အရှေ့နေဝန်းနီကျဆုံးခြင်းမှ ၂၀၂၅ လူထုအောင်မြင်ရေးနှစ်သစ်ဆီသို့ – သျှမ်းသံတော်ဆင့်

၂၀၂၃ နှစ်နှောင်းပိုင်းမှ ၂၀၂၄ နှစ်ကုန်အထိ မြောက်ပိုင်းမဟာမိတ် သုံးဖေါ် ရဲ့ ၁၀၂၇ စစ်ဆင်ရေး ပထမလှိုင်း ဒုတိယလှိုင်းမှာ စစ်ကောင်စီအတွက်တော့ နှစ် ၇၀ အတွင်း သမိုင်းမော်ကွန်းတင်လောက်အောင် အရှုံးကြီး ဆုံးရှုံးခဲ့တယ်။

နေဝန်းနီက သျှမ်းပြည်မြောက်ပိုင်း မြို့တော် လားရှိုးမှာ အခြေစိုက်တဲ့ အရှေ့မြောက်ပိုင်းတိုင်း စစ်ဌာနချုပ်ရဲ့ အမှတ်တံဆိပ်ဖြစ်ပါတယ်။ ၁၉၇၂ ခုနှစ်မှာ ကွန်မြူနစ်ပါတီ လှုပ်ရှားမှုကို ထိန်းချုပ် ချေမှုန်းနိုင်ဖို့ တောင်ကြီး အခြေစိုက် အရှေ့ပိုင်းတိုင်း စစ်ဌာနချုပ်ကနေ ခွဲထွက်ပြီး လားရှိုးမြို့မှာ အရှေ့မြောက်ပိုင်းတိုင်းစစ်ဌာနချုပ် ရမခ အဖြစ် ဖွဲ့စည်းထူထောင်လာခဲ့တာပါ။

အရှေ့မြောက်ပိုင်းတိုင်း စစ်ဌာနချုပ် လက်အောက်ခံ တိုက်ခိုက်ရေးတပ်ရင်း ခြေလျင်တပ်ရင်း ခြေမြန် တပ်ရင်းပေါင်း ၄၇ ခု ရှိပါတယ်။ အမြောက်တပ် သံချပ်ကာတပ် တင့်ကားတပ် ထောက်ပို့တပ် ဝန်တင်တပ် ဆေးတပ် အင်ဂျင်နီယာ စတာတွေထည့်မတွက်သေးပါဘူး။

မြို့နယ်အရ တွက်ရင် သျှမ်းပြည်မြောက်ပိုင်းမှာ ကိုးကန့်တပ်မတော် MNDAA တိုက်ခိုက်သိမ်းပိုက်ထား တာက ကိုးကန့်ကိုယ်ပိုင်အုပ်ချုပ်ခွင့်ရ ကုန်းကြမ်းမြို့ နယ် နဲ့ လောက်ကိုင်မြို့နယ် အပြင် ကွန်လုံမြို့နယ် သိန္နီမြို့နယ် လားရှိုးမြို့နယ် တေပါဝင်ပြီး မြို့နယ်ခွဲတွေပါထည့်တွက်ရင် မုံးကိုးမြို့ ပန်ဆိုင်း (ကြူကုတ်) မြို့ နဲ့ ချင်းရွှေဟော်မြို့တို့ဖြစ်ပါတယ်။

တအာင်း(ပလောင်)တပ်မတော် TNLA ကလဲ ပလောင်ကိုယ်ပိုင်အုပ်ချုပ်ခွင့်ရဒေသ ဖြစ်တဲ့ နမ့်ဆန်မြို့နယ် နဲ့ မန်တုံမြို့နယ်အပြင် သီပေါ၊ ကျောက်မဲ၊ နောင်ချို၊ နမ္မတူ၊ နမ့်ခမ်း၊ မိုးမိတ်မြို့နယ်၊ မိုင်းလုံမြို့နယ်ခွဲ၊ မိုင်းငေါ့မြို့နယ် ခွဲတို့ ကို ကျော်လွန်ပြီး မန္တလေးတိုင်း မိုးကုတ်မြို့အထိ တက်ရောက်တိုက်ခိုက် သိမ်းပိုက်နိုင်ခဲ့ပါတယ်။

စစ်ကောင်စီတပ်နဲ့ မြောက်ပိုင်းတော်လှန်ရေးတပ်တို့အကြား တရုတ်အစိုးရ ကြားဝင်ပြီး အပစ်အခတ် ရပ်ဖို့ ဖိအားပေးတဲ့ကြားက သိမ်းပိုက်နိုင်ခဲ့တာပါ။

မြန်မာနိုင်ငံ အနောက်ခြမ်းဘက်မှာလည်း အမ်းမြို့အခြေစိုက် အနောက်ပိုင်းတိုင်း စစ်ဌာနချုပ် နပခ ကျဆုံးတဲ့ အထိ အာရက္ခတပ်တော်က ဖြိုခွင်းသိမ်းပိုက်နိုင်ခဲ့ပြီး ရခိုင်က မြို့နယ် ၁၇ မြို့နယ်မှာ စစ်တွေ၊ ကျောက်ဖြူ၊ မာန်အောင် မြို့နယ် ၃ခု ကလွှဲပြီး ၁၄ မြို့နယ်ကို သိမ်းပိုက်နိုင်ခဲ့ပါတယ်။

၂၀၂၄ ခုနှစ်ဟာ စစ်ကောင်စီတပ်ဖွဲ့ဝင်တွေအနေနဲ့ မိမိတို့ခေါင်းဆောင်တပ်မှူး တပ်ကဲတွေကို အကာ အကွယ် ပေးဖို့ မပြောနဲ့ မိခင်တပ်ရင်းကို ကာကွယ်လိုစိတ် မိသားစုကိုကာကွယ်လိုစိတ် စစ်အောင်စိတ်တွေအားလုံး ကုန်ခန်းနေပြီး အဆုံးကြီး ဆုံးရှုံးဖို့ ခြေလှမ်းစတဲ့နှစ်လို့ ပြောရင်လဲ မှားမယ်မထင်ပါဘူး။

ဒီတော့ “၁၀၂၇ စစ်ဆင်ရေး” သျှမ်းပြည်မြောက်ပိုင်းကစတဲ့ အောင်စစ်ဆင်ရေးဟာ လူထုတော်လှန်ရေး အောင်မြင်စေတဲ့ဓါတ်အားကူးစက်နေချိန် ၂၀၂၄ အကုန် ၂၀၂၅ နှစ်သစ် ကူးမဲ့ ကာလကနေ နွေဉီးတော်လှန် စစ်ဆင်ရေးမှာ စစ်ကောင်စီအခက် လူထုတော်လှန်ရေးအချက်ပါလို့ သံတော်ဆင့်ရင်း ၂၀၂၅ နှစ်သစ်ကို စာဖတ်ပရိသတ်နဲ့အတူ ကြိုဆိုအပ်ပါတယ်။

သျှမ်းသံတော်ဆင့်