Misukol sa kapulisan sa Talisay, 2 namatay

Duha ka mga lalaki ang nangamatay human sa eng­kwentro tali sa kapulisan sa Sityo Cambawog, Brgy. Camp 4, Siyudad sa Talisay,  alas 2:41 sa kaadlawon, Lunes, Disyembre 23, 2024.

Matod sa kapulisan sa Talisay, nakadawat sila og tawag nga nagpahibalo bahin sa presensiya sa mga armado nga tawo sa maong dapit hinungdan nga dali kini nilang girespondihan sakay sa ilang patrol car nga Toyota Innova ubos sa kamanduan sa ilang hepe nga si P/Lt. Col. Epream G. Paguyod.

Apan matod pa nga sa dihang pagkanaug sa ilang sakyanan sa pag-abot sa dapit, gikalitan sila og pamusil sa duha ka wala mailhing lalaki.

Nahitabo ang engkwentro ug ilang naigo ang duha ka mga armadong lalaki.

Walay gikataho nga naigo sa habig sa kapulisan apan naigo sa mga bala ang ilang sakyanan.

Ang duha nga naigo sa kapulisan gidali sa pagdala sa  Cebu South Medical District apan gideklarar sa mga doktor nga nakabsan sa ilang kinabuhi sa pagka alas 3:29 sa kaadlawon sa samang adlaw.

Nakuha sa area sa mga Scene of the Crime Operations (Soco) team nga niproseso sa dapit mao ang usa ka KG 9 submachine ug mga buhing bala, usa ka ka .45 pistol nga may magazine uban sa mga buhing bala ug .38  revolver.

Sa interview sa Superbalita Cebu kang Paguyod, ang duha nga namatay sa engkwentro managsuon nga iyang giila sa alyas nga Junior, 32, may tulo ka mga kaso nga murder ug upat ka kasong frustrated murder, ug ‘Ike’, 18, may kaso nga homicide sa nag-edad pa og 17 anyos.

Ang duha pulos taga Mananga, Barangay Lawaan, Talisay.

Atol ning pagsuwat, wala pa masayri kon unsay ilang tuyo sa maong dapit nga kaadlawon pa. / DVG