အမေရိကရောက် အထောက်အထားမဲ့ နိုင်ငံသားများ နေရပ်ပြန်လာနိုင်ရန် လမ်းဖွင့်ထား- အိန္ဒိယနိုင်ငံခြားရေးဝန်ကြီး

အိန္ဒိယနိုင်ငံခြားရေးဝန်ကြီး ဆူဘရာ့မန်ယန် ဂျေးရှန်ကာသည် အမေရိကန်သမ္မတ ဒေါ်နယ်ထရမ့်ပ်၏ အစိုးရအဖွဲ့သစ်မှ နိုင်ငံခြားရေးဝန်ကြီးနှင့် တွေ့ဆုံခဲ့ပြီးနောက် အမေရိကန်ပြည်ထောင်စုတွင် တရားမဝင် နေထိုင်နေသည့် ၎င်းတို့နိုင်ငံသားများကို ပြန်လည်ခေါ်ယူရန် အိန္ဒိယအစိုးရက ပြင်ဆင်နေသည်ဟု ပြောကြားလိုက်သည်။

မစ္စတာထရမ့်ပ် ကျမ်းသစ္စာဆိုအပြီး တစ်ရက်အကြာ ဇန်နဝါရီ ၂၁ ရက်တွက် ဝါရှင်တန်၌ အမေရိကန်နိုင်ငံခြားရေးဝန်ကြီး မာကို ရူဘီယိုနှင့် တွေ့ဆုံဆွေးနွေးခဲ့အပြီးတွင် ဒေါက်တာ ဂျေးရှန်ကာက ယင်းကဲ့သို့ ပြောဆိုခဲ့ခြင်းဖြစ်သည်။

မစ္စတာထရမ့်ပ်သည် တရားမဝင် ရွှေ့ပြောင်းနေထိုင်မှုများကို တားဆီးရန်နှင့် သန်းနှင့်ချီသော ရွှေ့ပြောင်းအခြေချသူများကို ပြည်နှင်ဒဏ်ပေးရေး သူ၏ ရည်မှန်းချက်ကို အရှိန်မြှင့်ရန်အတွက် ယခုသီတင်းပတ်တွင် သမ္မတအမိန့်အများအပြားကို ထုတ်ပြန်ခဲ့သည်။

အထောက်အထားမဲ့ အိန္ဒိယလူမျိုးများကို ပြန်လည်လက်ခံရန် နူးဒေလီက လမ်းဖွင့်ထားပြီး အိန္ဒိယသို့ ပြန်ပို့ခံရနိုင်သည့် အမေရိကရောက်နေသူများကို စစ်ဆေးရန် လုပ်ငန်းစဉ်များလုပ်ဆောင်နေသည်ဟု ဒေါက်တာဂျေးရှန်ကာက ပြောဆိုခဲ့သည်။

သတင်းဖော်ပြချက်များနှင့် ပတ်သက်သောမေးခွန်းကို ဒေါက်တာဂျေးရှန်ကာက ပြန်လည်ဖြေကြားရာ၌ စာရွက်စာတမ်း အထောက်အထားမရှိ သို့မဟုတ် ဗီဇာသက်တမ်းလွန်နေထိုင်နေသည့် အိန္ဒိယနိုင်ငံသား ၁၈,၀၀၀ ဝန်းကျင်ကို ပြည်နှင်ဒဏ်ပေးမည့်ကိစ္စအတွက် အိန္ဒိယက ထရမ့်ပ်အစိုးရနှင့် ပူးပေါင်းဆောင်ရွက်နေသည်ဟု ပြောဆိုခဲ့သည်။
Ref: သည်စထရိတ်တိုင်းမ်စ်