Written by 
TikTok ကိုပိုင်ဆိုင်သည့် ByteDance ကုမ္ပဏီက ၎င်းတို့၏ဝန်ဆောင်မှုများကို “ခေတ္တရပ်ဆိုင်းကြောင်း” ကြေညာပြီးနောက် အမေရိကန်ရှိ TikTok အသုံးပြုသူ သန်း ၁၇၀ တို့သည် နာမည်ကြီးဗီဒီယိုမျှဝေသည့်အက်ပ်ကို သုံး၍မရတော့ချေ။
ယမန်နေ့ည ၁၁ နာရီ မတိုင်မီတွင် “ဆောရီး TikTok ကို သုံး၍ မရနိုင်တော့ပါ” ဟူသည့် မက်ဆေ့ချ်ဖြင့် အမေရိကန်အသုံးပြုသူများကို နှုတ်ဆက်ခဲ့ပြီးနောက် TikTok ဝက်ဘ်ဆိုက်သို့ ဝင်ရောက်၍မရတော့ခြင်းဖြစ်သည်။
ထို့အပြင် Apple နှင်က Google တို့ကလည်း သူတို့၏ App Store များမှနေ၍ အမေရိကန်နေပြည်သူများ download လုပ်၍မရစေရန် TikTok အက်ပ်ကို ဖယ်ရှားခဲ့ကြသည်။
အမေရိကန်သမ္မတ ဂျိုးဘိုင်ဒင်က တိကျသေချာသည့် အာမခံချက်မပေးလျှင် ဇန်နဝါရီ ၁၉ရက် တနင်္ဂနွေနေ့တွင် အမေရိကန်ရှိ သုံးစွဲသူ သန်း ၁၇၀ အတွက် ဝန်ဆောင်မှုများကို ယာယီရပ်ဆိုင်းမည်ဟု TikTok က သောကြာနေ့က ကြေညာခဲ့သည်။
ဘိုင်ဒင် ၏ အစိုးရအဖွဲ့က နိုင်ငံတစ်ဝန်းတွင် ရေပန်းစားသော TikTok ဗီဒီယိုပလက်ဖောင်းကို တားမြစ်ရန် ရည်ရွယ်သည့် ဥပဒေကို ချက်ချင်းပြဋ္ဌာန်းမည် မဟုတ်ကြောင်း ထုတ်ဖော်ပြောဆိုခဲ့သော်လည်း TikTok မှ ယင်းကြေညာချက်ကို ထုတ်ပြန်ခဲ့ခြင်းဖြစ်သည်။
၂၀၂၄ ခုနှစ် ဧပြီလအတွင်းက ဂျိုးဘိုင်ဒင် သည် အခြေအမြစ်မရှိသော အမျိုးသားလုံခြုံရေးဆိုင်ရာ စိုးရိမ်မှုများကို ကိုးကားပြီး ရက်ပေါင်း ၂၇၀ အတွင်း ByteDance ကုမ္ပဏီ၏ TikTok အက်ပ်ကို အမေရိကန်ကုမ္ပဏီတစ်ခုသို့ ရောင်းချရန် လိုအပ်သည့် ဥပဒေကြမ်းကို လက်မှတ်ရေးထိုးခဲ့သည်။
အကယ်၍ ကုမ္ပဏီက လိုက်နာရန် ပျက်ကွက်ပါက Apple နှင့် Google ကဲ့သို့သော အက်ပ်စတိုးအော်ပရေတာများသည် ၂၀၂၅ ခုနှစ် ဇန်နဝါရီ ၁၉ရက် မှစ၍ ၎င်းတို့၏ ပလက်ဖောင်းများမှ TikTok ကို ဖယ်ရှားရန် အဆိုပါ ဥပဒေကြမ်းတွင် ပြဌာန်းထားသည်။
ယင်းဥပဒေကြမ်းကို ဘိုင်ဒင်အစိုးရအဖွဲ့က မပြဌာန်းသေးဟုဆိုသော်လည်း သောကြာနေ့အစောပိုင်းတွင်၊ အမေရိကန်တရားရုံးချုပ်သည် TikTok ၏ ပိုင်ရှင်ဖြစ်သည့် ByteDance ကုမ္ပဏီအနေဖြင့် အဆိုပါအက်ပ်ကိုအမေရိကန်ကုမ္ပဏီတစ်ခုထံရောင်းချရန်နှင့် ထိုသို့မရောင်းချပါက ByteDance ကုမ္ပဏီသည် ရွေးကောက်ခံသမ္မတ Donald Trump ၏ကျမ်းသစ္စာမကျိန်ဆိုမှုမတိုင်မီတစ်ရက်အလို တနင်္ဂနွေနေ့မှ စတင်ကာ TikTok အား အမေရိကန်နိုင်ငံတစ်ဝှမ်းတားမြစ်ပိတ်ပင်မှုကို ရင်ဆိုင်ရလိမ့်မည်ဖြစ်ကြောင်း သတိပေးကြေညာခဲ့သည်။
ထို့နောက် TikTok နှင့်ပတ်သက်သည့် ကိစ္စအဝဝကို နောက်တက်လာမည့် သမ္မတ ထရမ့်၏ အစိုးရလက်သို့ လွှဲပြောင်းပေးခဲ့မည်ဖြစ်ကြောင်းပြောကြားခဲ့သည်။
ထရမ့်၏ သမ္မတအဖြစ် ကျမ်းသစ္စာကျိန်ဆိုပွဲသို့ TikTok ၏ CEO လည်း တက်ရောက်မည်ဖြစ်သည်။