ကယားပြည်နယ်ဝန်ကြီးချုပ် မြို့သန့်ရှင်းသာယာလှပရေးနှင့် ဒေသဖွံ့ဖြိုးရေးလုပ်ငန်း ဆောင်ရွက်မှုများ ကြည့်ရှုစစ်ဆေး

လွိုင်ကော်၊ ဇန်နဝါရီ ၁၈

ကယားပြည်နယ်အစိုးရအဖွဲ့အနေဖြင့် ဒေသဖွံ့ဖြိုးရေးနှင့် ပြန်လည်ထူထောင်ရေးလုပ်ငန်းများအား အရှိန်အဟုန်ဖြင့် အကောင်အထည် ဖော်ဆောင်ရွက်လျက်ရှိရာ ပြည်နယ်ဝန်ကြီးချုပ် ဦးဇော်မျိုးတင်သည် ပြည်နယ်အစိုးရအဖွဲ့ဝင်များနှင့်အတူ ယနေ့နံနက်ပိုင်းက လွိုင်ကော်မြို့၊ နောင်ယားကန် သန့်ရှင်းသာယာလှပရေးနှင့် ဌာနဆိုင်ရာရုံးများ ပြန်လည်ဖွင့်လှစ်နိုင်ရန် ပြုပြင်ဆောင်ရွက်နေမှု အခြေအနေများအား ကြည့်ရှုစစ်ဆေးခဲ့သည်။

ရှေးဦးစွာ ပြည်နယ်ဝန်ကြီးချုပ်နှင့် တာဝန်ရှိသူများသည် လွိုင်ကော်မြို့၊ နောင်ယားကန်တွင် အများပြည်သူများ စိတ်အေးချမ်းသာစွာ လာရောက်အပန်းဖြေ အနားယူလည်ပတ်နိုင်ရန်အတွက် နောင်ယားကန်နှင့် ကန်ပတ်ဝန်းကျင် စိမ်းလန်းစိုပြည်ရေးနှင့် သန့်ရှင်းသာယာလှပရေး တပ်ရင်းတပ်ဖွဲ့များနှင့် ဌာနဆိုင်ရာဝန်ထမ်းများက စုပေါင်းသန့်ရှင်းရေး ဆောင်ရွက်နေမှုအား ကြည့်ရှုအားပေးခဲ့သည်။

ထို့နောက် အကြမ်းဖက်မှုများကြောင့် ထိခိုက်ပျက်စီးခဲ့သည့် တိုင်းရင်းသားရေးရာဌာနများ၊ တိုင်းရင်းသားစာပေနှင့် ယဉ်ကျေးမှုကော်မတီ ရုံးအဆောက်အအုံများနှင့် ကော်မတီရုံးခန်းများ ပြုပြင်ဆောင်ရွက်ပြီးစီးမှု အခြေအနေအား အသေးစိတ်ကြည့်ရှုစစ်ဆေးပြီး တိုင်းရင်းသားစာပေနှင့် ယဉ်ကျေးမှုကော်မတီများအနေဖြင့် သက်ဆိုင်ရာရုံးခန်းများတွင် ရုံးများပြန်လည်ဖွင့်လှစ်ပြီး ပြည်နယ်အတွင်း တိုင်းရင်းသားများ၏ စာပေ၊ ယဉ်ကျေးမှု ဖွံ့ဖြိုးတိုးတက်ရေးဆိုင်ရာ ကိစ္စရပ်များ အကောင်အထည်ဖော် ဆောင်ရွက်နိုင်ရန်အတွက် တာဝန်ရှိသူများက လိုအပ်သည်များ ပေါင်းစပ် ဆောင်ရွက်ပေးရန် မှာကြားခဲ့သည်။

ဆက်လက်၍ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနအနေဖြင့် သက်ဆိုင်ရာရုံး၌ ဌာန၏လုပ်ငန်းတာဝန်များ ပြန်လည်ဆောင်ရွက်နိုင်ရန်နှင့် ပြည်နယ်ဖွံ့ဖြိုးတိုးတက်ရေးအတွက် ရင်းနှီးမြှုပ်နှံမှုများလုပ်ငန်းများ ဖိတ်ခေါ်ဆောင်ရွက်ရာတွင် ပိုမိုအဆင်ပြေချောမွေ့စွာ ဆောင်ရွက်ပေးနိုင်ရန်အတွက် ရုံးအဆောက်အအုံ ပြန်လည်ပြုပြင်ဆောင်ရွက်ပေးနေမှု အခြေအနေအား ကြည့်ရှုစစ်ဆေးပြီး လုပ်ငန်းများ သတ်မှတ်စံချိန်စံညွှန်း ပြည့်မီစွာဖြင့် အချိန်မီ ပြီးစီးရေး အလေးထား ကြပ်မတ်ဆောင်ရွက်ရန် တာဝန်ရှိသူများအား မှာကြားခဲ့ကြောင်း သိရသည်။

Join – https://t.me/MyanmarNationalPost