် ကိုးကန့်တပ် (MNDAA) နှင့် စစ်ကောင်စီ တို့၏ ဆွေးနွေးပွဲ ရလဒ် တစုံတရာ ထွက်ပေါ်ခြင်းမရှိဘဲ ပြီးဆုံးသွားပြီးနောက် သျှမ်းမြောက်ဒေသနေ ပြည်သူများ အနေဖြင့် တကျော့ပြန် လေကြောင်း တိုက်ခိုက်မှု သတိပြုရန် လိုအပ်သည်ဟု စစ်ရေးသတင်းရင်းမြစ်က ယနေ့ (ဒီဇင်ဘာလ ၂၀ ရက်) တွင် သတိပေး ပြောဆိုသည်။

တရုတ် အထူးကိုယ်စားလှယ်၏ ကြားဝင်မှုဖြင့် ကျင်းပသည့် ကူမင်း ဆွေးနွေးပွဲကို ကိုကန့်တပ် ဘက်မှ ဦးဖုန်တာရွှင် ၏ သားဖြစ်သူ နိုင်ငံခြားဆက်ဆံရေးဌာနကြီးမှူး ဖုန်ခွင်း ဦးဆောင် တက်ရောက်ပြီး စစ်ကောင်စီဘက်မှ ဒုတိယ ဗိုလ်ချုပ်ကြီးကိုကိုဦး ဦးဆောင် တက်ရောက်သည်ဟု စစ်ရေးသတင်းရင်းမြစ်က ဆိုသည်။

“အဓီက စစ်တပ်ဘက်က လားရှိုးမြို့နဲ့ စစ်သုံ့ပန်းတွေ ပြန်တောင်းတယ်။ MNDAA ဘက်က ပြောတာက ကိုးကန့်အထူးဒေသ ဘယ်လို အသိအမှတ်ပြုမလဲ။ လုံခြုံရေး ဘယ်လို အာမခံမလဲပေါ့။ စစ်တပ်ဘက်က ပြန်ပြောတာက ကိုးကန့်အထူးဒေသကို သူတို့ပေးလို့မရဘူး။ ရွေးကောက်ပွဲက ပေါ်လာတဲ့ လွှတ်တော်နဲ့ အစိုးရက အသိအမှတ်ပြုမှရမယ်ပေါ့။ အဲဒါနဲ့ပဲ ပွဲပျက်တာ။ တရုတ်ဘက်ကတော့ နယ်စပ်ကုန်သွယ်ရေး လမ်းကြောင်း ပြန်ဖွင့်ဖို့ပဲ နှစ်ဘက်လုံးကို ဖိအားပေးတယ်။ ရှေ့လထဲ ထပ်ဆွေးနွေးဖို့တော့ရှိသေးတယ်” ဟု ၎င်းကရှင်းပြသည်။

ယင်းသို့ နိုင်ငံရေး ဆွေးနွေးမှုမှ တဆင့် လားရှိုးမြို့ကို ပြန်မရနိုင်သဖြင့် စစ်ကောင်စီ အနေဖြင့် လေကြောင်း တိုက်ခိုက်မှု အပါအဝင် မြေပြင်ထိုးစစ်ဆင်ခြင်းဖြင့် စစ်ရေးအရ ဖိအားပေးလာနိုင်သည်ဟု ၎င်းကသုံးသပ်သည်။

“အခု တန့်ယန်းဘက်မှာ စစ်တပ်ဘက်က အင်အားဖြည့်နေတယ်။ မြေပြင်ထိုးစစ် အသင့်ပြင်ဖို့ အမိန့်ပေးထားတယ် ဆိုတာမျိုးလည်း ကြားနေတယ်။ အခြေအနေက အချိန်မရွေး တခုခုဖြစ်လာနိုင်တယ် ဆိုတော့ ပြည်သူတွေ စစ်ရေးသတိရှိဖို့ လိုအပ်ပါတယ်” ဟု စစ်ရေးသတင်းရင်းမြစ်က သတိပေးသည်။

လက်ရှိ သျှမ်းမြောက်တခွင် စစ်ကောင်စီ လေကြောင်းမှ ဗုံးကြဲမှုများ ရပ်တန့်နေသော်လည်း နောင်ချိုမြို့နယ် တောင်ခမ်းဒေသနှင့် တကွ ဆက်စပ်နေသည့် သျှမ်းတောင်၊ ရပ်စောက်မြို့နယ် ကျောက်ဂူဒေသတွင် နေ့စဥ် တိုက်ပွဲများ ဆက်လက် ဖြစ်ပွားနေကြောင်း သတင်းရင်းမြစ်များထံမှ သိရသည်။

လက်ရှိ သျှမ်းမြောက် မြို့များ သိမ်းပိုက်ထားသည့် တအာင်းလွတ်မြောက်ရေးတပ်မတော် (TNLA) ကလည်း စစ်ကောင်စီနှင့် ဆွေးနွေးရန် အသင့်ရှိကြောင်း နိုဝင်ဘာလ (၂၅) ရက်နေ့က ထုတ်ပြန်ထားသည်။

ကိုးကန့်တပ်-MNDAA သည် ၁၀၂၇ စစ်ဆင်ရေးအတွင်း မြန်မာ-တရုတ် နယ်စပ်ကုန်သွယ်ရေး အတွက် အရေးပါသည့် ချင်းရွှေဟော်၊ လောက်ကိုင် အပါအဝင် တရုတ်နယ်စပ်ရှိ မြို့များနှင့် လားရှိုးမြို့ကို သိမ်းပိုက်ထားသည်။