Written by 
လာအိုနိုင်ငံတွင်ကျင်းပ ပြုလုပ်နေသည့် ကာကွယ်ရေးဝန်ကြီးများ အစည်းအဝေးတွင် အမေရိကန်ကာကွယ်ရေးဝန်ကြီးလွိုက်အောစတင်နှင့် တွေ့ဆုံဆွေးနွေးရေးအစီအစဉ်ကို တရုတ်ကာကွယ်ရေးဝန်ကြီးက လက်မခံငြင်းဆန်လိုက်ရာ ယင်းသို့ ငြင်းဆန်ခြင်းကို စိတ်မကောင်းစရာဖြစ်ရပ်အဖြစ် ပင်တဂွန်အကြီးအကဲက နိုဝင်ဘာ ၂၀ ရက်တွင် ပြောဆိုခဲ့သည်။
အာရှ နိုင်ငံပေါင်းစုံမှ လုံခြုံရေးအရာရှိများ၏ အစည်းအဝေးအတွင်း အမေရိကနှင့် တရုတ် ကာကွယ်ရေးခေါင်းဆောင်များအကြား ယခင်က တွေ့ဆုံဆွေးနွေးကြလေ့ရှိခဲ့သည်။ သို့ရာတွင် ယခုသီတင်းပတ်၏ အာဆီယံနှင့် အခြားဆွေးနွေးဖက်နိုင်ငံများမှ ကာကွယ်ရေးဝန်ကြီးများ၏ အစည်းအဝေးတွင်မူ မစ္စတာ အော်စတင်၏ တွေ့ဆုံဆွေးနွေးရေး ကမ်းလှမ်းချက်ကို တရုတ်ဘက်က ငြင်းပယ်ခဲ့သည်။
“ဒါက စိတ်မကောင်းစရာပါပဲ၊ ဒေသတွင်းမှာ အရေးပါတဲ့ အင်အားကြီးတဲ့ နှစ်နိုင်ငံအကြားမှာ တစ်ဖက်နဲ့တစ်ဖက် ပြောဆိုဆွေးနွေးကြတာကို အမှန်တကယ် မြင်တွေ့လိုကြတာကြောင့် ဒေသတွင်းအတွက် ထိခိုက်စေပါတယ်” ဟု မစ္စတာ အော်စတင်က သတင်းထောက်များကို ပြောကြားခဲ့သည်။
ယင်းသည် ၎င်းတို့၏ ရွေးချယ်မှုတစ်ခုသာဖြစ်ပြီး အနာဂတ်အတွက် သက်ရောက်မှုရှိမည် မထင်ကြောင်းနှင့် အခွင့်အလမ်းကောင်းကို အဘယ်ကြောင့် လက်လွှတ်ခဲ့သနည်းဆိုသည်မှာ ၎င်းတို့သာ ရှင်းပြနိုင်မည်ဖြစ်ကြောင်း မစ္စတာ အော်စတင်က ပြောကြားသွားသည်။
၂၀၂၄ ခုနှစ် အစောပိုင်းက စင်ကာပူနိုင်ငံတွင်ကျင်းပ ပြုလုပ်ခဲ့သော အစည်းအဝေးတွင်မှု မစ္စတာ အော်စတင်နှင့် တရုတ်ကာကွယ်ရေးဝန်ကြီး Dong Jun တို့ တွေ့ဆုံခဲ့ကြပြီး ထိုင်ဝမ်အရေး၊ အခြားအရေးများတွင် သဘောထားကွဲလွဲမှုများ ထပ်ရှိခဲ့ကြသော်လည်း စစ်တပ်အချင်းချင်း ဆက်သွယ်မှုလမ်းေကြာင်းများကို ဆက်လက်ဖွင့်ထားရန်လိုအပ်ကြောင်းကိုမူ အလေးပေးပြောဆိုခဲ့ကြသည်။
ဆိုက်ဘာရာဇဝတ်မှုများမှသည် ကုန်သွယ်ရေး၊ ထိုင်ဝမ်အရေး၊ တောင်တရုတ်ပင်လယ်အရေးနှင့် ရုရှားနိုင်ငံအရေးဆိုင်ရာ ပဋိပက္ခများနှင့်ပတ်သက်၍ ရာထူးမှ ဆင်းပေးရတော့မည့် အမေရိကန်သမ္မတ ဂျိုးဘိုင်ဒင်နှင့် နောက်ဆုံး တွေ့ဆုံဆွေးနွေးခဲ့မှုအတွင်း နောက်တက်လာမည့် ဒေါ်နယ်ထရမ့်ပ်အစိုးရအဖွဲ့နှင့် လက်တွဲအလုပ်လုပ်သွားမည်ဟု တရုတ်သမ္မတ ရှီကျင့်ဖျင်က နိုဝင်ဘာ ၁၆ ရက်တွင် ကတိပြုခဲ့သည်။
Ref: သည်စထရိတ်တိုင်းမ်စ်