Written by 
ဇီဝဇိုး ငှက်သိုက်များကို တရုတ်၊ ဂျပန်၊ ထိုင်း၊ ဥရောပနိုင်ငံများနှင့် အမေရိကန်နိုင်ငံတို့မှ ဝယ်ယူမှုများလာသောကြောင့် ဇီဝဇိုးငှက်သိုက် မွေးမြူသူများပြားလာကြောင်း အဆိုပါ လုပ်ငန်းလုပ်ကိုင်သူများထံမှ သိရသည်။
“တရုတ်က ပိုအဝယ်လိုက်တယ်၊ မွေးမြူတဲ့ ရုံတွေအထိ လိုက် ဆင်းဝယ်တဲ့ တရုတ်တွေတောင်ရှိတယ်၊ သူကသောက်လိုက်ရင် အားရှိစေတယ်၊ လန်းတယ်” ဟု မင်္ဂလာဒုံမြို့နယ်တွင် ဇီဝဇိုးငှက်သိုက် မွေးမြူသူတစ်ဦးက ပြောသည်။
ဇီဝဇိုး ငှက်သိုက်များသည် နိုင်ငံတကာဈေးကွက်ဝင် တင်ပို့နိုင်သော ပို့ကုန်ဖြစ်ပြီး အမျိုးအစားအလိုက် တစ်ပိဿာ လျှင် အနည်းဆုံး ကျပ် (၁၆)သိန်းမှ အများဆုံး ကျပ် (၂၂) သိန်းထိ ပေါက်ဈေးရှိကြောင်းလည်း အထက်ပါ မွေးမြူသူက ဆိုသည်။
ယခင်က ဇီဝဇိုးငှက် မွေးမြူခြင်းမှ ငှက်သိုက်ထုတ်လုပ်ခြင်းလုပ်ငန်းကို တနင်္သာရီတိုင်း၌ ၂၀၀၂ ခုနှစ်က စတင်ခဲ့ခြင်းဖြစ်ပြီး ၂၀၀၃ ခုနှစ်နောက်ပိုင်းမှသာ ရန်ကုန်တိုင်း၊ မွန်ပြည်နယ်နှင့် ကရင်ပြည်နယ်တို့တွင် တွင်တွင်ကျယ်ကျယ် မွေးမြူလာကြောင်း သိရသည်။
ဇီဝဇိုးငှက်များကို ပုသိမ်အနောက်ဘက် ကမ်းခြေအလွန်ရှိ ကျွန်များ၊ တနင်္သာရီကမ်းရိုးတန်းနှင့် မြိတ်ကျွန်းစုတို့တွင် အများအားဖြင့် တွေ့ရှိရသည်ဟု သိရသည်။
ယင်းအပြင် သဘာဝအတိုင်းရရှိသည့် ဇီဝဇိုး ငှက်သိုက်များကို သစ်တော ဦးစီးဌာနကဦးစီးပြီး နှစ်စဉ် ငှက်သိုက် သိမ်းယူခွင့် လိုင်စင်ထုတ်ပေးကာ ငှက်မျိုးစိတ် မျိုးသုဉ်းပျောက်ကွယ်မှုမရှိစေရန် ဥပဒေများဖြင့် ထိန်းသိမ်းထားကြောင်းသိရသည်။