Written by 
မကြာသေးမီ အချိန်ကလေးကပင် မိမိတို့ ၂၀၂၄ ဆိုသည့် နှစ်တစ်နှစ်၊ ကိန်းဂဏန်းတစ်ခုကို ထားရစ်ခဲ့ရပြီဖြစ်သည်။ မိမိတို့ မည်သည့်အရာများ ပြုလုပ်ခဲ့သည့်အတွက် မည်သည်တို့ ကျန်ခဲ့ပြီး မိမိနောက်က ထက်ကြပ် ကပ်လိုက်လာပါသနည်း။ စဉ်းစားတွေးတော သင့်ပေသည်။
မိမိတို့ မြန်မာနိုင်ငံကြီး အတိဒုက္ခရောက်နေသည်မှာ ၂၀၂၄ တစ်နှစ်တည်းမဟုတ်ခဲ့ဘဲ ၂၀၂၁၊ ၂၀၂၂၊ ၂၀၂၃ စသည့်ခုနှစ်သက္ကရာဇ် လေးခုပြောင်းခဲ့ရပြီဖြစ်သည်။ ၂၀၂၅ ဆိုသည့် ခုနှစ်တွင်လည်း အလားတူ အဆိုးနွံထဲတွင် တဝဲလည်နေပါမည်လော။ တစ်ဦးချင်း၊ တစ်ယောက်ချင်း စဉ်းစားတွေးတော သင့်ပေသည်။ စဉ်းစားတွေးတော ကြပါကုန်လော့…
အမှန်ကို မြင်၍ အမြင်မှန်များ ရကြပါလော့…
တစ်ဦးချင်းက မစဉ်းစားဘဲ၊ မတွေးတောဘဲ ချန်လှပ်ထားပါက မိမိ၊ သူတစ်ပါးအပါအဝင် တစ်ပြည်သားလုံး အာဏာရှင်ဝဲဂယက်တွင် ဆက်လည်နေပေဦးမည်။
မိမိတို့သည် အာဏာရှင်နိဂုံးကို မြင်တွေ့လိုကြပေသည်။ ဤသည်မှာ တစ်ပြည်လုံး ဆန္ဒ… တစ်ပြည်လုံး ရည်သန်ရာ…
ထို့ကြောင့် အောင်ပွဲတွေ ဝေခဲ့သော ၂၀၂၄ အပြီးတွင် ၂၀၂၅ သည် နေပြည်တော်သို့ အောင်လံလွှင့်ချီရတော့မည်ဖြစ်သည်။ ထို့ကြောင့်ပင် ၂၀၂၅ သည် အာဏာရှင်အားလုံး(အားလုံး) နိဋ္ဌိတံပြီး ဓမ္မတရားများထွန်းပေါ်ကာ ပြည်သူ/ပြည်သားအားလုံး ဆန္ဒနဲ့ ဘဝထပ်တူကြသည့် နှစ်တစ်နှစ်ဖြစ်ပါစေကြောင်း CJ Platform ဝိုင်းတော်သားများက ဆုတောင်းမေတ္တာပို့သအပ်ပါသည်။