Written by 
ငါးလနီးပါးအကြာ ကုန်စည်ဖြတ်သန်းခွင့် ပိတ်ပင်ထားသည့် ကိုးကန့်တပ်ဖွဲ့ MNDAA ထိန်းချုပ်ဒေသအတွင်းသို့ ‘ဝ’တပ်ဖွဲ့ UWSA မှ ကုန်စီးဆင်းမှု ပြန်လည်ခွင့်ပြုပေးလိုက်ကြောင်း စုံစမ်းသိရသည်။
မြန်မာနိုင်ငံဆိုင်ရာ တရုတ်သံရုံး၏ ညွှန်ကြားချက်ကြောင့် ယနေ့ (ဇန်နဝါရီလ ၂၀ ရက်) မှ စတင်ပြီး ‘ဝ’ပြည်သွေးစည်းညီညွတ်ရေးတပ်မတော် UWSA မှ ကိုးကန့်တပ်ဖွဲ့ MNDAA ထိန်းချုပ်ဒေသဘက်သို့ ကုန်စည်ဖြတ်သန်းခွင့်ကို ဖောင်ဆိပ်တံတားမှ ပုံမှန်အတိုင်း ခွင့်ပြုကြောင်း ကြေညာချက်တစ်စောင် ထုတ်ပြန်ခဲ့သည်။
ကိုးကန့်တပ်ဖွဲ့ ထိန်းချုပ်ဒေသအတွင်း တည်ငြိမ်လာခြင်းကြောင့် လူနှင့် ယာဉ်ဖြတ်သန်းခွင့်အပြင် ဖောင်ဆိပ်တံတားမှ ကုန်စည်ပို့ဆောင်ခွင့် ထိန်းချုပ်ထားခြင်းကို ဖြေလျော့ပေးပြီး ပုံမှန်အတိုင်း ခွင့်ပြုလိုက်ကြောင်း UWSA ၏ ထုတ်ပြန်ကြေညာချက်တွင် ဆိုထားသည်။
“မှန်တယ်နော်၊ ကျနော်တို့ ဝပြည်နဲ့ ကိုးကန့်ပေါ့နော် ကုန်စည်စီးဆင်းမှုကို ခွင့်ပြုလိုက်ပါပြီနော်”ဟု ‘ဝ’ပြင်ပဆက်ဆံရေးတာဝန်ခံ ဦးညီရမ်းက သျှမ်းသံတော်ဆင့်ကို အတည်ပြု ပြောဆိုသည်။
ယမန်နှစ် ၂၀၂၄ ဩဂုတ်လနောက်ဆုံးပတ်က တရုတ်အထူးကိုယ်စားလှယ် မစ္စတာတိန့်ရှီကျွင်းနှင့် ‘ဝ’ခေါင်းဆောင်တို့ တွေ့ဆုံဆွေးနွေးမှုအတွင်း ကိုးကန့်တပ်ဖွဲ့ MNDAA ထိန်းချုပ်ထားသည့် လောက်ကိုင်၊ ကွမ်းလုံ၊ သိန္နီနှင့် လားရှိုးဒေသသို့ ဖြတ်(၅)ဖြတ် လုပ်ဆောင်ရန် ဖိအားပေးခံရသည်။
၎င်းနောက် UWSA မှ ဟိုပန်နှင့် ကွမ်းလုံမြို့နယ်ကြားရှိ ဖောင်ဆိပ်တံတားမှ ကုန်စည်ဖြတ်သန်းခွင့်ကို တားမြစ်ခဲ့ပြီး (၅) လကျော်အကြာတွင် ယခုကဲ့သို့ ပြန်လည်ဖွင့်ပေးလိုက်ခြင်း ဖြစ်သည်။
အလားတူ “၁၀၂၇ စစ်ဆင်ရေး” ဒုတိယပိုင်း စတင်ပြီးနောက် ပိတ်ထားခံရသည့် မြန်မာ-တရုတ် နယ်စပ်တလျှောက် ‘ဝ’တပ်ဖွဲ့ UWSA နှင့် ကိုးကန့်တပ်ဖွဲ့ MNDAA တို့ ထိန်းချုပ် နယ်စပ်ဂိတ်များကိုလည်း တရုတ်ဘက်မှ ပြန်လည်ဖွင့်ပေးပြီး ကုန်စည်များ စတင်ဝင်ရောက်နေကြောင်း ဒေသခံများထံမှ သိရသည်။
ကိုးကန့်တပ်ဖွဲ့ MNDAA နှင့် စစ်ကောင်စီအကြား တရုတ်နိုင်ငံ ကူမင်းမြို့၌ ဇန်နဝါရီလ (၁၆၊ ၁၇) ရက်တို့တွင် ဒုတိယအကြိမ် တွေ့ဆုံဆွေးနွေးပြီးနောက် တရားဝင် အပစ်အခတ် ရပ်စဲလိုက်ကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မော်နင်းက ယနေ့ (ဇန်နဝါရီ ၂၀ ရက်) သတင်းစာရှင်းလင်းပွဲတွင် ပြောကြားခဲ့သည်။
MNDAA နှင့် စစ်ကောင်စီအကြား အပစ်ရပ် သဘောတူညီချက်သည် ဇန်နဝါရီလ (၁၈) ရက်တွင် စတင်အသက်ဝင်ကြောင်း ဆိုထားပြီး သဘောတူညီချက်ပါ အသေးစိတ် အချက်အလက်ကို ထုတ်ဖော်ပြောဆိုခြင်း မရှိသေးခြင်းကြောင့် သျှမ်းသံတော်ဆင့်မှ ဆက်လက်စုံစမ်းနေသည်။