ဗဟိုဘဏ်မှ သွင်းကုန်လုပ်ငန်းရှင်များအတွက် ထိုင်းဘတ် ၂ သန်းနီးပါး ထပ်မံထုတ်ရောင်း

၂၁. ၁. ၂၀၂၅
Written by Nyein Kyaw

ယမန်နေ့တွင် ဗဟိုဘဏ်မှ သွင်းကုန်လုပ်ငန်းရှင်များအတွက် ထိုင်းဘတ် ၁ ဒသမ ၉၁၅ သန်း ထပ်မံထုတ်ရောင်းပေးခဲ့ပြီး နိုင်ငံခြားငွေများ ဆက်တိုက်ထုတ်ရောင်းပေးနေမှုကြောင့် တက်ရိပ်ပြခဲ့သည့် ဒေါ်လာဈေးနှုန်း အနည်းငယ်ကျဆင်းလာခဲ့ကြောင်း သိရသည်။

ဒေါ်လာဈေးနှုန်း တက်ရိပ်ပြလာသည့် ယခုဇန်နဝါရီလ ၂ ရက်မှ ၂၀ ရက်အထိ သုံးပတ်အတွင်း ဗဟိုဘဏ်အနေဖြင့် ဒေါ်လာ ၁၀၈ ဒသမ ၉၁၁ သန်း ရောင်းချပေးခဲ့သလို ထိုင်းဘတ် ၈ ဒသမ ၉၄၇ သန်းနှင့် တရုတ်ယွမ် ၄ ဒသမ ၄၈၃ သန်း ထုတ်ရောင်းပေးထားသည်။

ဒေါ်လာဈေးနှုန်း ပြန်လည်မြင့်တက်လာခဲ့သော ယခုဇန်နဝါရီလ ဒုတိယအပတ်တွင် တစ်ဒေါ်လာ ကျပ် ၄၈၀၀ အထိ မြင့်တက်ခဲ့သော်လည်း ယင်းကဲ့သို့ နိုင်ငံခြားငွေများ ဆက်တိုက်ထုတ်ရောင်းပေးထားမှုကြောင့် တစ်ဒေါ်လာ ကျပ် ၄၆၀၀ ကျော်သို့ ပြန်လည်ကျဆင်းခဲ့သည်။

ယနေ့တွင် တစ်ဒေါ်လာ ၄၆၄၀ ကျပ်၊ ထိုင်းဘတ် တစ်ဘတ် ၁၃၆ ကျပ်၊ တရုတ်ယွမ် တစ်ယွမ် ၆၃၇ ကျပ် ဖြစ်ပေါ်ခဲ့ပြီး ယခုဇန်နဝါရီလဆန်းပိုင်းထက် ဈေးနှုန်းအနည်းငယ်သာ မြင့်တက်မှုမှုရှိပြီး နိုင်ငံခြားငွေဈေးနှုန်း ပြန်လည်တည်ငြိမ်လာခဲ့သည်။

Source link